ޚަބަރު / އެމްއެންޑީއެފް

ދޯންޏެއްގައި އަލިފާން ރޯވެ، މީހަކު ގެއްލިއްޖެ

ދޯނީގައި ރޯވި އަލިފާން ނިއްވައިލަން ސިފައިން މަސައްކަތްކުރަނީ

މުހައްމަދު ނަސީމް، މިހާރު

10 އޯގަސްޓް 2020 - 16:00

2 comments

ލ. އަތޮޅަށް ދަތުރުކުރި މުދާ އުފުލާ ދޯންޏެއްގައި އަލިފާން ރޯވެ، އަޑިއަށް ދިއުމުގެ ސަބަބުން މީހަކު ގެއްލިއްޖެ އެވެ.

އެމްއެންޑީއެފްގެ މީޑިއާ އޮފިސަރު މޭޖާ އިބްރާހީމް އާޒިމް ވިދާޅުވީ ލ. ގަމު ތުނޑިއާ ދިމާލުން ބޭރަށް އަޑިއަށް ދިޔަ "ވިންދު" ދޯނިން ގެއްލުނީ ބިދޭސީއަކު ކަމަށެވެ.

އެޕޯލޯ ކުންފުނީގެ އެ ދޯނިން ގެއްލުނު ބިދޭސީމީހާ ހޯދަން ސިފައިން އަންނަނީ މަސައްކަތް ކުރަމުންނެވެ. ދޯނީގައި އަލިފާން ރޯވެ، އަޑިއަށް ދިޔަ އިރު އޭގައި ތިބި 10 މީހަކު ކަމަށް ކެޕްޓަނާ ހަވާލާދީ އާޒިމް ވިދާޅުވި އެވެ. އެއީ ދިވެއްސަކާއި ނުވަ ބިދޭސީއެކެވެ.

އެމްްއެންޑީއެފުން އާއްމުކުރި ފޮޓޯތަކުން ފެންނަ ގޮތުގައި އަލިފާން ރޯވެ، އެނދީ ދޯނީގެ އިންޖީނުގޭ ތެރެއިންނެވެ. އަލިފާން ނިވުނު އިރު ދެފެން ދޭތެރޭގައި އޮތް އެ ދޯނީގެ އެހެެން ތަނެއްގައި ރޯވެފައި ހުރި ކަމަކަށް ފޮޓޯތަކުން ނުފެނެ އެވެ.