މިހިރީ ފ. ގައި، ވިއްކާލަން އުޅޭހެން ހީ ވެސް ނުވޭ!

އެއް އަތޮޅެއްގައި 10 ބިލިއަން ޑޮލަރުގެ މަޝްރޫއެއް ހިންގުމަކީ އާދައިގެ ކަމެއް ނޫނެވެ. ރާއްޖޭގެ ނިސްބަތުން ބެއްޔަސް، އެއީ ތާރީޚީ ކަމެކެވެ. އެއީ މުޅި ރާއްޖެ އަށް، ވަކިން ޚާއްސަކޮށް އެ އަތޮޅެއްގެ ބަޔަކަށް ލިބޭނެ ވަރަށް ބޮޑު ކުރިއެރުމަކަށް ވާނެ އެވެ. ވަޒީފާގެ ފުރުސަތުތައް އިތުރުވެ އާމްދަނީ ލިބޭނެ މަގުތައް ތަނަވަސް ވާނެ ކަމެކެވެ.

އެހެންކަމުން ރައީސް އަބްދުﷲ ޔާމީން ވިދާޅުވީ ފ. އަތޮޅު މަޝްރޫއަކީ "މީހަކު މޭކަރަން ޖެހޭވަރުގެ ކަމެއް ނޫން" ކަމަށެވެ.

އަޅުގަނޑު މިހިރީ ރާއްޖޭގައި އެ އަތޮޅެއްގެ ވާހަކަ މިހާރު ކެނޑިނޭޅި ދެކެވެމުން އަންނަ ފ. އަތޮޅުގަ އެވެ. މި އަތޮޅަކީ ރާއްޖޭގެ އަތޮޅުތަކުގެ ނިސްބަތުން އެހާ ބޮޑު އަތޮޅެއް ނޫނެވެ. މުޅި އަތޮޅުގައި ވެސް އޮތީ އެންމެ 23 ރަށެވެ. އެތެރެވަރީގައި ކުޑަކުޑަ ދެތިން ފަޅުރަށެއް ނޫނީ ނެތަސް ގިރިތަކާއި ހާހަލާއި ފަޅުތައް އެބަ ހުއްޓެވެ. މީހުން ދިރިއުޅެނީ އެންމެ ފަސް ރަށުގަ އެވެ. ރިސޯޓެއްގެ ގޮތުގައި ހިންގަނީ އެންމެ ރަށެކެވެ. މުޅި އަތޮޅުގެ އާބާދީގައި ފަސް ހާސް ހަމައެއް ނުވެ އެވެ.

"މި އަތޮޅުގެ ރަށްތައް ކިތަންމެ މަދަސް، މުޅި ރާއްޖޭގެ ވެސް އެންމެ ރީތި އެއް ރަށް އޮތީ މި އަތޮޅުގައި. އެއީ ހިމިތި. އެވަރުގެ ހިތްގައިމު ރީތި ފަޅެއް މަދުވާނެ ރާއްޖޭގައި. މި އަތޮޅަށް އަންނަ ކޮންމެ މީހަކު ހިތް ކިޔާނެ އެ ރަށަށް،" ނިލަންދޫ ސްކޫލްގެ ޓީޗަރެއް ކަމަށްވާ އަބްދުއްރަޝީދު ވިދާޅުވި އެވެ.

ސައޫދީ އަރަބިއްޔާގެ ޝާހީ އާއިލާގެ ބޭފުޅަކަށް ފ. އަތޮޅުން ބައެއް މިލްކު ކޮށްދޭން އުޅޭ ވާހަކަ ތުންތުންމަތިން ދެކެވެމުން ދާއިރު، ގިނަ ބަޔަކު ބުނަނީ އެއީ އެ އަތޮޅު ހިމިތީ ކަމަށެވެ. އެހެންކަމުން ރާއްޖޭގެ އެންމެ މަތީ މަސްލަހަތު މިހާރު ގުޅިފައި އޮތީ ފ. އަތޮޅާ އެވެ.

ސިޔާސީ ގޮތުން ކިރައިލުމުން އެ މަޝްރޫއުގެ ނަތީޖާ ކޮންމެ ގޮތަކަށް ފެނުނު ކަމުގައި ވިޔަސް، މި އަތޮޅުގެ ތެރެއިން ފެންނަނީ މުޅިން އެހެން މަންޒަރެކެވެ. މި އަތޮޅުގެ ވެރިކަން ކުރާ ރަށް، ނިލަންދޫގެ ވެސް ވަރަށް މަދު މީހެއްގެ ދުލުން ނޫނީ އެކަމާ ދެކޮޅަށް ވައްބަހުން ވިޔަސް ބަހެއް ބުނެލާ އަޑެއް ނީވެ އެވެ.

