ކޮވިޑް-19 ޖެހިގެން މަރުވި މީހާ މިރޭ ވަޅުލަނީ
30 އެޕްރީލް 2020 - 04:16
94 comments
ކޮވިޑް-19 ޖެހިގެން ރާއްޖޭގައި ރޭ ފުރަތަމަ ފަހަރަށް މީހަކު މަރުވެއްޖެ އެވެ.
ނެޝަނަލްް އިމަޖެންސީ އޮޕަރޭޝަން ސެންޓަރު (އެންއީއޯސީ) ގައި ރޭ ދަންވަރު ބޭއްވި ކުއްލި ޕްރެސް ބްރީފިންއެއްގައި ހެލްތު މިނިސްޓަރު އަބްދުﷲ އަމީން ވިދާޅުވީ އާމިނަތު އާދަމް 83، މަރުވީ ރޭ 7:10 ގައި ކަަމަށާއި އެއީ ކޮވިޑް-19 ކޭސް 126 އާ ގުޅުން ހުރި މީހެއް ކަމަށެވެ. ކޭސް 126 އަކީ "އެމްއެޗްއެފް" ކްލަސްޓާއާ ގުޅުން ހުރި މީހެކެވެ. ކޭސް 126 ގެ މީހާ ކޮވިޑް-19 އަށް ޕޮޒިޓިވްވީ މި މަހުގެ 24 ގަ (މިދިޔަ ހުކުރު ދުވަސް) އެވެ. އެއީ އުމުރުން 52 އަހަރުގެ ދިވެއްސެކެވެ.
މިނިސްޓަރު އަމީން ވިދާޅުވި ގޮތުގައި ކޭސް 126 އާ ގުޅުން ހުރުމުން އާމިނަތުގެ ސާމްޕަލް ނަގާފައި ވަނީ މިދިޔަ ހޯމަ ދުވަހުގެ ރޭ ފަތިހުގެ ވަގުތެއްގައި ކަމަށް ވިޔަސް އޭނާ މަރުވި އިރު ޓެސްޓްގެ ނަތީޖާ އޮތީ ނުލިބި އެވެ.
"މިއަދު ހަވީރު، އިރު އޮއްސުނު އިރު ނޭވާލާން އުނދަގޫ ވެގެން އެ މައުލޫމާތު ކަމާބެހޭ ފަރާތްތަކަށް ލިބިގެން ހޮސްޕިޓަލަށް ގެންދެވުނު އިރު ނިޔާވެފައި އޮތް ކަމަށް އަޅުގަނޑުމެންނަށް މައުލޫމާތު ލިބިފައި ވަނީ،،" އަމީން ވިދާޅުވި އެވެ.
އާމިނަތާއި އާއިލާއަށާއި އެކުވެރިންނަށް މިނިސްޓަރު ތައުޒިޔާ ވިދާޅުވި އެވެ.
މަރުވި މީހާގެ ޖަނާޒާގެ ކަންތައްތައްތަކުގެ ތަފްސީލް ދެއްވަމުން އަމީން ވިދާޅުވީ ހިނެވުމުގެ ކަންތައް ކުރިއަށް ގެންދިޔައީ އެކަމަށް ތަމްރީނު ވެފައިވާ އަންހެން ސިފައިން ކަމަށެެވެ. އެއީ މިކަމަށް ފުރިހަަމައަށް ތައްޔާރުވެފައިވާ ސިފައިން ކަމަށް ވެސް އޭނާ ވިދާޅުވި އެވެ.
ރޭ ދަންވަރު ބޭއްވި ކުއްލި މީޑިއާ ބްރީފިންގައި މިނިސްޓަރު އަމީން.
