ކުއްލި ހާލަތު އިއުލާން ކުރުމާއެކު، ހިލާލީގެ ސަރަހައްދުގައި ފުލުހުންނާއި ސިފައިން ޝީލްޑާއެކު ހަރަކާތްތެރިވަނީ: އެސްއޯއީގެ ދަށުން ގިނަ އަދަދެއްގެ ބަޔަކު ހައްޔަރުކޮށް ދޫނިދޫގައި ބަންދުކޮށްފައި އެބަތިބި. --ފޮޓޯ: ހުސެން ވަހީދު /މިހާރު
18 މާޗް 2018 - 12:05
14 comments
ކުއްލި ނުރައްކަލުގެ ހާލަތުގެ ދަށުން ހައްޔަރުކޮށް ދޫނިދޫގައި ބަންދުކޮށްފައި ތިއްބެވި ސިޔާސީ ބޭފުޅުންނާއި އާއްމުންގެ ބަންދުގެ މުއްދަތު ކްރިމިނަލް ކޯޓުން ޖަހަން ފަށައިފި އެވެ.
ރައީސް އަބްދުﷲ ޔާމީން މިދިޔަ މަހުގެ ފަސް ވަނަ ދުވަހުގެ ރޭ އިއުލާން ކުރައްވައި 45 ދުވަހަށް ދިގުދެންމި ކުއްލި ނުރައްކަލުގެ ހާލަތު، އަންނަ ބުރާސްފަތި ދުވަުގެ ރެ އަށް ހަމަވާނެ އެވެ. އެ މުއްދަތު އިތުރު ކުރުމުގެ ވިސްނުމެއް ނުގެންގުޅޭ ކަމަށް ސަރުކާރުން ވަނީ ބުނެފަ އެވެ. ކުއްލި ނުރައްކަލުގެ ހާލަތުގެ ދަށުން ހައްޔަރު ކޮށްފައި ހުރި އެއްވެސް މީހަކު އިތުރަށް ބަންދު ކޮށްފައި ބެހެއްޓޭނީ، އެ ހާލަތު އުވާލުމަށް ފަހު، ކޯޓުން މުއްދަތު ޖަހައި ދިނުމުންނެވެ.
އެހެންވެ ރެ އިން ފެށިގެން އެ މީހުންގެ ބަންދުގެ މުއްދަތު ވަނީ ޖަހަން ފަށައިފަ އެވެ.
ސިޔާސީ އިދިކޮޅު ބޭފުޅުން ވެސް ހިމެނޭ ގޮތަށް ނުވަ ގައިދީ އަކު ދޫކުރުމަށް ސުޕްރީމް ކޯޓުން އަންގައި މިދިޔަ މަހުގެ 1 ގައި ނެރުނު ހުކުމް ތަންފީޒުކުރަން ގޮވާލި މުޒާހަރާ އިން ހައްޔަރު ކުރި ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފާއި ވެރިކަން ވައްޓާލަން އުޅުނު ކަމުގެ ތުހުމަތުގައި ހައްޔަރު ކުރި ފުލުހުންތަކެއްގެ ބަންދުގެ މުއްދަތު ރޭ ވަނީ ކްރިމިނަލް ކޯޓުން ޖަހައިދީފަ އެވެ. އޭގެ އިތުރުން، އެ ތުހުމަތަށް ހައްޔަރު ކުރި ރައްޔިތުންގެ މަޖިލީހުގެ ދަގެނތީ ދާއިރާގެ މެމްބަރު އިލްހާމް އަހްމަދާއި މައްޗަންގޮޅި ދެކުނު ދާއިރާ އަބްދުﷲ ސިނާންގެ ބަންދުގެ މުއްދަތު މިއަދަށް ވަނީ ޝެޑިއުލްކޮށްފަ އެވެ. އަދި އެ މައްސަލާގައި ހައްޔަރުކުރި، އުއްތަމަ ފަނޑިޔާރު އަބްދުﷲ ސައީދުގެ ޝަރީއަތް ފެށުން މިއަދުގެ މެންދުރު 3:00 އަށް ކްރިމިނަލް ކޯޓުގައި ވަނީ ތާވަލް ކޮށްފަ އެވެ.
ވެރިކަން ވައްޓާލަން އުޅުމުގެ ތުހުމަތުގައި ހައްޔަރުކުރި ސިޔާސީ ބައެއް އިސް ބޭފުޅުންތަކެއް.
