އިދިކޮޅު ފަރާތްތަކުގެ ނިއުސް ކޮންފަރެންސް ވެލާނާގޭ ކައިރީގައި ބޭއްވިޔަ ނުދިން!

އިސްލާމްދީނަށާއި ރަސޫލާ އަށް ފުރަައްސާރަކޮށް، ރިޕޯޓު ނެރުނު މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) ގެ މައްސަލައިގައި އިދިކޮޅު ފަރާތްތަކުން ޔޫތު މިނިސްޓްރީ އަށް ސިޓީއެއް ހުށަހެޅުމަށް ފަހު، ވެލާނާގޭ ބިލްޑިންގް ކައިރީގައި ނިއުސް ކޮންފަރެންސެއް ދޭން އުޅުމުން ފުލުހުން މިއަދު އެކަމަށް ހުރަސް އަޅައިފި އެވެ.

އިދިކޮޅު ޕީޕީއެމް/ޕީއެންސީގެ ބައެއް އިސްވެރިން ޔޫތު މިނިސްޓްރީ ހުންނަ ވެލާނާގެ އަށް މިއަދު ވަޑައިގަތީ، އެމްޑީއެންގެ މެމްބަރުންގެ ގޮތުގައި މަސައްކަތް ކުރި މީހުންގެ ލިސްޓެއް ހޯދުމަށެވެ. އެ ސިޓީ ހުށަހެޅުއްވީ ރައްޔިތުންގެ މަޖިލިހުގެ މަހިބަދޫ ދާއިރާގެ ޕީޕީއެމްގެ މެމްބަރު އަހުމަދު ތޯރިގް (ޓޮމް) އެވެ.

ޔޫތު މިނިސްޓްރީ އަކީ ޖަމިއްޔާތަކުގެ ބެލެނިވެރި ފަރާތެވެ.

ތޯރިގާ އެކު، ޕީޕީއެމްގެ ނައިބު ރައީސް، ނައިފަރު ދާއިރާގެ މެމްބަރު އަހުމަދު ޝިޔާމާއި ޕީއެންސީގެ ނައިބު ރައީސުން ކަމަށްވާ މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދާއި މަޑުއްވަރީ ދާއިރާގެ މެމްބަރު، ކުރީގެ ޑިފެންސް މިނިސްޓަރު އާދަމް ޝަރީފާއި ލަންކާ ސަފީރު ކަން ކުރެއްވި މުހައްމަދު ހުސެއިން ޝަރީފް (މުންދު) އާއި ބާރަށު ދާއިރާގެ ކުރީގެ މެމްބަރު އިބްރާހިމް ޝުޖާއު އާއި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވަޑައިގަތެވެ.

ދެ ޕާޓީގެ އިސް ބައެއް ބޭފުޅުން ސިޓީ ހުށަހެޅުއްވުމަށް ފަހު، ވެލާނާގޭގެ ކުރިމަތީގައި ނޫސްވެރިންނާ ވާހަކަ ދައްކަވަން މަސައްކަތް ކުރެއްވުމުން ފުލުހުންގެ ދެ ތިން މީހަކު އެ ބޭފުޅުން ވަށާލައި، ގްރީން ޒޯނުން ބޭރަށް ދިއުމަށް އެންގި އެވެ. އަދި ފުލުހުންގެ އެންގުމާ އެއްގޮތަށް ނޫސްވެރިން އަމަލު ކުރި އެވެ. އޭރު، އިދިކޮޅު ސަޕޯޓަރުން ތިބީ އެމްޑީއެން އުވައިލުމަށް ގޮވާލައި ތަފާތު ޕޯސްޓަރުތައް ލިޔެފައިވާ ލިޔުންތައް ހިފައިގެންނެވެ.

ވެލާނާގޭ ކައިރި އަށް ފުލުހުން ދިއުމުގެ ކުރިން ޕީޕީއެމް ނައިބު ރައީސް ޝިޔާމް ވިދާޅުވީ އެމްޑީއެން އިން ނެރުނު ރިޕޯޓާ ގުޅިގެން ދިވެހިން ވަރަށް ބޮޑަށް ކަންބޮޑުވާ ކަމަށެވެ. އެމްޑީއެން އަކީ ސަރުކާރަށް ވުރެ ވަރުގަދަ ޖަމިއްޔާ އެއް ކަމަށާއި އެ ޖަމިއްޔާގެ މަގްސަދާ މެދު ދިވެހިން ވަރަށް ކަންބޮޑުވާ ކަމަށް އޭނާ ވިދާޅުވި އެވެ.

