ވޭމަންޑޫގައި އުޅޭ ފްރާންސްގެ އަންހެންމީހާ، އޭނާގެ ތިން ކުދިންނާއެކު.
15 ޑިސެމްބަރ 2024 - 09:10
179 comments
ފްރާންސްގެ މުސްލިމް އެ އާއިލާ ދިރިއުޅެމުން އަންނަ ތ. ވޭމަންޑޫ މީހުންނަކާ މާ ބޮޑު ގުޅުމެއް ނުބާއްވަ އެވެ. ރަށުގެ ބައެއް މީހުން ބުނާގޮތުން އެ ދެމަފިރިންނާއި އެ މީހުންގެ ފަސް ކުދިންގެ ފަރާތުން ވެސް އުނދަގުލެއް ނުފޯރަ އެވެ. ފިރިހެން މީހާ މަހަށް ގޮސްގެން އާމްދަނީ ހޯދާއިރު، ކެއްކުމަށް ބޭނުންވާ އެއްޗެހި ހޯދަން ވަލަށް ދަނީ އަންހެންމީހާ އެވެ. އެކަމަކު، ރަށުގެ ގެއެއް ކުއްޔަށް ނަގައިގެން ދިރިއުޅެމުންދާ އެ މީހުންނާ މެދު ވޭމަންޑޫގެ އާންމުންގެ ކަންބޮޑުވުން ވަކި ކުޑައެއް ނޫނެވެ.
މީގެ 12 އަހަރު ކުރިން އެ ދެމަފިރިންނާއި އޭރު އެ މީހުންގެ ތިބި ތިން ކުދިންނާ އެކު ރާއްޖެ އައީ ޓޫރިސްޓު ވިސާގަ އެވެ. ނަމަވެސް، ތިން މަސް ދުވަހުގެ އެ ވިސާގެ މުއްދަތު ހަމަވިއިރު ވެސް އެ މީހުންނަށް ރާއްޖެއިން ފުރޭ ގޮތެއް ނުވި އެވެ. އެންމެ ފަހުން ރާއްޖޭގައި "ވަޒަންވެރިވީ" އެވެ. ޓޫރިސްޓު ވިސާގެ މުއްދަތު ހަމަވި ވަގުތުން ފެށިގެން އެ މީހުން ރާއްޖޭގައި އުޅެމުން އެ ދަނީ ގާނޫނާ ހިލާފަށެވެ.
އެ އާއިލާއާ ގުޅޭ މައުލޫމާތު އެނގޭ ބައެއް މީހުން ކިޔައިދިން ގޮތުގައި، ފްރާންސްގެ އެ ދެމަފިރިން އިސްލާމްވުމަށް ފަހު، އެ ގައުމުގައި ދިރިއުޅެން އުނދަގޫވުމުން އެ މީހުން އެންމެ ފުރަތަމަ ދިޔައީ އިނގިރޭސި ވިލާތަށެވެ. ރާއްޖެ އައީ އޭގެ ފަހުންނެވެ. ރާއްޖެ އައިސް ފުރަތަމަ ދިޔައީ ގދ. ތިނަދުއަށެވެ. އޭގެ ފަހުން ލ. އަތޮޅުގައި އުޅުމަށް ފަހު ތ. ތިމަރަފުއްޓަށް ބަދަލުވި އެވެ.
ނަމަވެސް އެ ރަށުގައި ހަރުކަށި ފިކުރުގެ ކަންތައް ބޮޑު ކަމަށް ބުނެ ވޭމަންޑު އަށް ބަދަލުވިތާ ވެސް މިހާރު ހަ އަހަރު ވެއްޖެ އެވެ.
އެ ދެމަފިރިންގެ އެންމެ ހަގަށް ތިބި ދެ ކުދިން ވިހެއީ ވެސް ވޭމަންޑޫގަ އެވެ.
ތ.ވޭމަންޑޫގެ އަތިރި މަތި.
