ދޮށި އުކަމުން ގޮނޑުދޮށުގައި ހިނގަނިކޮށް ބޮޑުވިޔަސް މުހައްމަދު އިމާދަށް ވަދެވުނީ މަސްވެރިކަމުގެ ތެރެއަކަށް ނޫނެވެ. އެކަމާ ގުޅުމެއް ވެސް ދާއިރާއަކަށެވެ. އެތަނުން ގޮސް، އެންމެ ފަހުން ވީ ފުލުހަކަށެވެ. އެކަމަކު އެ ވަޒީފާ ވެސް ދޫކޮށްލާފައި، އުމުރުން 35 އަހަރުގައި މިހާރު އުޅެނީ ސްޕޯޓްސް ފިޝިންގަ އެވެ.
ޒެއިކަލް ފިޝިންގް މޯލްޑިވްސް ހިންގާ، ދ. ކުޑަހުވަދޫ އަށް އުފަން އިމާދު (ޒެއިކަލް) 2006 ވަނަ އަހަރު ޑިޕާޓްމަންޓް އޮފް މެޑިކަލް ސާވިސް ގައި ވަޒީފާ އަދާ ކުރުމަށް ފަހު 2007 ވަނަ އަހަރު ފުލުހަކަށްވި އެވެ. .
ޕޮލިހުގައި އިންވެސްޓިގޭޝަން އޮފިސަރެއްގެ ގޮތުގައި މަސައްކަތް ކުރި އިރު ވެސް ހުސް ވަގުތެއް ލިބޭ އިރަށް އިމާދު ކުރި ކަމަކީ މަހަށް ދިއުމެވެ. މ. އަދި ދ. އަތޮޅުގެ ސްޓޭޝަން އިންޗާޖެއްގެ ގޮތުގައި ވެސް މަސައްކަތް ކޮށްފައިވާ އިމާދު ބުނީ ކޮންމެ ވަޒީފާއެއް އަދާކުރި ނަމަވެސް މަސްވެރިކަމަށް އޭނާގެ ހިތުގައި އޮތް ލޯބި ފިލައިގެން ނުދާ ކަމަށާއި އެކަމަކު ފުލުހެއްގެ ވަޒީފާ ދޫކޮށް މަސްވެރިކަމަށް ހުސްވެދާނެ ކަމަށް ދުވަހަކު ވެސް ހިތަށް ނާރާ ކަމަށެވެ.
"އަބަދުވެސް އުޅޭނީ ދޮއްޓަކާއި ރީލެއް ހިފައިގެން. އެކަމަކު މިއީ މުޅި ދިރިއުޅުން ކަމަށް ވެދާނެ ކަމަށް ކުޑަކޮށް ވެސް ހިތަކަށްނާރާ. ދެހާސް ސޯޅަ ވަނަ އަހަރު ފުލުހެއްގެ ވަޒީފާއިން ކެނޑުނީ. ބައްޕަ ގަނެދިން ލޯންޗެއްގަ ފުރަތަމަ މަހަށް ދާން ފެށީ،" އިމާދުގެ މަސައްކަތް ފެށުނު ގޮތް ކިޔައިދިނެވެ.
"ބައްޕަ، މަންމަ އާއިލާ އެންމެންވެސް ވަރަށް ސަޕޯޓިވް. ވަޒީފާއިން ކެނޑުނަސް އެއްވެސް ޕްރެޝަރެއް ނާދޭ އާއިލާގެ ފަރާތުންނެެއް."
ފުލުހެއްގެ ވަޒީފާއިން މި ޒަމާނުގެ ސްޕޯޓްސް ފިޝިން ފަށައި މިއީ ކުޅިވަރަކަށް ނުހަދައި އާމްދަނީ ލިބޭނެ ކަމަކަށް ހެދީ އެވެ.
އެގޮތަށް މަސްވެރިކަން ކުރަން ފެށުނީ ރިސޯޓުތަކުގައި "ނައިޓް ފިޝިންގެ" ގޮތުގައި ކަމަށް ވިޔަސް މިއީ އިމާދު ނޫނަސް އެތައް ބައެއްގެ އާމްދަނީ ކަމަށް ވެސް މިހާރު ވަނީ ވެފަ އެވެ.
"މިހާރު މިހާ އާންމު ކަމަކަށްވެފައި އޮތް ނަމަވެސް މަސައްކަތް ފެށިއިރު މި ދާއިރާގައި އުޅެނީ އިނގިލިން ގުނާލެވޭހާ މަދު މީހުން. ދެތިން ދިވެހިން ސްޕޯޓްސް ފިޝިންގައި އޭރު އުޅެނީ." އިމާދު ބުންޏެވެ.
ސްޕޯޓްސް ފިޝިން ކުރިއެރުވުމުގައި އެތައް ގޮންޖެހުމެއް ހުރަސްކޮށް ސްޕޯޓސް ފިޝިން ސޯޝަލް މީޑިއާގެ އެކި ޕްލެޓްފޯމްތަކުގައި އޭނާ ޕްރޮމޯޓްކުރަން ފެށި އެވެ. އެއާ އެކު ގިނަ ބަޔަކަށް އިމާދު އެނގި، ސްޕޯޓްސް ފިޝިންއަށް އޭނާގެ އެހީ ހޯދަން ފެށީ އެވެ.
"ސްޕޯޓްސް ފިޝިން" އަށް ރާއްޖޭން ބޭރުން އިމާދު ކައިރިއަށް
ސްޕޯޓްސް ފިޝިން ދަސްކުރަން ދިވެހިން ވެސް އިމާދު ކައިރިއަށް ދާއިރު ސީދާ ރާއްޖޭން ބޭރުން ވެސް އޭނާ ކައިރިއަށް މީހުން މިހާރު އާދެ އެވެ.
