އަލް ޖަޒީރާ ޑޮކިއުމެންޓްރީ ގައި ހުރީ ދޮގު، އިންވެސްޓަރުންގެ އިތުބާރު އެބައޮތް: އިކޮނޮމިކް މިނިސްޓްރީ
އަލްޖަޒީރާ އިން ރާއްޖެއާ ގުޅޭގޮތުން ތައްޔާރުކުރި ޑޮކިއުމެންޓްރީން ނަގާފައިވާ ސްކްރީން ޝޮޓެއް: މި ޑޮކިއުމެންޓްރީގައި ހުރި ވާހަކަތައް ސަރުކާރުން ދޮގުކުރޭ.
09 ސެޕްޓެމްބަރ 2016 - 11:24
19 comments
ރާއްޖެއާ ގުޅޭ ގޮތުން އަލް ޖަޒީރާއިން ތައްޔާރުކުރި ޑޮކިއުމެންޓްރީގައި ހުރީ ސާބިތު ނުހިފޭ ވާހަތަކެއް ކަމަށާއި ބޭރުގެ އިންވެސްޓަރުންގެ އިތުބާރު ރާއްޖެއަށް އެބައޮތް ކަމަށް އިކޮނޮމިކް މިނިސްޓްރީން ރޭ ބުނެފި އެވެ.
އެ މިނިސްޓްރީން ނެރުނު ބަޔާނެއްގައި ބުނީ ރާއްޖޭގައި އިންވެސްޓް ކުރުމަށް ދިވެހި އަދި ބޭރުގެ އިންވެސްޓަރުންގެ ޝައުގުވެރިކަން އިތުރުވެ، ރާއްޖެ އަންނަ ބޭރުގެ އިންވެސްޓްމަންޓްތަކުގެ އަދަދު އިތުރުވެފައިވާ ކަމަށެވެ. އެއީ ރާއްޖޭގެ އިގްތިސާދު ރަނގަޅުކޮށް، ހަރުދަނާ ކުުރުމަށް ސަރުކާރުން އަޅާފައިވާ މުހިއްމު ފިޔަވަޅުތަކުގެ ނަތީޖާ ކަމަށް އެ މިނިސްޓްރީން ބުންޏެވެ.
"ރާއްޖެއާ ބެހޭ ގޮތުން ދޮގު މައުލޫމާގު ފަތުރައިގެން ރާއްޖޭގެ ނަން ކިލަނބުކޮށް، ރާއްޖޭގެ އިގްތިސާދަށް ގެއްލުން ދިނުމަށް ކުރަމުންދާ މަސައްކަތްތައް،" އަލް ޖަޒީރާއިން ދެއްކި "ސްޓީލިން ޕެރެޑައިސް" ޑޮކިއުމެންޓްރީއާ ގުޅޭ ގޮތުން އިކޮނޮމިކް މިނިސްޓްރީގެ ބަޔާނުގައިވެ އެވެ.
އިކޮނޮމިކް މިނިސްޓްރީން ބުނި ގޮތުގައި ރާއްޖޭން ގެންގުޅެނީ ހުޅުވާލެވިފައިވާ އަދި ބައިނަލްއަގުވާމީ މިންގަނޑުތަކާ އެއްގޮތަށް އަމަލުކުރާ އިންވެސްޓްމަންޓް ޕޮލިސީއެކެވެ. ވިޔަފާރިތަކާއި އިންވެސްޓްމަންޓްތަކަށް އެހީތެރިކަން ފޯރުކޮށްދޭނެ ހަރުދަނާ ނިޒާމުތައް ރާއްޖޭގައި ގާއިމްކޮށްފައިވާ ކަމަށް އެ މިނިސްޓްރީން ބުންޏެވެ.
ރާއްޖޭގެ އިގްތިސާދު އޮތީ، އިކޮނޮމިކް މިނިސްޓްރީން ބުނި ގޮތުގައި، ރަނގަޅު ފައްތަރެއްގަ އެވެ. ރާއްޖޭގެ އިގްތިސާދީ ހާލަތު ދެނެގަނެ، ދުނިޔޭގެ އެންމެ ބޮޑު ތިން ކްރެޑިޓް ރޭޓިން އެޖެންސީގެ ތެރޭގައި ހިމެނޭ މޫޑީސް އިންވެސްޓާސް ސާވިސް އިން ފުރަތަމަ ފަހަރަށް ރާއްޖެ އަށް ކްރެޑިޓް ރޭޓިންއެއް ދީފައިވާ އިރު، އިގްތިސާދު ރަނގަޅުކަން އެއިން ވެސް ހާމަވެފައިވާކަން މިނިސްޓްރީން ފާހަގަކުރި އެވެ.