ސުޕްރީމް ކޯޓުން މިދިޔަ މަހުގެ ފުރަތަމަ ދުވަހުގެ ރޭ ކުރި ހުކުމް ތަންފީޒު ނުކޮށް، އިއުލާން ކުރި ކުއްލި ނުރައްކަލުގެ ހާލަތުގެ ދަށުން ހައްޔަރު ކުރި ބޭފުޅުންގެ ތެރޭގައި އުއްތަމަ ފަނޑިޔާރާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ އިތުރުން ކުރީގެ ރައީސް މައުމޫން އަބްދުލްގައްޔޫމް ހިމެނެ އެވެ. އޭގެ އިތުރުން ރައްޔިތުން މަޖިލީހުގެ ބައެއް މެމްބަރުންނާއި ކުރީގެ ދެ ޕޮލިސް ކޮމިޝަނަރުން ކަމަށްވާ އަހުމަދު އަރީފާއި އަބްދުﷲ ރިޔާޒާ އެކު ގިނަ އަދަދެއްގެ ބަޔަކު ވަނީ ހައްޔަރުކޮށްފަ އެވެ.
ސިޔާސީ އިދިކޮޅު ބޭފުޅުން ވެސް ހިމެނޭ ގޮތަށް ނުވަ ގައިދީ އަކު ދޫކުރުމަށް ސުޕްރީމް ކޯޓުން އަންގައި މިދިޔަ މަހުގެ 1 ގައި ނެރުނު ހުކުމްގެ އެ ބައި ކުއްލި ނުރައްކަލުގެ ހާލަތު އިއުލާން ކުރުމަށް ފަހު ތިން ފަނޑިޔާރުންގެ އިއްތިފާގުން ވަނީ ބާތިލް ކޮށްފަ އެވެ. އުއްތަމަ ފަނޑިޔާރާއި އަލީ ހަމީދު ހައްޔަރު ކުރުމަށް ފަހު، އެ އަމުރު ބާތިލް ކޮށްފައިވާއިރު، ދެން އެ ނުވަ ގައިދީން ދޫކުރަން ނުޖެހޭނެ ކަމަށް ސަރުކާރުން ބުނެ އެވެ. އެކަމަކު ރާއްޖޭގެ އިދިކޮޅު ފަރާތްތަކުންނާއި ބައިނަލްއަގްވާމީ ބައެއް ޖަމާއަތްތަކުންނާއި ބައެއް ގައުމުތަކުން ސަރުކާރުގެ އެ ވިސްނުމާ ދެކޮޅު ހަދަ އެވެ.
ކުއްލި ނުރައްކަލުގެ ހާލަތުގެ ދަށުން 50 އަށް ވުރެ ގިނަ މީހުން އެބަތިބި ކަމަށް އިދިކޮޅު ފަރާތްތަކުން ބުނެ އެވެ.
ކުއްލި ނުރައްކަލުގެ ހާލަތު ނިމުނަސް، އެ ހާލަތުގެ ދަށުން ހައްޔަރު ކޮށްފައިވާ މީހުން މިނިވަން ނުވާނެ ކަމަށް ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން އިއްޔެ ވަނީ ވިދާޅުވެފަ އެވެ.
ސަރުކާރުން ބުނެފައި ވަނީ، ފެބުރުއަރީ އެއް ވަނަ ދުވަހުގެ ހުކުމަކީ ރިޝްވަތުދީގެން، ސަރުކާރު ވައްޓާލަން ކުރި "ބަޣާވާތެއް" ކަމަށެވެ. ކުއްލި ނުރައްކަލުގެ ހާލަތު އިއުލާންކުރީ، އެ ހުކުމުން ދައުލަތް ހިންގުން އޮޅުންބޮޅުންވެ ގާނޫނުއަސާސީގެ ބާރުކެނޑިދާނެ ކަމުގެ ބިރު ހީވުމުން ކަމަށް ވެސް ސަރުކާރުން ވަނީ ބުނެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަލީ ނަސީމް
18 March 2018
ޔާމީން ހަމަ ވަރައް ބަރާބަރު. މުޅި ގައުމުގަ އުޅެނީ ދެފުއްކެހެރިން. އެންމެންނައް އެކަން އެބަ އެނގޭ! ކޮންމެ މީހެއްވެސް، އެމީހަކައް ފައިދާ ވަންޏާ، ފައިސާ ލިބެންޏާ، އެ ވަގުތުހުރި ވެރިންނަކީ ހަމަ އެންމެ މޮޅު މީހާ! ޔާމިނެކޭ، ބާލީހެކޭ، ގާސިމެކޭ، ކާސިމެކޭ، ހަމަ އެކައްޗެއް. ކުޅަދާނަ މީހަކު، ވެރިކަމުގަ ހުންނަންވީ! މޮޅިއްޔާ ގާނޫނު ފޮޅާލަންވީ، ގައުމު ފެލާލަންވީ! މަ ތާއީދު ޔާމީނައް. އެއީކީ ކޮންމެހެން އޭނަ މާ ތިއްތި ވެގެނެއްނޫން. ދެން އަރާމީހަކު ވެސް ހަމަ ވާނީ ހަމަ މިޔައް! މިއީ ވަކި ވެރިއެއްގެ މައްސަލަ އެއްނޫން. މިއީ ދިވެހި ލޭގެ މައްސަލައެއް. ގައުމު އޮތީ ރެނދު އަޅާފަ، އަދި ފުނޑިގެން ދާ ގައުމެއް!!!!