ކޮވިޑް-19 ފެތުރުން ކޮންޓްރޯލް ކުރުމަށް ހެލްތު ޕްރޮޓެކްޝަން އެޖެންސީން ކުރާ މަސައްކަތަށް ލަފާދޭ ޓެކްނިކަލް އެޑްވައިޒަރީ ގްރޫޕް (ޓެގް)ގެ ލީޑަރު ޑރ. އަލީ ލަތީފް ވިދާޅުވި ގޮތުގައި ކޮވިޑް-19 ޖެހިގެން ރާއްޖޭގައި ހާލު ބޮޑުވާ މީހުންގެ ރޭޓް ދުނިޔޭގެ އެހެން ގައުމުތަކާ އަޅާ ބަލާއިރު އަދި އެހާ މައްޗެއް ނޫނެވެ.
"އަޅުގަނޑުމެން އައިސީޔޫގައި އެޑްމިޓްކޮށްފައި އަދި މި ވަނީ ފަސް ޕޭޝަންޓުން. އަދި އިރާދަކުރެއްވިއްޔާ މި ފަސް ޕޭޝަންޓުންގެ ހާލުވެސް ރަނގަޅު. އެހެން ނަމަވެސް ތިޔަ ބޭފުޅުންނަށް އެނގިވަޑައިގެންނަަވާނެ ކޯވިޑް-19 ޖެހިގެން ކޮންޕްލިކޭޝަން އަށް އަންނަ މީހުންގެ އިތުރު ބަލިތައް ހުރޭ،" ޑރ. އަލީ ލަތީފް ވިދާޅުވި އެވެ.
"އޭގެ ތެރޭގައި ހަކުރުބަލި ހުންނަންޏާ، ލޭމައްޗަށް ދަންޏާ، އަދި އެހެން ނޫނީ ކިޑްނީގެ ބަލި އަދި ފުއްޕާމޭގެ ބަލިތައް ހުންނަންޏާ ކޯވިޑް-19 ޖެހުމަށް ފަހުގައި އިތުރަށް ބަލި ބޮޑުވެ، ފުރާނަަ ގެއްލިގެން ދާފަދަ ކަމެއް ދިމާވެދާނެ."
ރޭ މަރުވި މީހާ އަކީ ކޮވިޑަށް ޕޮޒިޓިވްވި ބަޔަކާ ގުޅުން އޮވެެގެން މޮނިޓަރިން އަށް ލާފައިވާ ގެއެއްގައި ދިރިއުޅުނު މީހަކަށް ވާއިރު އޭނާގެ ބަލި ބޮޑުވުމުން ހޮސްޕިޓަލަށް ގެންދިއުން ލަސްވުން ފަދަ އިހުމާލެއް އޮތް ކަމަށް ގަބޫލުކުރައްވަންތޯ ނޫސްވެރިއަކު ސުވާލު ކުރުމުން އަމީން ވިދާޅުވީ އެފަދަ ކަމެއް އޮތްކަމުގެ މައުލޫމާުތު ޕްރެސް ބްރީފިން ފެށި އިރު ލިބިވަޑައިގެންފައި ނެތް ކަމަށާއި އެ މައުލޫމާތު ސާފުކުރެއްވުމަށް ފަހު ހާމަކުރައްވާނެ ކަމަށެވެ.
ފަރުވާ ދިނުން ލަސްވީ ޓެސްޓްގެ ނަތީޖާ ލިބުން ލަސްވުމާއި ފަރުވާ ލަސްވެގެންތޯ ސުވާލު ކުރުމުން ޑރ. އަލީ ލަތީފް ވިދާޅުވީ ދޭން ޖެހޭ ވަކި ހާއްސަ ފަރުވާއެއް ނުދެވި ލަސްވެފައި ނުވާ ކަމަށެވެ. އެކަމަކު އޭނާ ވިދާޅުވި ގޮތުގައި އާމިނަތުގެ ބަލި ބޮޑުވީ އިއްޔެ ހެނދުނު ކަމަށް މައުލޫމާތު ލިބުނު ކަމަށެވެ. އެހާ ހިސާބުން ހޮސްޕިޓަލަށް ގެންދިޔަކަމަށް ވިދާޅުވާން އުޅުއްވާފައި އޭނާ ވަޑައިގެންނެވީ އެހެން ވާހަކަ އަކަށެވެ. އެގޮތުން ވިދާޅުވެ ދެއްވީ ކޮވިޑްގައި ބަލި ބޮޑުވުމުން ފެންނަ އަލާމާތްތަކެކެވެ.
