ރާއްޖެއަކީ އިންޑިއާގެ އަސާސީ ބައިވެރިއެއް: އިންޑިއާގެ ރައީސް

ރައީސް ޑރ. މުހައްމަދު މުއިއްޒު އިންޑިއާގެ ރައީސް ދުރޫޕަދީ މުރުމޫއާ ރޭ ބައްދަލުކުރައްވައިފި އެވެ.

އިންޑިއާގެ ރިޔާސީ ގަނޑުވަރު، ރާސްތުރަޕަތީ ބަވަންގައި ބޭއްވި މި ބައްދަލުވުމުގައި އިންޑިއާގެ ރައީސް ވަނީ ރާއްޖެއަކީ އެ ގައުމުގެ އަސާސީ ބައިވެރިއެއްގެ ގޮތުގައި ސިފަކުރައްވާފައި ކަމަށް ރައީސް އޮފީހުން ބުންޏެވެ.

"އެގޮތުން، އިންޑިއާ އިން ގެންގުޅޭ "ނޭބަހުޑް ފަސްޓް" ސިޔާސަތުގައްޔާއި ބޮޑުވަޒީރު ނަރެންދްރަ މޯދީގެ "ސެކިއުރިޓީ އެންޑް ގްރޯތު ފޯ އޯލް އިން ދަ ރީޖަން" ނުވަތަ "ސާގަރް"ގެ ތަސައްވުރުގައި ރާއްޖެއަކީ މުހިންމު ބައިވެރިއެއް ކަމަށް އެކަމަނާ ވިދާޅުވި އެވެ،" ރައީސް އޮފީހުގެ ވެބްސައިޓުގައި ވެ އެވެ.

މާލެ ކަނެކްޓިވިޓީ މަޝްރޫއަކީ ރާއްޖޭގައި އިންޑިއާ އިން ހިންގާ އެންމެ ބޮޑު އުމްރާނީ މަޝްރޫއުކަން ފާހަގަކުރައްވައި، އެ ގައުމުން ރާއްޖޭގެ ތަރައްގީ އަށް ދޭ އެހީ ފަރުމާ ކޮށްފައިވަނީ، އޭގެ ފައިދާ ދިވެހިންނަށް ފޯރާނެ ގޮތަށް ކަމަށް ރައީސް މުރުމޫ ވިދާޅުވި އެވެ. އަދި އިއްޔެ އިއުލާންކުރި "ކޮމްޕްރިހެންސިވް ސެކިއުރިޓީ އެންޑް މެރިޓައިމް ޕާޓްނާޝިޕް" ގެ ދަށުން، ދޭދޭ ގުޅުން ހަރުދަނާ ކުރާނޭ އާ އޮނިގަނޑެއް ބިނާކުރެވޭނޭ ކަމަށް ވެސް އިންޑިއާގެ ރައީސާ ހަވާލާދީ، ރައީސް އޮފީހުން ބުންޏެވެ.

ރައީސް މުއިއްޒުގެ ދެކަނބަލުން އިންޑިއާގެ ރައީސާ ބައްދަލުކުރައްވަނީ.

"...އަދި ދިވެހިރާއްޖެ ތަރައްގީ އަށް ވާސިލުވުމަށް ކުރާ މަސައްކަތްތަކަށް އެއްބާރުލުން ދިނުމުގައި އިންޑިއާ ދެމިއޮންނާނެ ކަމުގެ ޔަގީންކަން ރައީސް މުރުމޫ ވަނީ ދެއްވައިފަ އެވެ،" ރައީސް އޮފީހުގެ ވެބްސައިޓުގައި ވެ އެވެ. އިންޑިއާ އަށް ފުރަމާނަ ދަތުރުފުޅެއް ކުރެއްވުމަށް ދެއްވި ދައުވަތަށްޓަކައި ރައީސް މުއިއްޒުގެ ޝުކުރު ރައީސް މުރުމޫ އަށް މި ބައްދަލުވުމުގައި ދެންނެވި އެވެ.