ނާޝް
18 March 2018
ޗޮއިސް ހުސްވެފަ ތިއޮތީ. ދެން ތިހެން މަރުވަންދެން ޑިފެންސަށް ކުޅެލަ ކުޅެލާ ތިބޭ. އަނިޔާވެރިންގެ ނިމުން ވަރަށް ހުތުރުވެފަ ހިތި ވާނެ. ބަލައިލާ ހިއްވެ ވަރަށް.
ނާއިޝް
19 March 2018
ނަނާ ހުވަފެން ދޯ ކަނބުލޯ..؟! ލޮލް
ނާޝް
18 March 2018
މޮޑޭނެ ވައްތަރަކަށް ފުށްގަނޑު މޮޑެ މޮޑެފަ މޮޅަތި ވާހަކަ ދައްކާނެ މި ސަރުކާރުން. ސަރުކާރާ ރައީސް މީހާ ހިތާނުވާ ގޮތަކަށް ހުކުމެއް އައިއްސިއްޔާ ހަޖަމު ކޮށްލަން ނުކެރިގެން މުޅި ގައުމު ހުއްޓުވާފަ މިއޮތީ. ދެން ސަރުކާރަށް ކޮން މޮޅުތަކެއްތަ ވަނީ މިކަމުން؟ ވިޔަސް އެއްދުވަހުން އަނެއް ދުވަހަށް ވަނީ ބަލި. ގައިމުވެސް ރައްޔިތުން އެއްކޮށް ޖަލަކަށް ނުލެވޭނެ ތިޔަބަޔަކު ކިތަންމެ މޮޅަސް.
ޖޭމްސް
18 March 2018
ގާނޫނު ބުނާގޮތުން އެސް އޯ އީ ގެ ދަށުން ހައްޔަރު ކުރާ މީހަކައް އެހެން އިޖުރާތެއްގެ މައްޗަކުން ޝަރީއަތެއް ކުރިއަކައް ނުގެންދެވޭނެ. އޫޕްސް ...... މިތަނުގަ ދެން ގާނޫނަކައް ނުބަލާ ވިއްޔާ ދޯ؟
ޟަސް
18 March 2018
ކޮންކަމަކަށް ބޭސްކޮށްތޯ މުއްދަތު އިތުރުކުރަނީ. ޙަމަހަމަކަމާއި އިންސާފުގެ މަޤު އިސްކުރުމަށް ފަޑިޔާރުންނަށް ގޮވާލަން.
ކަލޭ
18 March 2018
ޖަލު ފުރެންދެން އަދިވެސް މީހުން ހައްޔަރުކުރޭ!
އެހެންތޭ
18 March 2018
އެސްއޯއީ އުވާލަން އެއްގޮތަކަށް ވެސް ސަރުކާރުން ނޫޅެއެވެ. ސަރުކާރުން ނޯންނާނެ ބުނެފައި އެސްއޯއީ އުވާލާނެ ކަމަށް. ތަމެން ދައްކަގަ ސަރުކާރުން އެހެން ބަޔާން ކޮށް ނެރެފައިވާ އިއުލާން އެއް. ނުދެއްކޭނެއޭ. ދެން ކޯއްޗެކޭ ކިޔަންތޭ. އެސްއޯއީ އުވާލަން ސަރުކާރަކުން ނޫޅެ އެއީ ޕްރޮޕެގެންޑާ އިނގޭތޭ.
ތުނިޔަ
19 March 2018
އެސްއޯއީ ޖީބަށްލައިގެން ތިބެބަލަ!
މާސްޓަރ
18 March 2018
ޑިމޮކްރަސީ އަށް މިހާ ވަކާލާތުކުރާބަޔަކު ވޯޓަށް ތިންހަތަރު މަހަށް ވެފައި އޮއްވާ މިއޮށްއުޅޭ ގޮތަކުން ހަމަ ހައިރާންވެއްޖެ. ދުވަސްއައުމުން ވޯޓުގެ ހައްގުން ރައްޔިތުން މަހްރޫމް ކޮށްފާނެކަމަށް ހީވަންޏާވެސް މަޑުކޮށްލައިގެން ދުވަސް އަންނަންދެން ތިބޭނަމަ ކިހާރަގަޅު. އޭރުން އެހެން ހަދަން އުޅެފިނަމަ ރައްޔިތުން ނުކުމެ އެކަން ހުއްޓުވާނެ. އަދި ތިއުޅޭނީ ހަމަ އަމިއްލަ އެދުމާއިގެން.
