ފަޒީލްގެ ބިމެއް މާލޭގައި އޮވޭ، މިހާރު ވަނީ އެއްބައި އަނބިމީހާއަށް ހިބަކޮށްދީފައި

ހައްގު ނޫން ގޮތުގައި ހުޅުމާލޭން ގޯއްޗެއް ހޯދައި އެތަނުގައި ވަށައިފާރު ރޭނި ކަމުގެ ތުހުމަތުވާ، އެމްޑަބްލިއުއެއްސީގެ ޑެޕިއުޓީ މެނޭޖިން ޑިރެކްޓަރު ފަޒީލް ރަޝީދުގެ ނަމުގައި މާލޭގައި ބިމެއް އޮތް ކަމާއި އެ ބިމުގެ ބައެއް މިހާރު ވަނީ އަނބިމީހާއަށް ހިބަކޮށްދީފައިކަން ހާމަވެއްޖެ އެވެ.

އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ ފަޒީލް އަށް ވަނީ އެ ދެ ބޭފުޅުންގެ ބައްޕަގެ ތަރިކައިން މ. ޒޭވަރުގެއިން ބައެއް ލިބިފަ އެވެ. ސިވިލް ކޯޓުގެ ހުކުމްގެ އެނގޭ ގޮތުގައި 2،000 އަކަފޫޓްގެ އެ ގޯތި ބަހާފައިވަނީ އަށް ބަޔަށެވެ.

ތަރިކަ އިން ފަޒީލަށް ލިބުނު ބިމުގެ އިތުރުން، އޭނާގެ މަންމަ ވަނީ ޒޭވަރުގޭގެ އެއް ބައި ފަޒީލަށް ހިބަކޮށްދީފައި ކަން ވެސް ސިވިލް ކޯޓުގެ ހުކުމުން އެނގެ އެވެ. އޭގެފަހުން ފަޒީލް ވަނީ ތަރިކައިން އޭނާއަށް ލިބިފައި އޮތް ބައިގެ ދެބައިކުޅަ އެއް ބައި އަނބިމީހާއަށް ހިބަކޮށްދޭން ސިވިލް ކޯޓަށް ހުށަހަޅައިފަ އެވެ.

މިދިޔަ އޮކްޓޯބަރު މަހު ސިވިލް ކޯޓުން ވަނީ ފަޒީލް އެދުނު ގޮތަށް އަނބިމީހާއަށް އެ ބިން ހިބަކޮށްދީ، އޭނާގެ ނަން މައްޗަށް ބަދަލުކޮށްފަ އެވެ.

މި މުއާމަލާތް ކޯޓު މެދުވެރިކޮށް ފަޒީލް ހިންގާފައިވަނީ ހުޅުމާލޭގެ ގޯތީގެ ވަށައިފާރު ރާނަން އެޗްޑީސީއަށް ޕޯޓަލް މެދުވެރިކޮށް ހުށަހެޅުމަށް ފަހު ކަން ތާރީހުތަކުން އެނގެ އެވެ.

ކުރީ ސަރުކާރުން މާލޭގެ ރައްޔިތުންނަށް ގޯތި ދޫކުރަން ހުޅުވާލި ބިންވެރިޔާ ސްކީމަށް އެދި ހުށަހެޅުމުގެ ޝަރުތުތަކުގެ ތެރޭ މާލޭ ސަރަހައްދުގައި އަމިއްލަ ނަމުގައި 600 އަކަފޫޓަށްވުރެ ބޮޑު ތަނެއް ނެތުން ހިމެނެ އެވެ. އަދި 600 އަކަފޫޓަށްވުރެ ބޮޑުތަނެއް ރަޖިސްޓްރީވެފައިވާ ނަމަ، އެތަނެއް ދޫކޮށްލަން އެއްބަސްވުމަކީ ވެސް ޝަރުތެކެވެ.

އަސާސީ ބޯހިޔާވަހިކަމުގެ ސްކީމަކުން އެއްވެސް ބޯހިޔާވަހިކަމެއް ލިބިފައިވާ މީހެއްކަމުގައި ނުވުމާއި ބަންޑާރަ ގޯއްޗަކުން ބަހައިގެން ވާރުތައިން ލިބެން އޮންނަ ތަނެއް ދޫކޮށްލަން އެއްބަސްވުމަކީ ވެސް ސްކީމްގެ ޝަރުތެކެވެ. މީގެއިތުރުން އަމިއްލަ ނަމުގައި އޮތް ބަންޑާރަ ގޯއްޗެއް އެހެން ފަރާތަކަށް ދީފައި ނުވަތަ ވިއްކާލާފައި އޮވެގެން ނުވާނެ ކަމަށް ވެސް ސްކީމްގެ ޝަރުތަކުގައި އޮވެ އެވެ.

އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު ފަޒީލަކީ ހުޅުމާލެ އިން ގޯތި ލިބޭ މީހުންގެ ލިސްޓުގައި ކުރިން ހިމެނިފައި ނެތް އަދި ގޯއްޗަށް ޝަރުތު ހަމަވާ މީހެއް ވެސް ނޫން ކަމަށް އޮތީ ކަނޑައަޅައިފަ އެވެ. އެކަމަކު އޭނާ އަށް ގޯތި ލިބިފައިވާ ކަމަށް ބުނާ ރަޖިސްޓްރީއާ އެކު، އެ ބިމުގެ ވަށައިފާރު ރޭނުމުގެ ހުއްދައަކަށް އެޗްޑީސީގައި އޭނާ އެދުނެވެ.

ފަޒީލް އެ ހުއްދަ އަށް އެދުނީ ޖޫން 30، 2024 ގަ އެވެ. އެހެންވެ، އެޗްޑީސީން އަމަލުކުރާ އުސޫލުން އެ ގޯތީގެ ރެޖިސްޓްރީ ވެރިފައި ކުރުމަށް ހައުސިން މިނިސްޓްރީ އަށް ފޮނުވި އެވެ. އިތުރު މީހަކު ވެސް ގޯތީގެ ވަށައިފާރު ރޭނުމުގެ ހުއްދައަށް އެދިފައި އޮތުމުން އެ ވެސް ހައުސިން މިނިސްޓްރީ މެދުވެރިކޮށް ސާފުކުރަން ފޮނުވި އެވެ.

ފަޒީލްގެ އިތުރުން ދެން ހުއްދައަށް އެދިފައި އޮތީ އަބްދުލްމަޖީދު މާހިރު ކިޔާ މީހެކެވެ. ބިންވެރިޔާ ސްކީމުން ގޯތި ލިބެނީ މާލޭ މީހުންނަށް ކަމަށް ވިޔަސް އެއީ ހއ. ދިއްދޫގައި ރަޖިސްޓްރީ އޮތް މީހެކެވެ.

ހައުސިން މިނިސްޓްރީން މި އަހަރުގެ އޯގަސްޓް 15 ގައި އެޗްޑީސީގެ ސިޓީއަށް ދިން ޖަވާބުގައި އޮތީ އެއީ ބިންވެރިޔާ ލިސްޓުގައި ހިމެނޭ ބައެއް ނޫން ކަމަށާއި އެ ދެ ގޯއްޗަކީ އެއްވެސް މީހަކަށް ދީފައި އޮތް ދެ ގޯތި ނޫން ކަމަށެވެ.

ހައުސިން މިނިސްޓްރީން އެ ޖަވާބު ދިންތާ ފަސް މަސް ފަހުން އެ ލިޔުންތައް ސޯޝަލް މީޑިއާގައި އާންމުވެ، ޝަކުވާ ބޮޑުވުމުން ފުލުހުން ވަނީ އެ މައްސަލަ ތަހުގީގު ކުރަން ފަށައިފަ އެވެ. ތަހުގީގާ ގުޅިގެން އެޗްޑީސީގެ މެނޭޖިން ޑިރެކްޓަރު ފަޒުލް އާއި ބޯޑު އެއްކޮށް ވަނީ ސަސްޕެންޑް ވެސް ކޮށްފަ އެވެ.

ފުލުހުންގެ ތަހުގީގުގައި ފަޒީލް ބުނެފައިވަނީ އޭނާއަށް ލިޔުން ދިނީ ކުރީ ސަރުކާރުން ކަމަށާއި އެކަމަށްޓަކައި އޭރު ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާ ބައްދަލު ވެސް ކުރެއްވި އެވެ. ނަމަވެސް، އަކްރަމް ވަނީ ފަޒީލްއާ ދުވަހަކު ވެސް ބައްދަލުނުވާ ކަމަށާއި މުއާމަލާތެއް ވެސް ކޮށްފައި ނުވާނެ ކަމަށް ވިދާޅުވެފަ އެވެ.

ފޯޖަރީގެ މައްސަލަ ތަހުގީގު ކުރަމުންދާއިރު، ފަޒީލް ވެސް ހުރީ ސަސްޕެންޝަންގަ އެވެ. އަދި ފަޒުލްއާ އެކު ފަޒީލްގެ ޕާސްޕޯޓް ވެސް ވަނީ ހިފަހައްޓައިފަ އެވެ.