އިންޑިއާ އާއި ރާއްޖެއާ ދެމެދު އޮތް ޒަމާންވީ ގުޅުން އިތުރަށް ހަރުދަނާ ކުރުމަށް ދެ ގައުމަށް ފައިދާ ހުރި މަސައްކަތްތަކެއް ކުރައްވާނެ ކަމުގެ ޔަގީންކަން ރައީސް މުއިއްޒު ދެއްވި އެވެ. ތައުލީމާއި މީހުން ބިނާކުރުމާއި ޓޫރިޒަމް އަދި ސިއްހީ ދާއިރާ ހިމެނޭނޭ ފަދައިން ގިނަ ދާއިރާތަކުން ތަރައްގީ އަށް ކުރާ މަސައްކަތްތަކުގައި އިންޑިއާ އިން އަދާކުރާ ދައުރުގެ މައްޗަށް ވެސް މި ބައްދަލުކުރެއްވުމުގައި ރައީސް މުއިއްޒު އަލިއަޅުއްވައިލެއްވި އެވެ.

ރައީސް މުއިއްޒާއި އިންޑިއާގެ ރައީސް ރޭ ބައްދަލުކުރައްވަނީ.

"ކުރިއަށް އޮތް ތަނުގައި، ދެ ގައުމުގެ ދެމެދުގައި ގާއިމުވެފައިވާ ގުޅުން އިތުރަށް ހަރުދަނާކޮށް، މި ފުރަމާނަ ދަތުރުފުޅުގައި ފެށި މުއާމަލާތްތައް އެދެވޭ ގޮތެއްގައި ކުރިއަށް ގެންދިއުމަށް، ރައީސުލްޖުމްހޫރިއްޔާ ޑޮކްޓަ މުހައްމަދު މުއިއްޒު އާއި ރައީސް ދުރުޕަދީ މުރުމޫ، މި ބައްދަލުކުރެއްވުމުގައި އެއްބަސްވެވަޑައިގެންނެވި އެވެ،" ރައީސް އޮފީހުން ބުންޏެވެ ރައީސް މުއިއްޒުގެ ދެކަނބަލުންގެ ޝަރަފުގައި އިންޑިއާގެ ރައީސް ރޭ ދެއްވި ރަސްމީ ޖާފަތް ވެސް އޮތެވެ.

މިދިޔަ އާދިއްތަ ދުވަހު އިންޑިއާ އަށް ފެއްޓެވި ފުރަމާނަ ދަތުރުފުޅުގައި ވެރިރަށް ދިއްލީގެ އިވެންޓުތައް ނިންމަވާލައްވައި ރައީސް މުއިއްޒު މިއަދު ހެނދުނު ފުރާވަޑައިގަންނަވާނީ އާގަރާ އަށެވެ. ތާޖުމަހަލް އަށް ކުރައްވާ ޒިޔާރަތަށް ފަހު މިއަދު ވަޑައިގަންނަވާނީ މުމްބާއީއަށެވެ. ދަތުރުފުޅުގެ ފަހު މަންޒލަކީ ބެންގަލޫރެވެ.

ރައީސް މުއިއްޒުގެ ތާރީހީ އަދި ދެ ގައުމުގެ ގުޅުން އިތުރަށް ބަދަހި ކުރި މި ދަތުުރުފުޅުގައި އެ މަނިކުފާނު ވަނީ އިންޑިއާގެ ބޮޑުވަޒީރު ނަރެންދުރަ މޯދީއާ އިއްޔެ ބައްދަލުކުރައްވައިގަ އެވެ. ދެ ގައުމުގެ ރަސްމީ ވާހަކަތައް ބާއްވައި އަދި މުހިންމު އެއްބަސްވުންތަކެއްގައި ސޮއިކުރެއްވި ވެސް މެ އެެވެ.