މިރޭގެ މީޑިއާ ބްރީފިންގައި ޑރ. އަލީ ލަތީފް ނޫސްވެރިއެއްގެ ސުވާލަކަށް ޖަވާބު ދެއްވަނީ.
"މިއަދުގެ ހެނދުނު ކަމަށް ބަލިވީ އަޅުގަނޑުމެންނަށް އެނގިފައި އޮތީ އެހާ ހިސާބުން ހޮސްޕިޓަލަށް ގެންގޮސްފައި، މި ދެެންނެވީ، ގިނަ ފަހަރަށް މިދިމާވާ ސަބަބަކީ ނޭވާ ކުރުވުން، ހުން އައުން ކެއްސުން، އެހެން ވެއްޖެއްޔާ މިއަކަށް ނޯވޭ ވަކި ޚާއްސަ ފަރުވާއެއް،" ޑރ. އަލީ ލަތީފް ވިދާޅުވި އެވެ.
އޭނާ ވިދާޅުވީ އިތުރަށް ހާލަތު ގޯސްވެއްޖެ ނަަމަ ހޮސްޕިޓަލަށް ގެންގޮސްގެން ދޭ ފަރުވާ އަކީ އައިވީ ފްލުއިޑް ދިނުމާއި އޮކްސިޖަން ދިނުމާއި ބައެއް ހާލަތްތަކުގައި އެންޓިވައިރަލް ދިނުން ކަަމަށެވެ.
"އެހެންވީމާ އަޅުގަނޑަކަށް ހިއެއް ނުވޭ އިނގޭތޯ މި ޕާޓިކިއުލާ ޕޭޝަންޓްގައި އެ ކަހަލަ ފަރުވާއެއް ނުދެވިގެން ދިޔައީ ކަމަކަށް،" އޭނާ ވިދާޅުވި އެވެ.
ކޮވިޑް-19 އަށް ޕޮޒިޓިވްވި މީހުންނާ ގުޅުން ހުންނަ ގެތައް މޮނިޓަރިންއަށް ލާ ހިސާބުން އެޗްޕީއޭ އިން އެ ގެތަގުގެ ނަންތައް މިހާރު އިއުލާނުކުރެ އެވެ. އެގޮތުން އާމިނަތު ދިރިއުޅުނު ގެ މޮނިޓަރިން އަށް ލީ ކަމަށް އެޗްޕީއޭގެ އިއުލާނުން ފެންނަން އޮތީ މި މަހުގެ 22 އެވެ. އެކަމަކު އޭނާގެ ސާމްޕަލް ނެގީ 27 ވަނަ ދުވަހުގެ ރޭ ދަންވަރުކަން ރޭގެ ޕްރެސް ބްރީފިންގައި ދިން މައުލޫމާތުން އެނގެ އެވެ.
މަރުވި މީހާގެ ގެ މޮނިޓަރިން އަށް ލީ ދުވަހާއި އޭނާ އަށް ފަރުވާދޭން މަސައްކަތް ކުރި ގޮތުގެ ޓައިމްލައިން ހޯދަން ނޫސްވެެރިން ތަކުރާރުކޮށް ސުވާލު ކުުރުމުން މިނިސްޓަރު އަމީން ވިދާޅުވީ ކަށަވަރު މައުލޫތު ފަހުން ދެއްވާނެ ކަމަށެވެ.
"އެ މައުލޫމާތުތައް ކަށަވަރުކޮށްފައި ނޫނިއްޔާ ތިޔަ ބޭފުޅުންނަށް އެ ގަޑިތަކާ އެއްޗެހި ނުދަންނަވަން ވެގެން އަޅުގަނޑުމެން މި ދަންނަވަނީ ވަކި ގަަޑިއެއް ނުދެންނެވޭނޭ،" އޭނާ ވިދާޅުވި އެވެ.