"މިހާރު މީހުން އާދޭ ދަސްކުރަން ވެސް. ރަށުގައި ހުއްޓަސް ގުޅާފައި ބުނާނެ ދަސްކޮށްދޭން، މާލެ އަޔަސް ދަސްކުރަން އަންނާނެ. ޒުވާނުން ހާއްސަކޮށް ވަރަށް ގަޔާވާ ކަމަކަށް ވަނީ. ވަރަށް ކުރަން ބޭނުންވާ ކަމަކަށްވެފައި މިހާރު މި އޮތީ މިކަންވެސް،" އޮސްޓްރޭލިއާގެ ޒެއިކަލް ފިޝިން އަދި ކާސްޓް މޯލްޑިވްސްގެ އެމްބެސެޑަރުކަން ވެސް ކުރަމުން އަންނަ އިމާދު ބުންޏެވެ.
ދިވެހިންގެ ތެރޭގައި މި މަސައްކަތް ދަސްކޮށްގެން އާމްދަނީ ހޯދައި އެތައް ބަޔަކު އެބަ އުޅެ އެވެ. އިމާދު ބުނި ގޮތުގައި ސްޕޯޓްސް ފިޝިން އަށް ބައެއް މީހުން ދެތިން ލޯންޗު ވެސް އެބަ ގެންގުޅެ އެވެ.
ޢިމާދު މިހާރު އާމްދަނީ ހޯދަނީ ކުޑަހުވަދުއަށް ދާ ގްރޫޕްތަކާއި ކައިރި ރިސޯޓްތަކަށް ދާ ޓޫރިސްޓުން ގޮވައިގެން ސްޕޯޓްސް ފިޝިންއަށް ގޮސްގެންނެވެ. އޭނާ ގަބޫލުކުރާ ގޮތުގައި އޭނާގެ މަސައްކަތް މީހުން ބަލައިގެންކަން އެންމެ ބޮޑަށް އެނގެނީ ރާއްޖެއިން ބޭރުން މީހުން، ހަމައެކަނި މަހަށް ދިއުމުގެ ބޭނުމުގައި އޭނާގެ ކައިރިއަށް އަންނާތީ އެވެ.
"އެކި ގައުމުތަކުގެ މަސްވެރިން އަދި މަސް ބާނަން ދަސްކުރަން ބޭނުންވާ މީހުން އެބަ އާދޭ ކުޑަހުވަދޫއަށް. މިހާރު ކުރާ ކަމަކީ ދަސްކުރަން ބޭނުންވާ މީހުން ރަށަށް ގެނެސް ގެސްޓްހައުސްތަކުގައި ބައިތިއްބައިގެން އެ މީހުން ގޮވައިގެން މަހަށް ދަނީ،"
މަޖަލަށް ކުރިޔަސް ރަނގަޅު ފުރުސަތު އެބަ އޮތް
ސްޕޯޓްސް ފިޝިންއަށް އެއްކޮށް ހުސްވެގެން އެ މަސައްކަތްކުރާ މީހުންގެ އަދަދު އިތުރުވަމުން އައި ނަމަވެސް އެ މަސައްކަތުގައި އުޅޭ މީހުންގެ ކަންބޮޑުވުމެއް އެބަ އޮތެވެ.
"ބައެއް ފަހަރަށް ރިސޯޓުތަކަށް އަންނަ ގެސްޓުން ސޯޝަލް މީޑިއާއިން ފެނިގެން މެސެޖުކުރާނެ. ދަތުރުކޮށްދޭން ނުވަތަ މަހަށް ދާން ބުނާނެ. އެކަމަކު ބައެއް ރިސޯޓުތަކުން ހުއްދައެއް ނުދޭ އެ މީހުން ގޮވައިގެން ދާކަށް. ގެސްޓުން ވަކިން ޕޭކުރާ ގޮތަށްވެސް ރިސޯޓުތަކުން ބޭނުން ނުވޭ ފޮނުވާކަށް. އެ މީހުން ބުނަނީ ރިސޯޓުން ޗެކްއައުޓްވެފައި ދެނޭ ދެވޭނީ."
އެ މީހުން ބުނަނީ އެހާ ގިނައިން ޓޫރިސްޓުން އަންނައިރު، ސްޕޯޓްސް ފިޝިންއަށް ރިސޯޓްތަކުން އެހެން މީހުންނަށް ފުރުސަތު ހަނިކުރާ ކަމަށެވެ. އެހެންވެ މި ހުރަސް ނައްތާލުމަކީ ރާއްޖޭގެ އެންމެ ހާއްސަ މަސައްކަތް ކަމަށްވާ މަސްވެރިކަމުން ނަފާ ހޯދަން އިތުރު ބަޔަކަށް ލިބޭ ފުރުސަތަކަށް ވާނެ އެވެ.
އިމާދު ބުނީ އޭނާ އަކީ ވެސް ސްޕޯޓްސް ފިޝިން މީގެ ކުރިން އެހާ ސީރިއަސްކޮށް ނެގި މީހެއް ނޫން ކަމަށާއި ފުލުހަކަށް އުޅެފައި މަސްވެރިކަމަށް ހުސްވެދާނެ ކަމަށް ހިތަށް ވެސް ނާރާ ކަމަށެވެ. މިހާރު ހުރިހާ އުންމީދުތަކާއި މުސްތަގުބަލް ވެސް އޮތީ މިކަމާ ގުޅިފަ އެވެ. މިކަން ކުޅިވަރަކަށް ނުވި އެވެ.