އެމްޑީއެން އަކީ ރާއްޖޭގައި އޮތް ސައްތަ އިން ސައްތަ އިސްލާމީ ވަންތަކަން ފޮހެލުމަށް، ވަރަށް ރޭވުންތެރިކަމާ އެކު މަސައްކަތް ކުރާ ޖަމާއަތެއް ކަމަށް ވެސް ޝިޔާމް ވިދާޅުވި އެވެ. އެހެން އޭނާ ވިދާޅުވެ ނިމުނު ތަނާ، ދެން ފެނުނީ ފުލުހުންގެ ދެ ތިން މީހަކު ގޮސް ނޫސްވެރިންގެ ބައްދަލުވުން ހުއްޓުވި މަންޒަރެވެ.

ފުލުހުން ބުނީ، ގްރީން ޒޯންގައި ނޫސްވެރިންގެ ބައްދަލުވުން ނުބޭއްވޭނެ ކަމަށެވެ. އެއާ އެކު، އިދިކޮޅު ސަޕޯޓަރުންތަކުގެ އަޑު ގަދަވެ، "ލާދީނީ އެމްޑީއެން" އުވާލަން ގޮވާލި އެވެ. އަދި ނޫސްވެރިކަމުގެ މިނިވަންކަމަށް ފުލުހުން ހުރަސް ނޭޅުމަށް ވެސް އެމީހުން އިލްތިމާސް ކުރި އެވެ.

ވެލާނާގެ ކައިރި އަށް މިއަދު އެއްވި މީހުން ހޮޓެލް ޖެން ކުރިމައްޗާ ހަމައަށް ފުލުހުން ގެންދިޔަ އެވެ. ދެ ޕާޓީގެ ވެރިން ހިންގަވާއފައި އެ ހިސާބަށް ވަޑައިގަންނަވަމުން ދިޔަ މަގުމަތީގައި ޝިޔާމް ވިދާޅުވީ "މި ގައުމުގައި ނޫސްވެރިކަމުގެ މިނިވަން ކަމެއް ނޯންނާނެ" ކަމަށެވެ. ޝުޖާއު ވިދާޅުވީ ހުރަސް އަޅާ މީހުންނަކީ "ލާދީނީ ކަންކަމަށް ހިތްވަރުދޭ" މީހުން ކަމަށާއި އެކަން ބެލޭނެ ދުވަހެއް އަންނާނެ ކަމަށެވެ.

"ގާނޫނުގެ ކުރިމަތީގައި ހަމަހަމަވާނެ،" ޝުޖާއު ނޫސްވެރިންނަށް ނަސޭހަތްތެރިވެވަޑައިގަތެވެ.

ޝިޔާމް ވެސް ވިދާޅުވީ ޕޮލިސް ކޮމިޝަނަރަކަށް ހުންނެވި މުހައްމަދު ހަމީދު (އެމްސީ ހަމީދު) ގެ ޣައިރު ގާނޫނީ އަމުރުތަކަށް ފުލުހުން ބޯލަނބަމުން އަންނާތީ ހިތާމަ ކުރައްވާ ކަމަށެވެ.

އެއްވެފައި ތިބި ބައެއް މީހުން ވެސް ގޮވަމުން ދިޔައީ މި ސަރުކާރު ވެރިކަމަށް އައީ މީޑިއާގެ މީހުންނަށް ފުރިހަމަ އެއްބާރުލުން ދޭނެ ކަމުގެ ވައުދާ އެކު ކަމަށެވެ. އެކަމަކު، ވެރިކަމަށް އައުމަށް ފަހު، ނޫސްވެރިންނަށް އެ ފުރުސަތު ނުލިބޭތީ ސަރުކާރުގެ ވެރިން ދެކޮޅު ނުޖެހޭ ކަމަށް ބުންޏެވެ.

އެއްވި މީހުން، ރައްޔިތުންގެ މަޖިލިހުގެ ކައިރިން ހިނގާފައި ދިޔަ އިރު، ޝުޖާއު ވަރަށް ބާރަށް "މިއީ އެމްޑީޕީގެ އެކަނި ގައުމެއް ނޫން" ކަމަށް ވިދާޅުވި އެވެ. އަދި ބައެއް މީހުން ބުނީ މި ވެރިކަން އައި ފަހުން ވެލާނާގެ އާއި މަޖިލިސް ކައިރީގައި ވެސް ޕްރެސް ދީފައި ހުރި އިރު، އެކަން ނުހުއްޓުވާ ކަމަށެވެ.

ޝުޖާއު ވަނީ މީޑިއާ އަށް ތިބެވޭނެ ހިސާބެއް އެންގުމަށް ފުލުހުންގެ ކިބައިން އެދިވަޑައިގެންފަ އެވެ. އޭގެ ޖަވާބުގައި ފުލުހުން ބުނީ ހޮޓެލް ޖެން ކުރިމައްޗަށް ދިއުމަށެވެ.

