އަޒުހަރުން ފޮނުވި ޓީޗަރުންނާ، އެޑިއުކޭޝަން މިނިސްޓަރު ޑރ. އާއިޝަތު ޝިހާމް މިއަދު ބައްދަލުކުރައްވަނީ.-- ފޮޓޯ: ހުސެއިން ވަހީދު/ މިހާރު
25 ޖެނުއަރީ 2018 - 18:06
4 comments
އަލް އަޒުހަރު ޔުނިވަސިޓީން މި އަހަރު ރާއްޖެ ފޮނުވި 14 ޓީޗަރުންނާ، އެޑިއުކޭޝަން މިނިސްޓަރު ޑރ. އާއިޝަތު ޝިހާމް މިއަދު ބައްދަލުކުރައްވައިފި އެވެ.
އެ މިނިސްޓްރީގައި ބޭއްވި މި ބައްދަލުވުމުގައި މިނިސްޓަރު ވަނީ ރާއްޖޭގައި އަރަބި އިސްލާމީ ތައުލީމް ފުޅާކުރުމުގައި އަޒްހަރު ޔުނިވަސިޓީގެ ހިއްސާ ވަރަށް ބޮޑު ކަން ފާހަގަކުރައްވައިފަ އެވެ. އަދި ރާއްޖެއަށް އަލުން ޓީޗަރުން ފޮނުވަން ނިންމުމުން، އެ ޔުނިވަސިޓީގެ އިސް ބޭފުޅުންނަށް ޝުކުރު އަދާކުރެއްވި އެވެ
ރާއްޖޭގައި އަރަބި ތައުލީމް އުނގަންނައި ދިނުމަށް މީގެ 31 އަހަރު ކުރިން އަރަބިއްޔާ ސްކޫލު އުފެއްދި ފަހުން، ކޮންމެ އަހަރަކު ވެސް އަޒުހަރުން ޓީޗަރުން ފޮނުވަ އެވެ. އަދި މި އަހަރު ޓީޗަރުން ފޮނުވަން އަޒުހަރުން އަލުން މި ނިންމީ، ދިމާވި މައްސަަލައަކާ ގުޅިގެން ރާއްޖެ އަށް ދެން އިތުރަށް އަޒުހަރުން ޓީޗަރުން ނުފޮނުވަން އެ ޔުނިވަސިޓީން ނިންމުމަށް ފަހު އެވެ. ނަމަވެސް ޝައިހުލް އަޒްހަރު ފަހުން ވަނީ އެ ނިންމުން ބަދަލުކުރައްވައިފަ އެވެ.
އަޒުހަރުން މިއަހަރު ރާއްޖެ ފޮނުވި ބައެއް ޓީޗަރުންނާ،.-- ފޮޓޯ: ހުސެއިން ވަހީދު/ މިހާރު
މިދިޔަ އަހަރު ރާއްޖޭގައި ކިޔަވައި ދިނުމަށް ފަހު އެނބުރި މިސްރަށް ދިއުމުން، އަޒްހަރުން އެ ޓީޗަރުންނާ ބައްދަލުކޮށް، ދެން އިތުރަށް ރާއްޖެ އަށް ޓީޗަރުން ނުފޮނުވަން ނިންމި ކަން އެންގި އެވެ. އެއީ، އެ ޓީޗަރުން ބުނެފައިވާ ގޮތުގައި، މިިދިޔަ އަހަރުގެ ކިޔެވުން ފެށުނު ފަހުން ރާއްޖެ އައި ޓީޗަރުންތަކެއް ރާއްޖެ އެތެރެވިޔަ ނުދީ 12 ވަރަކަށް ގަޑިއިރު އެއާޕޯޓުގައި ބައި ތިއްބުމަށް ފަހު އެނބުރި މިސްރަށް ފޮނުވާލުމުން އެކަމާ އަޒްހަރުން ހިތްހަމަ ނުޖެހިގެންނެވެ.
މިއަދުގެ ބައްދަލުވުމުގައި ވާހަކަ ދައްކަވަމުން އެ ޓީޗަރުން ވަނީ ރާއްޖޭގައި އިސްލާމީ ތައުލީމް ފޯރުކޮށްދިނުމުގައި ދެމިތިއްބަވާނެ ކަމަށް ވިދާޅުވެފަ އެވެ. އަދި އެ މީހުން އަނބުރާ ރާއްޖެ ގެނައުމަށް ސަރުކާރުން ގިނަ މަސައްކަތްތަކެއް ކުރިކަން ފާހަގަކުރެއްވި އެވެ.