އެ ދެމަފިރިންގެ ތިބި ދެ އަންހެން ކުދިންގެ ތެރެއިން އެކަކު "މިހާރު" ގެ ޓީމަށް މިދިޔަ ފެބްރުއަރީ މަހު ދިން ޖަވާބުން އެ އާއިލާ އެނބުރި ފްރާންސަށް ދާން ބޭނުން ނުވާ ކަން އެނގެ އެވެ. އެ އަންހެން ކުއްޖާ ބުނީ ފްރާންސަށް އެނބުރި ދާން ބޭނުން ނުވާ ކަމަށާއި އެ ތަނަށް ހިނގައްޖެ ނަމަ ދާން ޖެހޭނީ ޖަލަށް ކަމަށެވެ.
ކަންބޮޑުވުން ފާޅުކޮށް، ވޭމަންޑޫން ވާހަކަ ދެއްކި މީހުން ބުނީ ވިސާ ނެތުމުން އެ ކުދިން ސްކޫލަށް ނުފޮނުވައި ކިޔަވައިދެނީ ގޭގައި ކަމަށެވެ.
"ގާނޫނުގައި ވެސް ބުނަނީ ކިތަންމެ ބޮޑު ކުށެއް ކޮށްފައި ހުރި ކުއްޖަކަށް ވިއަސް އެ ކުއްޖާގެ ކިޔެވުމަކަށް ހުރަސް ނޭޅޭނެ ގޮތަށޭ ތަންފީޒީ މަރުހަލާގައި އިދާރާތަކުން ކަންތައް ކުރަން ޖެހޭނީ. މި ދައްކަނީ ކުޑަކުދިންތަކެއްގެ ވާހަކަ. ރާއްޖޭގައި އެސައިލަމް ސީކް ކޮށްގެން ތިބި ބައެއް ނޫން،" އޭނާ ބުންޏެވެ.
"ވިސާ މައްސަލަ އުޅުނަސް ސްކޫލަށް ދިއުމުގެ ފުރުސަތު ދޭން ޖެހޭނެ ނޫނީ ފޮނުވާލަންވީ. މި ތަނުގައި އެ މީހުން ތިބެން ފުރުސަތު ދެންޏާ އެ މީހުންނަށް އެ ހައްގުތައް ލިބެން ޖެހޭނެ. އެހެން ނޫނީ ފޮނުވާލާ."
އެ ފިރިހެން މީހާއަކީ ފްރާންސްގައި ކުރިން ގޭންގެއްގައި އުޅުނު މީހެއް ކަމަށް، އޭނާ އަމިއްލަ އަށް ރަށުގެ ބައެއް މީހުން ކައިރީގައި ބުނެފައި އެބަހުއްޓެވެ. ނަމަވެސް އިސްލާމްވި ފަހުން އެ އުޅުން ދޫކޮށްލާފައިވާ ކަމަށް ވެސް ބުންޏެވެ.
އެނގިފައިވާ ގޮތުގައި އެ މީހުން ރާއްޖޭގައި ދިރިއުޅެން ވިސާ ނެގުމަށް ވެސް އަދި ދިވެހި ރަށްވެހިކަން ހޯދަން ވެސް އުޅުނެވެ. އެކަމަކު، ސެޓްފިކެޓެއް ނެތުމުން އެ މަގު ވެސް ބަންދުވީ އެވެ. އަންސްކިލްޑް ލޭބާއަކަށް ވުމުން ވިސާ ލިބޭނީ ސީދާ އެ މީހާއަށެވެ. އާއިލާގެ އިތުރު ބަޔަކަށް ނުލިބޭނެ އެވެ.
