ޔޫކޭގައި ވަގަށްނެގި ރަން ފާހާނާތަށި ނުފެނުނު

އިނގިރޭސި ވިލާތުގައި މީގެ ފަސް އަހަރު ކުރިން ބޭއްވި އެގްޒިބިޝަނެއްގައި ދައްކާލަން ބެހެއްޓި 2.9 މިލިއަން ޕައުންޑުގެ ރަން ފާހާނާ ތަށި އަދިވެސް ނުފެންނަ ކަމަށް، މި ވަގަށް ނެގި ކަމުގެ ތުހުމަތުވާ މީހުންގެ މައްޗަށް ހުށަހެޅި ދައުވާގެ ލިޔުންތަކުގައި ބުނެފި އެވެ.

ހަމަ އާދައިގެ ފާހާނާ ތައްޓެއް ގޮތަށް ބަރާބަރަށް މަސައްކަތްކުރާ ގޮތަށް ހަދައި، "އެމެރިކާ" ގެ ނަން ދީފައިވާ އެ ފާހާނާ ތައްޓަކީ 18 ކަރެޓް ރަނުން ހަދާފައިވާ އެއްޗެކެވެ. އޮކްސްފޯޑް ކައިރީގައި އޮންނަ ވުޑްސްޓޮކްގެ ބްލެންހައިމް ޕެލަސް އިން އެ ވަގަށް ނެގީ އެގްޒިބިޝަނަށް ދާ މީހުންނަށް އެ ބޭނުން ވެސް ކުރެވޭ ގޮތަށް ބަހައްޓާފައި ހުއްޓަ އެވެ.

މި ފާހާނާ ތައްޓަކީ 18 ވަނަ ގަރުނުގެ ތެރޭ، ބޮޑުވަޒީރު ވިންސްޓަން ޗާޗިލްގެ އުފަން ރަށް އަދި ޑިއުކްސް އޮފް މާލްބަރޯ އުޅުއްވި ތަނުގައި އިޓަލީގެ އާޓިސްޓެއް ކަމަށްވާ މައުރީޒިއޯ ކެޓެލަން ބޭއްވި އެގްޒިބިޝަނެއްގައި ބެހެއްޓި އެންމެ ޝައުގުވެރި އުފެއްދުން ކަމަށްވި އެވެ.

އެ ވަގަށް ނެގިކަމުގެ ތުހުމަތުވާ އުމުރުން 39 އަހަރުގެ މައިކަލް ޖޯންސް ވަނީ އެކަމަށް އިންކާރުކޮށްފަ އެވެ. ދައުވާ ލިބޭ އިތުރު ދެ މީހުން ކަމަށްވާ ފްރެޑްރިކް ސައިންސް އާއި ބޯރާ ގުކޫކް ވެސް ވަނީ ކުށް ކޮށްގެން ހޯދާފައިވާ މުދާ ލިބިގަތް ކަމުގެ ދައުވާއަށް އިންކާރުކޮށްފަ އެވެ. ދައުވާ ލިބޭ ހަތަރު ވަނަ މީހާ ކަމަށްވާ ޖޭމްސް ޝީން މީގެ ކުރިން ވަނީ ވައްކަމުގެ ކުށަށް އިއުތިރާފުވެފަ އެވެ.

ޕްރޮސެކިއުޓަރު ޖޫލިއަން ކްރިސްޓޯފާ ކޯޓުގައި ވިދާޅުވީ މި ވައްކަމަށް ހޭދަވީ އެންމެ ފަސް މިނެޓު ކަމަށާއި އެކަން ކުރި މީހުން ދިޔައީ ބޮޑެތި މަރުތެޔޮތައް އެތަނަށް ދޫކޮށްލާފައި ކަމަށެވެ.

"އެއީ އޭރު މި ސަރަހައްދުގެ އަގަށް ބަލާއިރު 2.8 މިލިއަން ޕައުންޑް (3.5 މިލިއަން ޑޮލަރު) ގެ ރަނުން ހަދާފައިވާ އެއްޗެއް... އަދި ހަ މިލިއަން ޑޮލަރަށް ވަނީ އިންޝުއަކޮށްފައި."

އޭނާ ވިދާޅުވީ އެ ތަށި އަދިވެސް ނުފެންނަ ކަމަށާއި ބެލެވޭ ގޮތުގައި އެ ވަނީ ކުދިކުދިކޮށްލައިފަ އެވެ. -- އޭއެފްޕީ