އަލް ޖަޒީރާގެ ޑޮކިއުމެންޓްރީ، "ސްޓީލިން ޕެރެޑައިސް"ގައި ސަރުކާރާއި ރައީސް އަބްދުﷲ ޔާމީނަށް ބޮޑެތި ތުހުމަތުތަކެއް ކޮށްފައިވެ އެވެ. އޭގެ ތެރޭގައި، އެމްއެމްޕީއާރުސީ މެދުވެރިކޮށް ވަގަށް ނެގި ފައިސާ ސީދާ ރައީސަށް ލިބިވަޑައިގެންނެވި ކަމަށް ބުނެފައިވެ އެވެ. އަދި ކުރީގެ ނައިބު ރައީސް އަހުމަދު އަދީބު އިސްކޮށް ހުންނަވައި 1.5 ބިލިއަން ޑޮލަރު (23 ބިލިއަން ރުފިޔާ)ގެ މަނީ ލޯންޑްރިން ސްކީމެއް ބޭރުގެ ވިޔަފާރިވެރިންތަކަކާ ގުޅިވަޑައިގެން ހިންގަވަން އުޅުއްވި ކަމަށް ވެސް ތުހުމަތުކޮށްފައިވެ އެވެ.
އެ ތުހުމަތުތައް ސަރުކާރުން ވަނީ ދޮގުކޮށްފަ އެވެ. އަދި އެމްއެމްއޭއިން ބުނެފައިވަނީ މަނީ ލޯންޑްރިންގެ އެއްވެސް ކަމެއް ހިނގާފައި ނުވާ ކަމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މަންސޫރު
14 October 2016
ބޮޑު ބިޔަ އިންވެސްޓަރުން ފެނުނު ޑޮކިޔުމެންޓަރީ އަކުން!
ލަބީދު
10 September 2016
ނާނަނާނެ.......ނާދޭ......ދެން އަދި އަމްދުން ނާންނާނެ.
ރައްޔިތުމީހާ
10 September 2016
ރައްޔިތުންގެ 80ޕަސަންޓު މީހުން ބުނަނީ ތިބުނާ އިތުބާރެއްނެތް ކަމައް
ބެލީތަ
10 September 2016
ހަރުގެއަށްދާ ހައެއްކަ މީހުން އެއީ 80% ދޯ؟ ތިހީކުރަނީ މިނޫހުގައި 100 ވަރަކަށް މީހުން ކޮމެންޓް ކުރީމާ އެއީ ލައްކައެކޭ. އެއްބުރުންނޭ ކިޔައިގެންވެސް އުޅުނު. ފަސްބުރުންވެސް ހަމަނުވި. މައުމޫނަށް 2 ހާސްވޯޓު ނުލިބޭނެކަމަށްބުނިފަހަރު 48 ޕަސެންޓް ވޯޓުހޯދި. ތިއީ ހިތުންމެޓާ_ އަނގައިން ޗޯސްގްރޫޕޭ.
ސޯދިރު
10 September 2016
އިންވެސްޓަރުން އަންނާކައް ބޭނުމެއް ނުވޭ. އަހަރެން އުޅުނިން ތިމަސައްކަތުގައި ފޯރަމް ތަކައްގޮސް.. އެކަމަކު އިންވެސްޓަރުން ގެނައިމަ ދެފަހަރު ދެގޮތަކައް ސަރުކާރުން ވާހަކަ ދައްކާފަ، އަވަސް ކުރަންޔާ ފާސްކޮއްދެންޔާ ކަޓުއަޅަންޖެހޭ ވަރުތައް ބޮޑުވެ އަދަދު ބަދަލުވެ ކުރިން ދީފަހުރި ރައްތައް ހިތައް އެރީމަ އަތުލާފަ މިހެން ހެދީމަ އެމީހުން އިންވެސްޓް ކުރާކައް ބޭނުމެއް ނުވޭ.. ކޮރަޕްޓް އިންވެސްޓަރުންނާއި މާފިޔާ ބޮޑުންނައް މިކަންވާނީ
ޒިންދަގީ
09 September 2016
ސިއްސައިގެންދާވަރުގެ އިންވެސްޓްމަންޓުގެ ބަދަލުގައި، ދުނިޔެ ސިއްސުވާލީ ކޮރަޕްޝަަނުގެ ރިޕޯޓަކުން. ގައުމަކުނެތޭ އިތުރަށް ވިއްކާނެ ކާށިކޮޅެއްވެސް. ތޮށިގަނޑާއިއެއްކޮށް ކާލައިގެންތިބެ މިބުނަނީ އިންވެސްޓަރުންތައް މިހާރު ގާދޫކޮލުން ވަންނަނީޔޭ. ޗާޓަށް ބަދަލުއަންނަވަރުގެ އިންވެސްޓަރުންވެސް އަންނީއޭ. ކޮންތާކަށްތޯ އަންނަނީ؟؟ އޮލިންޕަހުގެ ސްކްރީނަށްތޯ އަންނީ؟؟؟؟
އިންސައިޑަރ
09 September 2016
އެމްޑީޕީ މީހުންނަކަށް ކަމަކުނުދާނެ ރާއްޖެ ތިޔާގިވެ ރައްޔިތުންގެ ޖީބު ފުރެންޏާ.