މަރުވި މީހާގެ އާއިލާގެ ބައެއް މީހުން ސޯޝަލް މީޑިއާގައި އެޗްޕީއޭ އަށް އިހުމާލުގެ ތުހުމަތު އަޅުވާފައިވެ އެވެ.
ރާއްޖޭން މިހާތަނަށް 280 މީހަކަށް ވަނީ ކޮވިޑް-19 ޖެހިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މުހައްމަދު ޝަވީދު
30 April 2020
އަމީންއަކީ އަހަރެންގެ ރައްޓެއްސެއް. އެކަމަކު އޭނާ ޕްރޮފެޝަނަލްއެއް ނޫން. ހިތާމަވެރި!
ރަމަޒާންކަރީމް1400
30 April 2020
ފިތުނަ އުފެދޭ ކޮމެންޓް ނުކުރުން ބުއްދިވެރި. ބައެއް މީހުން ލިޔަނީ އަމީންއަކީ ޖަވާހިރެކޭ އަނެއްބައި މީހުން ލިޔަނީ އޭނާއަކީ ބޭކާރު މިނިސްޓަރެކޭ. ދިމާވެގެން އުޅޭ މައްސަލައަށް ކޮމެންޓް ކުރުން ބުއްދިވެރި. އަމީންއަކީ ޖަވާހިރެއްވެސް ނޫން އަދި ބޭކާރު މިނިސްޓަރެއްވެސް ނޫން. އޭނާވެސް އެއުޅެނީ ވީވަރަކުން ކަމެއް ކުރެވޭތޯ. މިނިސްޓަރުވެސް މީހުން ލައްވާ ކޮމެންޓްކުރުވުމުގެ ބަދަލުގައި މަސައްކަތެއް ކުރަން އުޅުން ބުއްދިވެރި.
ާސަަފީނާ
30 April 2020
ޙުސް އަނގަ ތަޅަނީ ދެން އޮޅުވާ ލެވޭތޯ ބަލަނީ މި މީހާ އުޅޭގެ މޮނިޓަރިން 22 ލީ 27 ގައި ސާމްޕަލް ނެގީ 5 ދުވަސް މާލަހެއް ނޫން މަހެއްވެސް ނުވޭ ދޯ!
ކަރިޝް
30 April 2020
މޮނިޓަރިންގެ ހާލަތުގައި ހުރި ގެއެއް އަދި އުމުރުން ދުވަސްވަފައިވާބޭފުޅެއް ހައިރިސްކް ބޭފުޅަކަށްނުވޭބާ؟! އެޗް ޕީ އޭ އަދި ޓެގް ގެވެސް އިހުމާލްމިކަމުގައި ވާކަން ފާހަގަކުރެވޭ.
އަލިޕިއްލޭ
30 April 2020
ޕްރެސްގައި ރައްޔިތުންގެ އިތުބާރު މިނިސްޓަރަށްވުރެ ބޮޑީ މަބުރޫކްގެ. އަމީންއަކީ ޓީވީއަށް އަރާތާ 10 އަހަރުވެފައިވާ މީހެއް. މަބްރޫކް އެރީ އިހަށް ދުވަހު. އެކަމަކުވެސް ތެދުވެރިކަން އިސްކޮށް ސިޔާސީ ސްޓަންޓް ނުޖައްސައި ޕާޓީއަކަށް ކުލައަކަށް ނަޝީދަކަށް ނުބަލައި ވާހަކަ ދައްކާތީ ރައްޔިތުން އިތުބާރު ކުރަނީ. ޕްރެސްއަށް މަބުރޫކުއާއި ސިއްހީ މާހިރުން އެރުވުމަށް ރައީސް އިބޫއަށް ގޮވާލަން!