ހެހެ
18 March 2018
ކީއްތޯ ކުރާނީ. ކުރިމަތީ ގާ ކޮޅެއް އޮތީމަ އެ ގާކޮޅު ދުރައްލާފަ ނޫނީ ކުރިއަށް ނުދާން އެތިބެނީ. އެ ގާކޮޅުގަ ޖެހި ތާށިވެފަ ތިބި މީހުން ބައިތިއްބާފަ ދެން ތިބި މީހުން ކުރިއަށް ގޮސް ކާމިޔާބު ހޯދައިގެން އައިސް އެއްކަލަ ގާކޮޅު ދުުރުކޮށް އެ ގާކޮޅުގަ ތާށިވެފަ ތިބި މީހުން މިނިވަން ކުރާ ކަހަލަ ޚިޔާލެއް ގެންގުޅޭކަށް ނޭނގޭ. ހަމަ އެއްކަލަ ގާ ކޮޅާ ދިމާކުރުމުގަ ދެމިތިބެނީ. ގާކޮޅު އޮތީ ގުޑާ ގޮތަކަށް ނޫން. އެކަމު ގޮތް ދޫނުކުރަންވެގެން ހަމަ އެ ގާކޮޅު ދުރައްލާން އުޅެ އުޅެ ތިބެނީ. އެއްގޮތަކަށްވެސް ދެނެގަންނާކަށް ނޫޅޭ އެ ގާ ކޮޅާ ދިމާކުރި ވަރަކަށް އެ ގާކޮޅުގެ ބާރު ގަދަކުރާނެކަން.
ބައިރޯ
18 March 2018
މީ އެއްވެސް ކަމެއް ގާނުކާއި ގަވާއިދަކުން ކުރާ ސަރުކާރެއްތަ، ކުއްލިނުރައްކާގެ މުއްދަތު ހަމަވާތީ ކަމެއް ކުރަން، އެވެސް އިއުލާން ކޮށްފަ އޮތީ ގާނޫނާއި ޙިލާފައްވިއްޔާ، ތެޅިފޮޅެނީ ނޫން ކުރާނެ ނުކުރާނެ ކަމެއް ނެއެގިގެން
ތަމީމް
18 March 2018
ޤާނޫނީ ގޮތުން އިޢުލާން ކުރެވިފައި އޮތް "ކުއްލި ނުރައްކަލުގެ ޙާލަތެއް" ރާއްޖޭގައި ނެތް. އެޓާނީ ޖެނެރަލް އޮފީހުގެ ވަކީލުންނާ، ޕީޖީއާއި، ޕީޖީ އޮފީހުގެ 32 ވަކީލުން "އިއްތިފާޤް" ވޭ މިކަމަށް. އަދި ރާއްޖޭގެ ތަޖްރިބާކާރު ޤާނޫނީ ވަކީލުން އެއްބަސްވެލައްވާ. އުއްތަމަ ފަނޑިޔާރު ގެ މައްޗަށް ހިންގާ ޝަރީއަތަށް ވަނީ ސަރުކާރުގެ ނުފޫޒު ވަދެފައި. އެކަމުގެ ހެއްކަކީ ސަރުކާރު ހިންގާ ޕީޕީއެމްގެ އިސް ފަރާތެއް މީޑިއާ ކުރިމަތީގައި އިޢުލާން ކޮށްފައިވޭ ކުއްލި ޙާލަތުގެ މުއްދަތު ހަމަވިނަމަވެސް އުއްތަމަ ފަނޑިޔާރު ޢަބްދުﷲ ސަޢީދު، ސްޕުރީމް ކޯޓުގެ ފަނޑިޔާރު އަލީ ޙަމީދު، ކުރީގެ ރައީސް މަޢުމޫން ޢަބްދުލް ޤައްޔޫމް ހައްޔަރުން ދޫކޮށް ނުލާނެކަމަށް. އެއާއެކު މިއަދު އެވަނީ އުއްތަމަ ފަނޑިޔާރުގެ މައްޗަށް ޝަރީއަތް ހިންގުމަށް ކުރިމިނަލް ކޯޓުގައި ތާވަލު ކޮށްފައި. ދެން އިންޞާފުވެރިވާނޭ ވަރު ނިކަން ވިސްނަވާ ބައްލަވާ؟؟؟