ރާއްޖޭގައި ކޮޅުވެއްޓި، ޓަގާއި ބާޖު ދުއްވަނީ ޝަރުތު ހަމަނުވާ ކެޕްޓަނުން: ޓްރާންސްޕޯޓް

ރާއްޖޭގައި ކޮޅުވެއްޓި އާއި ބާޖު އަދި ޓަގްތައް އޮޕަރޭޓް ކުރުމުގައި ހަރަކާތްތެރިވަނީ އެ މަސައްކަތުގެ ކެޕޭސިޓީ ނުވަތަ ޝަރުތު ހަމަނުވާ ކެޕްޓަނުން ކަން ފާހަގަކުރެވޭ ކަމަަށް ޓްރާންސްޕޯޓް މިނިސްޓްރީން މިއަދު ބުނެފި އެވެ.

އެކަމަކު، އެ މީހުންނާ މެދު ފިޔަވަޅު އަޅާނެ ކަމެއް ނުވަތަ ދެން އަމަލު ކުރާނެ ގޮތެއް އެ މިނިސްޓްރީން މިއަދު ނެރުނު އިއުލާނުގައި ނެތެވެ.

ކޮޅުވެއްޓި އާއި ބާޖާއި ޓަގް އޮޕަރޭޓް ކުރާ ކެޕްޓަނުންނާ ގުޅޭ ގޮތުން ކަންބޮޑުވުން ފާޅުކޮށް ޓްރާންސްޕޯޓް މިނިސްޓްރީން އިއުލާނެއް ނެރުނީ، މާލޭގެ ވިޔަފާރި ބަނދަރުގައި އޮތް އާގުބޯޓަކުން މި މަހުގެ ދެ ވަނަ ދުވަހު ބޭލި ދެ އެކްސްކަވޭޓަރެއް އެރުވި ކޮޅުވެއްޓިއެއް ބަންޑުންޖަހާލައި ދެ މީހަކު މަރުވި މައްސަލަ ހޫނުވެފައި ވަނިކޮށެވެ.

އެ ހާދިސާ ހިނގި ގޮތުގެ އެތެރޭގެ ތަހުގީގެއް އެމްޕީއެލުން ކޮށް، އޭގެ ވަގުތީ ނަތީޖާ މިއަދު ވަނީ ނެރެފަ އެވެ. އެ ތަހުގީގުގެ ހޯދުންތަކާ ހަވާލާދީ، އެމްޕީއެލުން ބުނީ، ކޮޅުވެއްޓިގެ ކެޕްޓަނަކަށް ހުރީ އެފަދަ އުޅަނދު ދުއްވުމުގެ ލައިސަންސް ނެތް މީހެއް ކަމަށާއި އެ އުޅަނދު ބަންޑުންޖަހާލީ އޭނާ އެދިގެން އެކްސްކަވޭޓަރެއް އެއްފަރާތަކަށް ޖެއްސުމުން ކަމަށެވެ.

އެމްޕީއެލްގެ ބަނދަރު ކައިރިން ބަންޑުންޖަހާލި ކޮޅުވެއްޓި ދުއްވުމަށް 100 ގްރޮސް ޓަނޭޖަށް ވުރެ މަތީ އުޅަނދު ދުއްވުމުގެ ކެޓަގަރީގެ ލައިސަންސް އޮންނަން ޖެހޭ ކަމަށް އެމްޕީއެލުން ބުނެ އެވެ. އެކަމަކު، ޓްރާންސްޕޯޓް މިނިސްޓްރީއާ ހަވާލާދީ، އެމްޕީއެލުން ބުނިި ގޮތުގައި އެ އުޅަނދު ދުއްވި ކެޕްޓަންގެ އަތުގައި އެ ކެޓަގަރީގެ ލައިސަންސެއް ނެތެވެ.

އެއީ މި އަހަރުގެ ތެރޭގައި ހިނގި ތިން ވަނަ ހާދިސާ ކަމަށް ވާއިރު، އެ އިން ކޮންމެ ހާދިސާއެއްގައި ބައެއްގެ ފުރާނަ ވަނީ ގެއްލިފަ އެވެ. އެކަމަކު، އޭގެ ސީރިއަސްކަން މިހާތަނަށް ސަރުކާރުގެ ކަމާ ބެހޭ ފަރާތްތަކުގެ މެދުގައި ނެތް މައްސަލާގައި "މިހާރު" އިން މިއަދު ރިޕޯޓެއް ލިޔެފައި ވަނިކޮށް އެމްޕީއެލްގެ އިތުރުން ޓްރާންސްޕޯޓް މިނިސްޓްރީން ވެސް ވަނީ މީޑިއާ ސްޓޭޓްމަންޓެއް ފަހުން ނެރެފަ އެވެ.

އެ މިނިސްޓްރީގެ އިއުލާނުގައި ބުނީ، ރާއްޖޭގެ ކަނޑުގެ ސަރަހައްދުގައި ދުއްވާ ދަގަނޑު ނުވަތަ މައުދަނުން ބަނދެފައިވާ ކޮޅުވެއްޓި އާއި ޓަގާއި ބާޖު އޮޕަރޭޓް ކުރާއިރު ގަވާއިދާ އެއްގޮތަށް އަމަލު ނުކުރުމުގެ ސަބަބުން ނުރައްކާތެރި ގިނަ ހާދިސާތައް ވަނީ ހިނގާފައި ކަމަށެވެ. އެހެންވެ، މިނިސްޓްރީން ބެލި ބެލުމުގައި ފާހަގަވީ، ލޭންޑިންކްރާފްޓާއި ބާޖާއި ޓަގު އޮޕަރޭޓް ކުރަނީ ކެޕޭސިޓީ ނެތް ކެޕްޓަނުން ކަމެވެ.