ހޮޓެލް ޖެންގައި ނޫސްވެރިންނާ ބައްދަލު ކުރައްވައި ޝިޔާމް ވިދާޅުވީ ޔޫތު މިނިސްޓްރީ އަށް ސިޓީ ފޮނުވުމުގެ އެންމެ ބޮޑު އެއް ބޭނުމަކީ ޕޮލިސް ކޮމިޝަނަރު ހަމީދު އެމްޑީއެންގައި އުޅުއްވި ދުވަސްވަރު ބެލުން ކަމަށެވެ. އެމްޑީއެން މެމްބަރުންގެ މައުލޫމާތު އެނގެން ދިވެހިން ބޭނުންވާ ކަމަށް ވެސް އޭނާ ވިދާޅުވި އެވެ.

ހޮޓެލް ޖެން ކައިރީގައި ޝިޔާމް، ނޫސްވެރިންނާ ވާހަކަ ދައްކަވަން ޖެހިވަޑައިގަތީ ވެސް ފުލުހުންގެ ހުރަސް އެޅުމުގެ ތެރެއިންނެވެ. އޭނާ މީޑިއާއާ ވާހަކަ ދައްކަވަމުން ގެންދެވިއިރު ވެސް އޭނާ އާއި ނޫސްވެރިންނާ ދެމެދަށް ފުލުހަކު ވަދެ ހުއްޓެވެ.

ޝިޔާމް ވިދާޅުވީ އެމްޑީއެން އުވާނުލައި ދިގުލައިގެން ދިއުމަކީ ރައްޔިތުން ކަންބޮޑުވާ ކަމަށެވެ. އެ ޖަމިއްޔާގެ މެމްބަރަކު، ސަރުކާރުގައި ހުރި ނަމަ ވަޒީފާތަކުން ވަކިކުރަން ޖެހޭނެ ކަމަށް އޭނާ ވިދާޅުވި އެވެ. އަދި އެމްޑީއެންގެ މައްސަލައިގައި ތަހުގީގު ކުރަން ޖެހޭ އެއްޗެއް ނެތް ކަމަށް ވިދާޅުވި އެވެ.

މުއިއްޒު ވިދާޅުވީ ފުލުހުންގެ ފަރާތުން ފެނުނީ ނޫސްވެރިކަމަށް ހުރަސް އެޅި މަންޒަރު ކަމަށެވެ. އަދި އިދިކޮޅު ފަރާތްތަކުން ނޫސްވެރިންނާ ބައްދަލުކުރީ ސިޓީގެ މައުލޫމާތު ދޭން ކަމަށް އޭނާ ވިދާޅުވި އެވެ.

"މިއީތޯ ޑިމޮކްރަސީގައި އޮންނަ ގޮތަކީ؟ ދައްކާ ވާހަކައިގެ ދެކޮޅެއް ނުޖެހޭ،" މުއިއްޒު ވިދާޅުވި އެވެ.

ޝުޖާއު ވިދާޅުވީ ވެލާނާގެ އަށް ވަޑައިގަތީ ބޮޑު ކަމެއް ކުރަން ނޫން ކަމަށެވެ. އެކަމަކު، މިއަދު ހިނގި ކަންކަމުގެ ސަބަބުން ސަރުކާރު ތެޅޭ މިންވަރު އެނގިވަޑައިގެންފައިވާ ކަމަށާއި މި ފެނުނީ "ރޯމަހެއް ތެޅޭ ގޮތަށް ތެޅޭ މަންޒަރު" ކަމަށް ވެސް އޭނާ ވިދާޅުވި އެވެ.

"މި އައީ ވެސް ފަންސާހަކަށް މީހުން ނޫންތޯ؟ އެހެންވީމާ ސަރުކާރުން މީޑިއާތަކަށާއި މީހުންނަށް އަނިޔާދޭ ނަމަ، އަޅުގަނޑުމެން ޖެހޭނީ މިކަން ކޮންޓިނިއު ކުރަން މާލޭގެ މަގުތަކުގައި. އަޅުގަނޑުމެންގެ ދެ ޕާޓީގައި އެ ހިތްވަރު އެބަހުރި،" ޝުޖާއު ވިދާޅުވި އެވެ.

އިދިކޮޅު ފަރާތްތަކުން ނޫސްވެރިންނަށް ހުރަސް އެޅި ކަމަށް ބުނި އިރު، ރައީސް އަބްދުﷲ ޔާމީންގެ ވެރިކަމުގައި ގްރީން ޒޯންގައި އޭރުގެ އިދިކޮޅު ފަރާތްތަކަށް ޕްރެސް ބޭއްވުމުގެ ފުރުސަތު ދީފައެއް ނުވެ އެވެ.