މެންބަރު
10 September 2016
ފުރެނީ ބޮޑުންގެ ޖީބު. ތިބޭފުޅާއަށްވެސް އެކަން ރަނގަޅަށް އެނގިލައްވާނެ.
އެމްސް
09 September 2016
އިންވެސްޓަރުން އިތުރުވެ އިންވެސްޓްމެންޓް ގިނަ ވާވަރަކަށް ދެކޮޅުޖެހޭ އާމްދަނީއެއް ލިބޭ ވަޒީފާ ދިވެހީނަށް މިދަނީ މަދުވަމުން!
ހުސެން ތަކުރުފާނު
09 September 2016
ތަރައްގީ ހާސިލް ކުރުމަށާއި އިންވެސްޓަރުންގެ އިތުބާރު ދެމެހެއްޓުމަށް ދިވެހި ރާއްޖެ އަށް ބޭނުންވާ ބައެއް ކަންކަން. 1- ގައުމުގެ ސުލްހަ މަސަލަސްކަން ނުވަތަ ޕީސް އެންޑް ސްޓެބިލިޓީ ދެމެހެއްޓުން 2- އިތުބާރު ކުރެވޭ ހަރުދަނާ ކޯޓުތަކެއް ގާއިމް ކުރުން. 3 - އަދުލު އިންސާފު ހުރހާ އެންމެންނަށް ހަމަހަކޮށް ހިންގާތަން ފެނުން. 4 - ކޮރަޕްޝަން ކޮންޓްރޯލް ވުން. 5 - ސައިދީގެން ނޫނީ ރައްޓިއްސަކާއި ގުޅައިގެން ނޫނީ އެއްވެސް ކަމެއް ނުވުން ކޮންޓްރޯލް ކުރުން. 6 - ޒަމާނީ ވިޔަފާރިއަށް ފަހި ހަރުދަނާ ގާނޫނުތަކާއި ގަވާއިދުތަށް ހެދި އެއަށް އަމަލުކުރުން. 7 - ކިޔަވައިގެންތިބި ވިޔަފާރީގެ ކަންކަމާ މޮޑަން ލޯ އެގޭ ޒުވާނުން ފަނޑިޔާރުކަމަށް އިސްކުރުން. ކޮރަޕްޓް ޖަޖުން ވަކިކުރުން. 8 - ދީނީގޮތުން ހައްދުފަހަނަޅައި ދިޔުން ކޮންޓްރޯލް ކުރުން. 9 - ދިވެހިން ބޭރުގައުމު ތަކަށް ހަނގުރާމަކުރަން ދިޔުން މުޅިން ހުއްޓުވުން. 10 - މާރާމާރީ އާއި ގޭންގު ހަރަކާތް ހުއްޓުވުން.
މޯޑޫ
09 September 2016
ކަނޑައެޅިގެންދޮގެއްތިއީ..އިތުބާރުއޮތްނަމަ ކީއްވެ މީގެކުރިން ތިބުނާ އިންވެސްޓަރުން ނައީ..މިހާރު ދުނިޔެ ގަބޫލުކުރާ ޗެނަލަކުން ހުރިހާކަމެއް ސާފުކޮން ދެއްކީމައި ދެން އަންނަން ހިތުލީމީހުންވެސް ނާންނާނެ.
އިންވެސްޓަރު
09 September 2016
ކޮންމެ ކުލައެއްގެ ސަރުކާރެއް އޮތަސް ގައުމުގެ އިގްތިސާދު ހުއްޓުމެއްނެތި ކުރިޔަށް ދާންޖެހޭ. ގައުމުގެ ތަރައްގީގެ މަންޒިލް އަކީ ހުރިހާ ސިޔާސީ ފިކުރެއްގެ ރައްޔިތުން ވެސް ހާސިލް ކުރަން ބޭނުންވާ ލަނޑުދަނޑި. މިކަމަށް އެންމެ މުހިންމު އެއްކަމަކީ އިގްތިސާދު ކުރިއަރުވަން ބޭނުންވާ އިންވެސްޓަރުން. އިންވެސްޓަރުންގެ އިތުބާރު ނުގެއްލޭތޯ މަސައްކަތް ކުރުމަކީ ހަމަ ކޮންމެ މީހެއްގެ ވާޖިބެއް. ވަކިން ޚާއްސަކޮށް ހުރިހާ ސިޔާސީ ޕާޓީތަކުގެ މަސްއޫލިއްޔަތެއް.