އެހެންވެ، ޓްރާންސްޕޯޓް މިނިސްޓްރީން ވަނީ ދަގަނޑު ނުވަތަ މައުދަނުން ބަނދެފައިވާ އުޅަނދުފަހަރުގައި ކެޕްޓަނުންގެ ގޮތުގައި ހަރަކާތްތެރިވެވޭނެ މީހުންގެ ޝަރުތުތައް އެ ކަމާ ގުޅޭ ގަވާއިދާ ހަވާލާދީ ހަނދާން ކޮށްދީފަ އެވެ. އެއީ ކަނޑުދަތުރުކުރާ އުޅަނދުފަހަރަށް މުދާ ބަރު ކުރުމާއި މުދާ އުފުލުމާ ގުޅޭ ގަވާއިދެވެ. އެ ގަވާއިދުގައިވާ ގޮތުން:

● ދަގަނޑު ނުވަތަ މައުދަނުން ބަނދެފައިވާ އުޅަނދުފަހަރުގެ ތެރެއިން 100 ގްރޮސްޓަނުން ފެށިގެން ބޮޑެތި އުޅަނދުފަހަރުގެ ކެޕްޓަނުންގެ ގޮތުގައި ތިބެވޭނީ ސެޓްފިކެޓް އޮފް ކޮމްޕީޓެންސީ 3،000 ގްރޮސްޓަނުގެ ކެޕްޓަނުންނަށް.

● ދަގަނޑު ނުވަތަ މައުދަނުން ބަނދެފައިވާ 24 މީޓަރަށް ވުރެ ދިގު ނުވަތަ 100 ގްރޮސް ޓަނޭޖާ ހަމައަށް ހުންނަ އުޅަނދުފަހަރުގެ ކެޕްޓަނުންގެ ގޮތުގައި ތިބެވޭނީ ނިޔަމި ކަމުގެ ސަނަދު އޮތް އަދި އެ އުޅަނދެއްގެ ގްރޮސް ޓަނޭޖާ އެކަށީގެންވާ ކެޕޭސިޓީގެ ޓަނޭޖުގެ ހުއްދަ ލިބިފައިވާ ކެޕްޓަނުންނަށް.

ކޮޅުވެއްޓި އާއި ބާޖު އަދި ޓަގްތައް ދުއްވަނިކޮށް އެކްސިޑެންޓުތައް އިތުރުވެފައިވާ މި ދަނޑިވަޅުގައި ޓްރާންސްޕޯޓް މިނިސްޓްރީން މިއަދު ކުރި އިއުލާނުގައި ވަނީ އެ ތަކެތީގެ ސައިޒަށް ބަލައިގެން މުދާ ބަރުކުރުމަށް އިލްތިމާސްކޮށްފަ އެވެ.

"ދިވެހިރާއްޖޭގެ ކަނޑުގެ ސަރަހައްދުގައި ދުއްވާ އަދި އޮޕަރޭޓް ކުރާ މަތީގައި ދަންނަވާފައިވާ ސައިޒުތަކުގެ އުޅަނދުފަހަރުގައި މި ދެންނެވި ކެޕޭސިޓީގެ ކެޕްޓަނުން އެ އުޅަނދުފަހަރު ދުއްވައި އަދި އޮޕަރޭޓް ކުރުމަށާއި އުޅަނދުފަހަރު ބަރުކުރުމުގައި ސްޓެބިލިޓީ ނުގެއްލޭ ގޮތަށް ބަރުކުރުމާ އެކު، މުދާ ރަނގަޅަށް ލޭޝް ކޮށްގެން ދަތުރުކުރަށް ފެށުމަށް ސަމާލުކަން ދިނުމަށް އާންމުކޮށް އަންގާ އިއުލާން ކުރަމެވެ،" މިނިސްޓްރީގެ އިއުލާނުގައި ބުންޏެވެ.

މި މަހުގެ ދެ ވަނަ ދުވަހުގެ ރޭ އެމްޕީއެލް ކައިރިން ބަންޑުންޖަހާލި ކޮޅުވެއްޓި އާއި އޭގެ ކެޕްޓަނާ ގުޅޭ ގިނަ މައްސަކަތަކެއް އެ ކުންފުނީގެ ތަހުގީގުގައި ވަނީ ފާހަގަކޮށްފަ އެވެ. އޭގެ ތެރޭގައި ކޮޅުވެއްޓީގެ ކެޕްޓަންގެ އަތުގައި މިފަދަ އުޅަނދެއް ދުއްވުމުގެ ލައިސަންސާއި ނިޔަމިކަމުގެ ސެޓްފިކެޓް ނެތުން ހިމެނެ އެވެ.

އެ ކޮޅުވެއްޓީގެ ސަލާމަތާއި އެހެނިހެން ކަންތައްތައް ގަވާއިދަށް ފެތުނަސް، މުދާ ބަރުކުރާ ޑެކްގައި ލަކުޑި އަޅާފައި ނެތް ކަމަށް އެމްޕީއެލުން ބުންޏެވެ.

"އަދި ދަގަނޑު ޑެކެއް އޮތުމުން މިފަދަ ތަކެތި ބަރުކުރުމާއި އެ މުދާ ބަރުކޮށްގެން ދަތުރުކުރާއިރު، ކަހާލުމުގެ ފުރުސަތު އޮތް. އެއީ ލޭންޑިން ކްރާފްޓްގެ ސްޓެބިލިޓީ ގެއްލިދާނެ ކަމެއް،" އެމްޕީއެލުން ބުންޏެވެ.