މައިމޭން
30 April 2020
މި ކޮމެންޓް ސެކްޝަން އެެއްކޮޅުން އަނެއްކޮޅަށް ބަލާލިއިރު ފާހަގަ ކުރެވުނު ކަމަކީ ހުރިހާ މީހުންވެސް ހުރީ މިނިސްޓަރު އަމީންއާ އެއްކޮޅަށް ކޮމެންޓުކޮށްފައިކަން. އަދި ކަލޭ އެކަނިމާ އެކަނި އެކި ނަން ނަމުގައި މިނިސްޓަރު އަމީންގެ އަގު ވައްޓާލަން ކޮމެންޓުކޮށްފައިވާކަން. އެވަރުންވެސް ކޮމެންޓުތަކުގެ ލައިކްސްއަށް ބަލާއިރުވެސް ކަލޭ ދެއްކި އެއްވެސް ވާހަކައެއް ނެތް ވިކިފައި. މަގްބޫލު މީހާ ވަރަށް ސާފު. މިނިސްޓަރު އަމީންއަކީ ހަމަ މޭންއެކޭ!
މުހައްމަދު ޝަރީފު 999
30 April 2020
އަހަރެންދެކޭގޮތުގައި ޖުމްލަގޮތެއްގައި ދިވެހިރައްޔިތުން ސަރުކާރުން ކުރާކަންކަމަށް ތާއީދުކުރޭ. އެޗްޕީއޭވެސް މިނިސްޓަރުވެސް މަބްރޫކުވެސް ރައީސްވެސް އަދި ރައީސް ނަޝީދުވެސް އޯކޭ. މަބްރޫކާ އެއްފެންވަރަށް އެންމެންނަށް ޕްރެސް ކޮންފަރެންސް ނުބޭއްވިދާނެ. އެއީ މިނިސްޓަރު އަމީންއާއި ޖައްސާލަންޖެހޭ ކަމެއް ނޫން. އަމީންއަކީ އެއްވެސް ކަމެއް ނުކުރާ މިނިސްޓަރެކޭވްސް ނުބުނެވޭނެ. ޕްރެސްއަށް މަބުރޫކު އެރީމަ ގިނަ މީހުންގެ ތާއިދު ލިބޭ. އެއީ ހަގީގަތް!
އަޅުކަލޭގެ
30 April 2020
މިނިސްޓަރ އަމީންއަކީ ސިޔާސީގޮތުން ކާކުކަމެއް އަދި އޭނާކޮށްފައި ހުރީ ކޮންކަންކަމެއްކަން އަޅުގަނޑަކަށް ނޭގެ. ބަލާކަށްވެސް ބޭނުމެއް ނޫން. އެކަމަކު މިވަގުތު ހެލްތް މިނިސްޓަރުކަމުގައި އޭނާ އަދާކުރަމުންދާ ދައުރަށް އޭނައަށް ފުރިހަމައަށް އިތުބާރު އެބައޮތް. މާތްﷲ އަމީންގެ މަސައްކަތުގައި ބަރަކާތް ލައްވާ އަހަރުމެން މިއަޑިގަޑުން އަރައިގަތުމަށް މަގުފަހި ކުރައްވަންދޭވެ.