ދޯނީގައި، ބެލެނިވެރިއަކާ ނުލައި އެހެން މީހުންނާ އެކު އެ ކުއްޖާ މަހަށް އެބަ ފުރާ ދަންވަރު ވެސް. އެ އާއިލާ ދިރިއުޅެނީ އެ ކުއްޖާ އަށް ވެސް ލިބޭ އާމްދަނީ އަށް ވުމުގެ ފުރުސަތު އެބައޮތް،"--- ރަޝްވާން
ވޭމަންޑޫން ވާހަކަ ދެއްކި އެހެން މީހަކު ބުނިގޮތުގައި، މޫނު ބުރުގާ އަޅައިގެން އުޅޭ އެ އަންހެން މީހާ ބޭރުތެރޭގައި އުޅެނީ ވަރަށް މަދުންނެވެ. އެކަމަކު، އެ ދެމަފިރިންގެ ކުދިން ބޭރުތެރޭގައި ވަރަށް ގިނައިން އުޅޭ ކަމަށް ބުންޏެވެ. އެ ކުދިންނާ މެދު ވެސް ވޭމަންޑޫގެ މީހުން ކަންތައް ކުރަނީ ވަރަށް ރަނގަޅަށް ކަމަށް ވިއަސް، އެ ރަށުގައި ދިރިއުޅޭ ސަބަބެއް ނޭނގޭ ކަމަށް ބުންޏެވެ.
"ދިވެހި ބަހުން އެ ކުދިން ވާހަކަ ދައްކާނީ ވެސް، އެއްވެސް އުނދަގުލެއް ނުކުރޭ. ވަރަށް ޕީސްފުލްކޮށް އުޅެނީ. މި ތަނަށް އައިސް އުޅެނީ ކީއްވެގެން ކަމެއް ނޭނގޭ. ބަރާބަރަށް މިސްކިތަށް ވެސް އަރާ. އެކަމަކު އަހަރެމެން ވެސް އުފެދޭ ސުވާލަކީ ކީއްވެގެން ހެއްޔޭ މި ކޮޅުގައި އެ އުޅެނީ ވިސާ ނެތި،" އޭނާ ބުންޏެވެ.
ކަމާގުޅޭ ހުރިހާ އިދާރާއެއްގެ ސަމާލުކަމަށް ގެނައިން
ވޭމަންޑޫ ކައުންސިލްގެ ރައީސް ރަޝްވާން އާދަމް ވިދާޅުވީ ގަވާއިދުގެ ތެރެއަށް އެ އާއިލާ ވެއްދުމަށް ކައުންސިލުން، ކަމާގުޅޭ ފަރާތްތަކަށް ހުށަހަޅައިގެން އެތައް މަސައްކަތެއް ކޮށްފައިވާ ކަމަށެވެ. އޭގެ ތެރޭގައި ފުލުހުންނާއި އެމްއެންޑީއެފް އަދި ހޯމް މިނިސްޓްރީއާ އެކު މީގެ ކުރިން ބޭއްވި ބައްދަލުވުންތަކުގައި ކައުންސިލުން ވަނީ އެ މައްސަލަ ނަގައިފަ އެވެ.
ވޭމަންޑޫގައި އުޅޭ ފްރާންސްގެ ދެ ކުދިން.
ނަމަވެސް، ގަވާއިދާ ހިލާފަށް އެހާ ދިގު މުއްދަތެއް ވަންދެން ރާއްޖޭގައި އުޅެފައި ހުރުމުން ޖޫރިމަނާ ފީގެ ގޮތުގައި ބޮޑު އެއްޗެއް ދައްކަން ޖެހުމަކީ އެއް ސަބަބު ކަމަށް ބަލައި އެކަން ކުރިއަކަށް ނުގެންދެވުނެވެ.
ވޭމަންޑޫން ވާހަކަ ދެއްކި އެހެން މީހުންނެކޭ އެއްގޮތަށް ރަޝްވާންގެ ވެސް އެންމެ ބޮޑު ކަންބޮޑުވުމަކީ ކުޑަކުދިންގެ އަސާސީ ހައްގުތައް ގެލިގެން ދިއުމެވެ.
"އެންމެ މުހިއްމު ކަންތައް، ތައުލީމާއި ސިއްހީ ހިދުމަތް. މި ހިދުމަތްތައް ސައްހަ ޑޮކިއުމެންޓެއް ނެތުމުގެ ސަބަބުން މި މީހުންނަކަށް ނުލިބޭ،" ރަޝްވާން ވިދާޅުވި އެވެ.
