ނުހައްގު ގޯތީގެ މައްސަލާގައި އެމްޑަބްލިއުއެސްސީން ފަޒީލް ސަސްޕެންޑްކޮށްފި

ބިންވެރިޔާ ސްކީމްގެ ތެރެއިން ނުލިބޭ ގޯއްޗަކާ ގުޅޭ ރަޖިސްޓްރީއެއް ހަދައި، އެ ހުށަހެޅި މައްސަލާގައި ފުލުހުން ފަށާފައިވާ ތަހުގީގާ ގުޅިގެން އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު އެ ކުންފުނިން މިއަދުން ފެށިގެން ސަސްޕެންޑްކޮށްފި އެވެ.

އެމްޑަބްލިއުއެސްސީން ބުނީ ހުރިހާ ޒިންމާތަކަކުން ވަކިކޮށް އޮފީހަށް ނުނިކުމެވޭ ގޮތަށް ފަޒީލް ސަސްޕެންޑް ކުރީ ފުލުހުން ފެށި ތަހުގީގަށް ޖާގަދިނުމުގެ ގޮތުން ކަމަށެވެ. އޭނާ ސަސްޕެންޑް ކުރަން ނިންމީ ކުންފުނީގެ ބޯޑުންނެވެ.

އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު ފަޒީލަކީ ހުޅުމާލެ އިން ގޯތި ލިބޭ މީހުންގެ ލިސްޓުގައި ކުރިން ހިމެނިފައި ނެތް އަދި ގޯއްޗަށް ޝަރުތު ހަމަވާ މީހެއް ވެސް ނޫން ކަމަށް އޮތީ ކަނޑައަޅައިފަ އެވެ. އެކަމަކު އޭނާ އަށް ގޯތި ލިބިފައިވާ ކަމަށް ބުނާ ރަޖިސްޓްރީއާ އެކު، އެ ބިމުގެ ވަށާފާރު ރޭނުމުގެ ހުއްދައަކަށް އެޗްޑީސީގައި އޭނާ އެދުނީ އެވެ.

ފަޒީލް އެ ހުއްދަ އަށް އެދުނީ ޖޫން 30، 2024 ގަ އެވެ. އެހެންވެ، އެޗްޑީސީން އަމަލުކުރާ އުސޫލުން އެ ގޯތީގެ ރެޖިސްޓްރީ ވެރިފައި ކުރުމަށް ހައުސިން މިނިސްޓްރީ އަށް ފޮނުވި އެވެ. އިތުރު މީހަކު ވެސް ގޯތީގެ ވަށާފާރު ރޭނުމުގެ ހުއްދައަށް އެދިފައި އޮތުމުން އެ ވެސް ހައުސިން މިނިސްޓްރީ މެދުވެރިކޮށް އެކަން ސާފުކުރަން ފޮނުވި އެވެ.

Fazeel ah goathi haggu noonas vashaafaaru huree raanaafai!

The most trusted news source in the Maldives

Mihaaru

ފަޒީލްގެ އިތުރުން ދެން ހުއްދައަށް އެދިފައި އޮތީ އަބްދުލްމަޖީދު މާހިރު ކިޔާ މީހެކެވެ. ބިންވެރިޔާ ސްކީމުން ގޯތި ލިބެނީ މާލޭ މީހުންނަށް ކަމަށް ވިޔަސް އެއީ ހއ. ދިއްދޫގައި ރަޖިސްޓަރީ އޮތް މީހެކެވެ.

ހައުސިން މިނިސްޓްރީން މި އަހަރުގެ އޯގަސްޓް 15 ގައި އެޗްޑީސީގެ ސިޓީއަށް ދިން ޖަވާބުގައި އޮތީ އެއީ ބިންވެރިޔާ ލިސްޓުގައި ހިމެނޭ ބައެއް ނޫން ކަމަށާއި އެ ދެ ގޯއްޗަކީ އެއްވެސް މީހަކަށް ދީފައި އޮތް ދެ ގޯތި ނޫން ކަމަށެވެ.

ހައުސިން މިނިސްޓްރީން އެ ޖަވާބު ދިންތާ ފަސް މަސް ފަހުން އިއްޔެ އެ ލިޔުންތައް ސޯޝަލް މީޑިއާގައި އާންމުވެ، ޝަކުވާ ބޮޑުވުމުން ފުލުހުން ވަނީ އެ މައްސަލަ ތަހުގީގު ކުރަން ފަށައިފަ އެވެ. ތަހުގީގާ ގުޅިގެން އެޗްޑީސީގެ މެނޭޖިން ޑިރެކްޓަރު ފަޒުލް އާއި ބޯޑު އެއްކޮށް މިއަދު ވަނީ ސަސްޕެންޑް ވެސް ކޮށްފަ އެވެ. ބޯޑުން ސަސްޕެންޑް ނުކުރަނީ މިދިޔަ މަހުގެ ހަ ވަނަ ދުވަހު އެޗްޑީސީގެ ޗެއާމަނަކަށް ހަމަޖެއްސި އަހުމަދު ނާސިފް (ޑީޑީ) އެކަންޏެވެ.

ފަޒީލްގެ ނަން ބިންވެރިޔާ ސްކީމްގެ ގޯތީގެ ރަޖިސްޓްރީގައި ނެތްކަން އަންގާފައިވީ ނަމަވެސް ގޯތީގެ ވަށާފާރު ހުރީ ރާނާފައި - ފޮޓޯ: މިހާރު

އެ ތަހުގީގު ފެށިއިރު، މައްސަލަ ބޮޑުވެފައިވާ ގޯތީގެ ވަށާފާރު ހުރީ ރާނަން ފަށައިފަ އެވެ. ގާތްގަނޑަކަށް ހަތަރު ފޫޓެއްހާ އުސްމިނަށް ވަނީ ވަށައިގެން ފާރު ރާނައިފަ އެވެ. އެ މަސައްކަތް ކޮށްފައި ވަނީ ވަރަށް ފަހުންކަން އެނގެ އެވެ. ރޭނުމަށް ބޭނުންވާ ބައެއް ސާމާނު ވެސް ގޯތިތެރޭގައި އެބަހުއްޓެވެ.

އެ ގޯއްޗަކީ އެއްވެސް މީހެއްގެ ތަނެއް ނޫން ކަމަށް ހައުސިން އިން އަންގާފައި ވަނިކޮށް އެތަން ރާނާފައިވަނީ އެޗްޑީސީން ހުއްދަ ދީގެން ކަމެއް ނުވަތަ ހުއްދަ ނުދެނީސް ކަމެއް ނޭނގެ އެވެ. އެކަމާ ގުޅޭ ގޮތުން އެޗްޑީސީގެ ބަހެއް ނުލިބުނެވެ. އަދި ރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވެސް އެ ސުވާލަށް ޖަވާބެއް ނުދެއްވި އެވެ. ނަމަވެސް އެތަނުގައި ފާރެއް ރާނާފައި ނުހުންނާނެ ކަމަށް ފަޒުލް ރޭ ވިދާޅުވެފައިވެ އެވެ.