ހަބީބާ
30 April 2020
މިވަގުތު ކޮންމެކަމެއްގައިވެސް އެންމެފުރަތަމަ އިހުމާލުވީކާކުތޯއާއި، ޖަލައްލާންވީކާކުތޯއާއި، ޒިންމާ ނަގަންވީކާކުތޯ ސުވާލުކުރުމުގެ ބަދަލުގައި ދެންމިކަން ނުވާނެގޮތްހެދޭނީ ކިހިނެތްތޯ ސުވާލުކުރަމާ؟ ގޭގަތިބޭ 4ލައްކަ މީހުންނަށް ފުރާނަ އަތްމައްޗަށް ލައިގެން މަސައްކަތްކަުރާ 10ހާސް މީހުންކުރާ ކޮންމެކަމަކަށް ގޮތްކިޔުމަކީ ފަސޭހަމަކަމެއް. އެމީހުންވެސް އެމީހުންނަށްކުރެވޭ އެންމެ ރަނގަޅަކަށް މަސައްކަތްކުރަމުން އެދަނީ. މިސްޓޭކްވެސް ހެދޭނެ. އެމީހުންނަށް ސަޕޯޓްދެމާ
ނަރީމާ
30 April 2020
ހިތާމަވެރި ވަގުތުކޮޅެއް. އެންމެން އެކީގައި މަސައްކަތް ކުރަންވީ ވަގުތު. ނަޝީދަށް ދެންވެސް ވިސްނޭނެކަމަށް ހީކުރަން. ބިޑު ކޮމިޓީއާއި ފާހާނާ ކޮމިޓީއާއި ފެންފޯއްރުއް ކޮމިޓީ ހަދައިގެން ސަރުކާރަށް ޖެއްސުން ކުރުން ހުއްޓާލާ އެއްބާރުލުންދޭންވީ ވަގުތު މިއީ
ފަރޫ ހުދުމާ
30 April 2020
ނަޝީދުވެސް ސަރުކާރަށް އެއްބާރުލުންދޭންވާނެ. އެކަމަކު އަމީނުއާއި އަލީ ވަހީދުވެސް ޖެހޭ އިމްރޫޕްކުރަން. ނަސީބަކުން ވަރަށް ގިނަ ބާރުތައް މިހާރުވަނީ އެޗްޕީއޭއަށް ދެއްވާފައި. މިއީ ރައީސުލްޖުމްހޫރިއްޔާ އެޅުއްވި މުހިއްމު ފިޔަވަޅެއް.
ސަރީފު
30 April 2020
ވަރައްދެރަ މަރުވާފަހުން ނަތީޖާ ތިބެނީ، ޗައިނާ ގެ އެހީގައި ނަމަވެސް ގިނައިން އަދި އަވަހަށް ޓެސްޓް ގެ ނަތީޖާ ލިބޭނެ ވަސީލަތެއް ހޯދަން އެބަޖެހޭ. ނިޔާވި މައްޔިތާއަށް ސުވަރުގެ މިންވަރު ކުރެއްވުން އެދި ދުއާ ކުރަން
ނަސޭހަތް
30 April 2020
އިންސާނުންނަށް ކުރެވޭނީ މަސައްކަތް. ޝިފާ ދެއްވާނީ ﷲ. އަޅުގަނޑުމެންގެ ހެލްތު މިނިސްޓަރާއި ސިއްހީ ހިދުމަތްތެރިން ރެއާ ދުވާލު މަސައްކަތް ކުރައްވާތަން އެބަ ފެނޭ. އެކަމަކު ސައިންސާއި އިލްމުގެ ރޮނގުން ދުނިޔޭގެ އެންމެ ކުރިއަރާފައިވާ ގައުމުތައްވެސް މިކަމުގައި ބަލިކަށިވެފައިވާއިރު ރާއްޖެއަށްވެސް މި ބަލި އައިމަ މިހާ ހިސާބަށްވެސްދާނެކަން އެނގޭ. ބަލި ފެތުރުން ލަސް ކުރުމުގެ ބާރު އަދިވެސް އޮތީ ފަރުދުން އަތުގައި. އެހެންވީމަ ހެޔޮވިސްނޭ ދިވެހިން ގޭގައިމަޑުކޮށްލަދެއްވާ
ނަސޭހަތުގެ ބަސް
30 April 2020
ސިއްހީ ޚިދުމަތްތެރިންނާއި އެޗްޕީއޭގެ މަސައްކަތަށް ތާއީދުކުރެވޭ. މިނިސްޓަރުގެ އެއްވެސް ދައުރެއް ނުފެނޭ. މިދަނޑިވަޅުގައި ޑރ ސައްތާރު ކަހަލަ ތަޖުރިބާކާރަކު ހުންނެވިނަމަ މިއަށްވުރެ ރަގަޅުވީސް. އެޗްޕީއޭއާއި ސިއްހީ މާހިރުންނަށް ޓެކްނިކަލް ލަފާއެރުވުމުގެ ގާބިލްކަމާއި ރައްޔިތުން ބަލައިގަންނަ މިނިސްޓަރަކަށްވީސް.