އޭނާ ވިދާޅުވި ގޮތުގައި އެ އާއިލާގައި ދޮއްޓަށް ހުންނަ 16 ވަރަކަށް އަހަރުގެ ފިރިހެން ކުއްޖާ ވެސް މަހަށް ގޮސްގެން އާމްދަނީ ހޯދަ އެވެ. ނަމަވެސް ކަންބޮޑުވާ ބައިވަރު ކަންތައްތައް އޭގެ ތެރޭގައި އެބަހުރި ކަމަށް ކައުންސިލުން ބުންޏެވެ.
"ދޯނީގައި، ބެލެނިވެރިއަކާ ނުލައި އެހެން މީހުންނާ އެކު އެ ކުއްޖާ މަހަށް އެބަ ފުރާ ދަންވަރު ވެސް. އެ އާއިލާ ދިރިއުޅެނީ އެ ކުއްޖާ އަށް ވެސް ލިބޭ އާމްދަނީ އަށް ވުމުގެ ފުރުސަތު އެބައޮތް،" ރަޝްވާން ވިދާޅުވި އެވެ.
މޯލްޑިވްސް އިމިގްރޭޝަނުން ބުނީ މިއީ ބަލަމުން އަންނަ މައްސަލައަކަށް ވާތީ އިތުރު މައުލޫމާތު މީޑިއާއާ ހިއްސާ ކުރެވެން ނެތް ކަމަށެވެ. އެކަމަކު، އެއްވެސް ވިސާއެއް ނެތި 12 އަހަރު ވަންދެން ބޭރު އާއިލާއެއް ރާއްޖޭގައި ދިރިއުޅުމަކީ ކޮންމެ ސަރުކާރަކުން ވިޔަސް ހައްލެއް ހޯދަންޖެހޭ ކަމެކެވެ. ކޮންމެވެސް ބައެއްގެ އިހުމާލުގެ ސަބަބުން އެކަން އޮތީ އަތުން ދޫވެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަލް ދޫއްތޫރު ބަކުރުބެ.
16 December 2024
ބޯޓަކުން ރާއްޖޭގެ ކަޑުގެ ސަރަހައްދަށް އެއްލާލި ކެންޏާ ކުއްޖަކަށް މައުމޫނުގެ ވެރިކަމުގައި ހޯމްމިނިސްޓަރ އުމަރު ޒާހިރު އޯގާތެރިވެ ވަޒީފާ ދެއްވި . ފުރާންސް އާއިލާ އިން ރާއްޖެއަށް އުފަންވި ކުދިން ބޮޑެތިވެ ދިވެހި މަސްވެރިންނަށްވެ ރާއްޖޭގައި އުޅެވުނީ ސަރުކާރު ތަކުގެ އިހުމާލުން. ވީމައި ރާއްޖޭގައި ދިރިއުޅުމުގެ އިސްތިސްނާ ހައްގެއް އިންސާނީ ހައްގަށް ޓަކައި ވެސް ދައުލަތުގެ މައްޗަށް ވާޖިބުވާކަމެއް. ވަރަށް ސީޜިއަސް އިސްތިނާ ހާއްސަ ހާލަތެއް
ހުސޭން
16 December 2024
މުސްލިމަކަށް ވުމަކީ މި ގައުމުގެ ގާނޫނު ތަކާއި ގަވާއިދު ތަކާއި ޚިލާފަށް އުޅެން ލިބޭ ހުއްދަ އެއްނުން. އެ މީހުން ގާނޫނުގެ ތަރަހައަށް ވެއްދީމާ ނިމުނީ. އަޅެ ނިކަން ފްރާންސަށް ގޮސް ތިގޮތާށް އުޅެބަލަ. ދެން މި ގައުމުގައި ކިހިނެއްހޭ މިއުޅެވެނީ. އެއްވެސް ހާލަތެއްގައި މި އާއިލާ އަށް އެއްވެސް ދެރަގޮތެއް ވެގެންނުވާނެ. ނަމަވެސް އަހަރުމެން އެންމެން އުޅެން ހަދާފަހުރި ގާނޫނުގެ ތަރަަހައިގެ ތެރޭގައި އުޅޭށޭ.
