ރާއްޖޭގެ ދެ ސަރަހައްދެއް ފިޔަވައި ހުރިހާ ސަރަހައްދެއްގައި މޯލްޑިވްސް ޓްރާންސްޕޯޓް ކޮންޓްރެކްޓިން ކޮމްޕެނީ (އެމްޓީސީސީ) އިން ފެރީގެ ހިދުމަތް ދިނުމަށް ތައްޔާރުވެއްޖެ އެވެ.
އިކޮނޮމިކް މިނިސްޓްރީގައި މިއަދު ބޭއްވި ރަސްމިއްޔާތެއްގައި، ފެރީގެ ހިދުމަތުގެ އިތުރުން ރާއްޖޭގެ ގިނަ ސަރަހައްދުތަކުގައި އާންމު ބަހުގެ ހިދުމަތާއި ސްކޫލް ބަހުގެ ހިދުމަތް ދިނުމަށް އެމްޓީސީސީއާ ވަނީ ހަވާލުކޮށްފަ އެވެ. ބަހުގެ ހިދުމަތް ދޭނީ މާލޭގެ އިތުރުން އާބާދީ ބޮޑެތި ބައެއް ރަށްރަށުގަ އެވެ.
މީގެ އިތުރުން ދ. އަތޮޅުގައި ފެރީގެ ހިދުމަތް ދިނުމަށް ބަޔަކާ ވަނީ ހަވާލުކޮށްފަ އެވެ. އަދި އައްޑޫ އާއި ފުވައްމުލަކުގައި މިހާރު ވެސް ފެރީގެ ހިދުމަތް ދެނީ ދެމުންނެވެ.
މި އެއްބަސްވުމުގައި އިކޮނޮމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު މުހައްމަދު ސައީދެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ އިބްރާހިމް ޒިޔަތެވެ.
ނޫސްވެރިންނާ ވާހަކަ ދައްކަވަމުން މިނިސްޓަރު ވިދާޅުވީ ރާއްޖޭގެ އެކިކަންކޮޅުތަކުގައި މީގެ ކުރިން އޮތް ފެރީގެ ނިޒާމަކީ ރައްޔިތުންނަށް ބޮޑު ތަކުލީފެއް ކުރިމަތިވާ ހިދުމަތެއް ކަމަށެވެ.
"މީގެ ކުރިން ރައްޔިތުންނަށް ބޮޑު ތަކުލީފަކަށް ވެފައި އޮތް ހިދުމަތެއް ފެރީގެ ނިޒާމަކީ، ކުރީ ސަރުކާރުތަކުން ނިންމުންތަކެއް ނިންމުމުން ވަރަށް ބޮޑު ހަރަދުތައް ބޮޑުވެ، ދެމެހެއްޓެނިވި ގޮތެއްގައި މިކަން ނުކުރެވިވާ ކަން ފާހަގަކުރެވުނު،" މިނިސްޓަރު ވިދާޅުވި އެވެ.
އެމްޓީސީސީއާ މި ހިދުމަތް ދިނުމަށް ހަވާލު ކުރީ ޒަމާނީ ފެންވަރަށާއި ހަލުވި ދުވެއްޔެއްގައި ހިދުމަތް ދޭން ކަމަށް އޭނާ ވިދާޅުވި އެވެ. އެމްޓީސީސީއަކީ ފެރީގެ ހިދުމަތް ދެވޭނެ އެންމެ ގާބިލް ކުންފުނިކަން ވެސް މިނިސްޓަރުގެ ވާހަކައިގައި ފާހަގަކުރެއްވި އެވެ.
"މީގެ ކުރިން ރައްޔިތުންނަށް ބޮޑު ތަކުލީފަކަށް ވެފައި އޮތް ހިދުމަތެއް ފެރީގެ ނިޒާމަކީ، ކުރީ ސަރުކާރުތަކުން ނިންމުންތަކެއް ނިންމުމުން ވަރަށް ބޮޑު ހަރަދުތައް ބޮޑުވެ، ދެމެހެއްޓެނިވި ގޮތެއްގައި މިކަން ނުކުރެވިވާ ކަން ފާހަގަކުރެވުނު،" މިނިސްޓަރު
ރާއްޖޭގެ ރަށްތަކުގެ ތެރެއިން ބަހުގެ ހިދުމަތް ދޭން އެމްޓީސީސީއާ ހަވާލުކުރީ މާލޭގެ އިތުރުން ހދ.ކުޅުދުއްފުށި، ލ.އަތޮޅު އަދި ގދ.ތިނަދޫގަ އެވެ. މި ހިދުމަތް މިހާރު ދެނީ އައްޑޫ އާއި ފުވައްމުލަކުގެ އިތުރުން ހުޅުމާލޭގަ އެވެ.
އެމްޓީސީސީގެ ސީއީއޯ އިބްރާހިމް ޒިޔަތު ވިދާޅުވީ އެ ކުންފުންޏާ ހަވާލުކުރި ޒިންމާ ފުރިހަމައަށް އަދާކުރުމުގެ ގޮތުން އަންނަ މަހުގެ އެކަކުން ފެށިގެން ފެރީގެ ހިދުމަތް ފަށާނެ ކަމަށެވެ. އަދި ކުރިއަށް އޮތް ތިން މަސް ތެރޭގައި ބަހުގެ ހިދުމަތް ފަށާނެ ކަމަށް ވެސް އޭނާ ވިދާޅުވި އެވެ.
ޒިޔަތު ވިދާޅުވީ ފެރީގެ ހިދުމަތްތައް ވީހާވެސް އަގުހެޔޮކޮށް ދިނުމަށްޓަކައި ބައެއް ސާވޭތައް ހެދި ކަމަށާއި އެގޮތުން ފެރީ ދަތުރު ކުރާނެ ދުރު މިނާ ބަލާފައި ވީހާވެސް ކުޑަ އަގެއް ކަނޑައެޅުމަށް ނިންމާފައިވާ ކަމަށެވެ.
މީގެ ކުރިން މާލޭ ސިޓީ ކައުންސިލާ ގުޅިގެން އެމްވީކޭން އިން ވެސް ބަހުގެ ހިދުމަތް ދިނެވެ. އެކަމަކު ބަސްތައް ބާވުމާއި ގަޑިއަށް ދަތުރުނުކުރުން ފަދަ ގިނަ މައްސަލަތައް ކުރިމަތިވެ އެންމެފަހުން ހިދުމަތް ވަނީ ހުއްޓިފަ އެވެ.