އަޒުހަރުން ފޮނުވި ޓީޗަރުންނާ، އެޑިއުކޭޝަން މިނިސްޓަރު ޑރ. އާއިޝަތު ޝިހާމް ބައްދަލުކުރެއްވުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަނީ.-- ފޮޓޯ: ހުސެއިން ވަހީދު/ މިހާރު
ސަރުކާރުގެ ތައުލީމީ ސިޔާސަތުގެ ތެރެއިންް، ރާއްޖޭގެ އުތުރާއި ދެކުނުގައި އަރަބި މީޑިއަމްގެ ސްކޫލް ގާއިމްކޮށް، ތައުލީމް ދެމުން ގެންދާ ކަމަށް މިނިސްޓަރު އާއިޝަތު ޝިހާމް މިއަދު ވިދާޅުވި އެވެ. އަދި ރާއްޖޭގެ 65 ސްކޫލެއްގައި 10،000 އަށް ވުރެ ގިނަ ދަރިވަރުން މާއްދާއެއްގެ ގޮތުގައި އަރަބި ކިޔަވަމުން އަންނަ ކަން ވެސް ފާހަގަކުރެއްވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މަފަކީރު
26 January 2018
މިސްރު ޓީޗަރުން އެތެރެވިޔަ ނުދީ ފޮނުވާލުން އަޒްހަރުން ސިފަކުރީ އަޒްހަރަށާ އިސްލާމީ އަރަބި ތަޢުލީމަށާ އިސްލާމީ އުންމަތަށް ދިވެހި ރާއްޖެއިން ވި އިހާނަތެއްގެ ގޮތުގައި. މިފަދަ ކަމެއް ވިޔަ ނުދީ ވޭތޯ ދިވެހި ސަރުކާރު ހޭ އަރަންޖެހޭ.
ތުނިޔަ
26 January 2018
މީނަމަކަށް ކިޔަވަދޭ އަރައްބެއް އިނގޭތޯ! ގްރޭޑް 1ގަ މިދިޔަ އަހަރުވެސް ކިޔަވަދިން...ޓައިމް ޓޭބަލްގަވެސް އޮވޭ އަރަބި، އެކަމަކު އަރަބި ފޮތެއް ފިލާވަޅެއް ލޮލަކަށް ނުފެނޭ،...އަރަބި ޓީޗަރެއްވެސް ހުރޭ، އަހަރު ނިމެން އުޅެނިކޮށް އެއްމެ ފަހުން ބޭއްވި ޕޭރެންޓް މީޓިންގަ ޢަރަބި ޓީޗަރު ކައިރީ އެހިން ކޯއްޗެއްހޭ މީގަ މިކިޔަވަދެނީ؟ އެބޭފުޅާ ވިދާޅުވި އަސްލު މިއީ ވަރަށްބޮޑު އޮޅުވާލުމެކޭ...ކިޔަވަދޭނެ ވަކި އެއްޗެއް މިނިސްޓްރީން ކަނޑައަޅާފައެއްނެތޭ! ޢަރަބީގަ މިކިޔަވަދެނީ އަލިފުބާގެ އަކުރުތަށް...ދެން ޢަރަބިން ބައެއް ޢާއްމު އެއްޗިއްސަށް ކިޔާނަންތަށް..ދެން ކޮންމެވެސް ފޮޓޯއެއްގަ ކުލަޖައްސަން ދީފާނެ..ފޮޓޯގަ ހުރި އެއްޗަކަށް އަރަބިން ކިޔާނަން ތިރީގަ ލިޔެފަ.
އިކޫ
25 January 2018
ކޮން ވާހަކަ އެއް. ސްކޫލް ތަކުގައި ޢަރަބިބަސް ކިޔަވައިދެނީ ނަމަކަށް. ކިޔަވައިދެމޭ ބުނަން. އަޅުގަޑު ދަރި ގްރޭޑް3 އެކަމު ގްރޭޑް 1، 2 ގަ ވެސް ހަމަ ކިޔެވިއެއްޗެހި ކިޔަވަނީ. އަސްލު ހަމަ އަރަބިއްޔާ ނުވަތަ އިންޓަނޭޝަނަލް ސްކޫލް ތައް ނޫނަސް ހުރިހާ ސްކޫލެއްގަ 1ން 10 އަށް ޢަރަބި ކިޔަވައި ނުދޭންވި ސަބަބެއްނެތް. ހުރިހާ ސްކޫލަކަށް ވެސް މިދަނީ ހަމަ މުސްލިމް ކުދިން. ޤުރުއާނާ ޙަދީޘް މަފްހޫމް ވާނީ ރަގަޅަށް ޢަރަބި ބަސް އެގިގެން.
އާން
26 January 2018
ތީދެން މާމައްޗަށް ތިވިސްނަވަނީ "ޤުރުއާނާ ޙަދީޘް މަފްހޫމް ވާނީ ރަގަޅަށް ޢަރަބި ބަސް" މިއީ ހަމައެކަނި ޝަހީމް މެން ފަދަ ބޭބޭފުޅުންނަށް އެކަނި މަފްހޫމް ވާން ޖެހޭނެ އެއްޗެހި، އެކަން ދާންވާނީވެސް އާއިލާއަށާ ދަރިކޮޅަށް ދެމިގެން، ކޮންމެ ކޮންމެ މީހަކު ތިކަމަށް ނުވިސްނަވާ،