ރަބަތު
17 December 2024
ފްރާންސުން އެގައުމަށް ރަށްވެހިކަން ހޯދަންދާ މީހުންނަށްް ރަށްވެހިކަން ދޭތީ އެފްރިކާ ބައްރަށް ނިސްބަތްވާ އެތައްބަޔަކު ފްރާންސްގެ ރަށްވެހީންގެ ގޮތުގައި އުޅެނީ. ދިވެހިން ދިޔަސް ދޭނެ. އެކަމަކު ފްރާންސް އެއީ އެންމެ ސެކިއުލަރ އެއް ގައުމު. ނިގާބް އެޅުން ކަހަލަ ކަންކަން މަނާ ގައުމެއް. ފަލަސްތީން މުސްލިމަކަސް ފްރާންސް މުސްލިމަކަސް މި އެއް އުއްމަތެއް. އެއްބަޔަކަށް ހެޔޮއެދިފަ އަނެއްބަޔަކު ބާކީ ކޮށްނުލާ.ގާނޫނާ ހިލާފްވީ ސަރުކާރުގެ އިހުމާލުން
ވިސްނޭ
16 December 2024
މުސްލިމުންނަށް އަޅާލާ..އެހީތެރިކަންދީގެން ވިޔަސް ބައިތިއްބަން ޖެހޭ..އުމުރުދުވަހު ރާއްޖޭގެ ރައްޔިތުކަން ދިނުމައްގޮވާލަން..މުސްލިމު އާއިލާއަށް ގެއްލުންވާގޮތަށް އެކަން ނުކުރުމަށް އެދެން...
ސުވާލު ބަސް
16 December 2024
މިގޮތައް ކުދިންގެ ފޮޓޯ ޖަހާފައި ޙަބަރު ލިޔެވޭތަ؟ ކުޑަކުދިން ވިއްޔާ ހަމަ ޢެއް ޤާނޫނެއް ދޯ ހިނގާނީ
ރައްޔިތުމީހާ.
16 December 2024
ކޮބައިތަ މައްސަލައަކީ؟ މުސްލިމުންނަށް އިސްލާމީ ހުރިހައި ދައުލަތްތައް އޮންނަން ޖެހޭނީ ހުޅުވައިލެވިފައި. އިންތަކާއި ޕާސްޕޯޓުތައްފަދަ ތަކެއްޗަކީ އެނޫން ބަޔަކު ހަދައިގެން އުޅޭ އެއަށް އިސްލާމީ ޤައުމުތަކުގެ ވެރިން ފަހުން ތަބާވެގެން އުޅޭ އެއްޗެހި. އެ އުޞޫލުތަކަށް ނުބަލައި އިސްލާމީ ހަމަތަކުން ވެރިން ދޫދޭންޖެހޭ ކަހަލަ މުހިންމު ޙާލަތްތައް އަންނާނެ. ދީނީ މަޞްލަޙަތު ގެއްލޭ ކަންކަމުގައި އިމާގުޅޭ ގަވާއިދުތައް ތަންފީޒުކުރެވިގެންނުވާނެ.
ހޮޓްކިންގ
16 December 2024
އެމީހުން ފޮނުވާލުމާ ދިވެހިން ދެކޮޅު. މުއިއްޒަކީ ދިވެހިންދެކެ ލޯބިވާ ވެރިއެއްނަމަ ގަވާދެއްގެ ތެރެއިން ޙައްގުތަކެއް ލިބޭގޮތަށް އެމީހުން މިރާއްޖޭގާ ދިރިއުޅުނަދީ. ފޮނުވާ ލައިފިނަމަ ބޮޑު އަނިޔާއެއް އެއާއިލާއަށް ލިބުން އެކަށީގެންވޭ.
ޒުމީ
15 December 2024
ފުރާންސަށް ތި އާއިލާ ޑިޕޯޓު ކުރުމަކީ އިޒުރޭލާ ހަވާލުކުރުން ކަހަލަ ކަމެއް. މުސްލިމުންނަށް ވަރައް އިހާނެތި ތަނެއް ފުރާންސަކީ! އެ 5 ކުޑަކުދިން ހާލުގައި ޖައްސަން ނޫޅެ!! ވިސާ ނެތި އުޅޭ އެތައް ބަންގާޅިއެއް ބޭރު ނުކޮއް މި 5 ކުދިންނާ އެކުދިންގެ މައިންބަފައިން ޑިޕޯޓު ކުރަން ހިފާނެކަމެއްނެތް. މަ އެކަނިވެސް ނުކުންނާނަން މުޒާހަރާއަށް އޭރުން! ރައްރަށުގައިވެސް މުޒާހަރާ ޖައްސާ! ގައިމުވެސް ސިޔާސީ ޕާޓީތަކުގެ އެއްވުން ތަކައް ދިއުމައްތުރެ މާ ރަނގަޅުވާނެ އެކަން.
ވައިއި
15 December 2024
އެމީހުން ފްރާންސަށް ނުފޮނުވާތި! ޕްލީޒް! ފްރާންސް ސަރުކާރުން މުސްލިމުންނަށް ވަރަށް އަނިޔާވެރި... ކޮންމެ ވެސް ގޮތެއް ހަދައިދީ! ޕްލީޒް! ޕްލީޒް! ވަރަށް ހިތާމަވެރި
އަލީ.
15 December 2024
12 އަހަރު އިސްލާމު ވުމައްފަހު ރާއްޖޭގަ އުޅެފަހުރި އާއިލާއެއް ފޮނުވާލައިގެން ނުވާނެ އަމުދުން އެހާ ރާއްޖެދެކެ ލޯބިވާ އަހަރުމެންމީ އެއްހަށިގަނޑެއްގެ ބަޔެކޭ ހުތުބާގަލިޔެފަ ތިހިރީ ކަންކުރާގޮތް އެމީހުންނައް ގޯއްޗެއްދީފަ ވަޒަންވެރިކުރުވާ
ޙަކީމް.
15 December 2024
އެތިބަ ކުދިންގެ ފަރާތުން ރާއްޖެޔައް ފައިދާއެއް ކޮއްފާނެ މޮޅެތި ކުޅުންތެރިންނައްވެ ރާއްޖެޔައް ރީތިނަންލިބި ފަތުރުވެރިކަމައް ހެޔޮއަސަރުކޮއް އެތައް ކާފަރުންނެއް އިސްލާމްވުމައް މަގުފަހިވެދާނެ މިފަދަ ރަނގަޅު އާއިލާއެއް ރާއްޖޭގެ ރައްޔިތުކަން ބޭނުންނަމަ އެފުރުސަތު ދިނުންއެއީ ދީނީގޮތުން ހަރާންކަމެއްނޫން ވީމާ ބޯދާވިސްނުން ދޫކޮއް އެފުރުސަތު ދިނުން ރަނގަޅު އާއްޖޭގެ އާބާދީ ވެސް އިތުރުވެ ތެލެސީނިޔާ ފަދަ ބަލިތަކުން ދުރުވެ ރާއްޖޭގަ ދޮންއާބާދީއެއްވެސް އުފަންވާނ
އަބްޑޫޅް +
16 December 2024
ދޮން އާބާދީ އަކީ ދޮން ނޫން އާބާދީ އަކަށް ވުރެން އެދެވިގެންވާ އާބާދީއެއްތަ؟ ކަލޭ ތިޔައީ އިސްލާން ރޭސިސްޓެއް. އެކަމަކު، ކަލޭމެން ހައްޖަށް ދިޔައިމަ، އެވެރިން، ޕާސްޕޯޓުއެއްލާލަނީ ތަޅުންގަނޑަށް.