ފ. އަތޮޅު ކައުންސިލްގެ ކުރީގެ ޒިންމާދާރު ވެރިޔާ މުހައްމަދު ޖަލީލް ވިދާޅުވި ގޮތުގައި އެ އަތޮޅުގެ ރައްޔިތުންނަކީ އެއް އިރެއްގައި ވެސް އަތޮޅުގެ ތަރައްގީ އަށް ހުރަސްއެޅި ބައެއް ނޫނެވެ. އެހެންކަމުން ފ. އަތޮޅު މަޝްރޫއުގެ މައްސަލައިގައި ވެސް އެ އަތޮޅުގެ ވަރަށް މަދު މީހަކު ނޫނީ ތިބީ ހިތްހަމަޖެހި އެކަން ބަލައިގަނެގެންނެވެ.

"ރާއްޖޭގައި ކަންތައް ހިނގާ ގޮތަށް ބަލާއިރު، ކޮންމެ ބަޔަކު އިދިކޮޅުގައި ތިއްބަސް ސަރުކާރުން ކުރާ އެއްވެސް ކަމެއް އިދިކޮޅު ފަރާތްތަކަށް ނުވޭ ރަނގަޅެއް. އޭގައި އެމްޑީޕީއެއް ޕީޕީއެމެއް ވަކި ތަފާތެއް ނެތް. އެ އުސޫލުން މި މަޝްރޫއު ވެސް އެމީހުން އެ ގޯސް ކުރަނީ. އެކަމަކު ސަރުކާރަކުން ކުރާ ހުރިހާ ކަމެއް ގޯސްވާނެ ކަމަކަށް އަޅުގަނޑަށް ގަބޫލެއް ނުކުރެވޭ،" އޭނާ ވިދާޅުވި އެވެ.

"އަޅުގަނޑަށް ފ. އަތޮޅުގެ މަޝްރޫއާ މެދު ކަންބޮޑުވުމެއް ނެތީ، ކޮންމެ ގޮތެއްގައި ވިޔަސް މި އަތޮޅަށް މި އަންނަނީ ސައްތަ އިން ސައްތަ މުސްލިމް ގައުމެއްގެ ބައެއް. އަޅުގަނޑުގެ ނަޒަރުގައި (ސައޫދީ ރަސްގެފާނަކީ) ދުނިޔޭގެ މުސްލިމުންގެ ވެރިމީހާ އެއީ. އެހެންވީމާ އަޅުގަނޑުމެންނަކީ ސައްތަ އިން ސައްތަ އިސްލާމީ ގައުމަކަށް ވާއިރު، އަޅުގަނޑުމެންގެ ރައްޔިތުންނަށް ނިކަމެތިވާނެ އެއްވެސް ކަމެއް އެމީހުން ނުކުރާނެ ކަމުގެ ވަރަށް ބޮޑު އިތުބާރެއް، މުސްލިމުން ކަމަށް ވީމާ، އަޅުގަނޑުގެ ހިތުގައި އޮވޭ."

ޖަލީލު ވިދާޅުވީ ފ. އަތޮޅު މަޝްރޫއުގެ ވާހަކަ ދެއްކުމުގެ މާ ކުރިން ވެސް ރާއްޖޭގެ ކިތަންމެ ރަށެއް މީހުންގެ އަމިއްލަ މިލްކުގެ ގޮތުގައި ނަގައިގެން ރިސޯޓްތައް ހިންގަމުން އަންނަ ކަމަށެވެ.

"ވިއްކައިގެން ނޫން ކަމަށް ވިޔަސް، 99 އަހަރަށް ކުއްޔަށް ދީފައި މި ހުންނަނީ ރަށްތައް. ބަލަމާ ހިނގާ 99 އަހަރު ވުމަށް ފަހުގައި ވެސް، އާންމު ގޮތެއްގައި އެ ތަނެއްގައި ތިބި ބަޔަކު އެމީހުންގެ މިލްކެއްގެ ގޮތުގައި އެރަށެއް ގެންގުޅޭނީ. މިސާލަކަށް، އއ. ކުރަމަތި ކޮން ޒަމާނެއްތޯ ކޮލިގޭ މީހުންނަށް އޮންނަތާ؟ ކާކުތޯ އެކަމާ ކަންބޮޑުވަނީ؟ އެކަހަލަ ކަންތަކަށް ބަލާއިރުގައި އަޅުގަނޑުގެ ކަންބޮޑުވުމެއް ނެތް ފ. އަތޮޅުން ބައެއް ސައޫދީ ބަޔަކަށް ދިނުމަކުން،" ޖަލީލް ވިދާޅުވި އެވެ.

މަގޫދޫ ކައުންސިލް އިދާރާގެ ޑެޕިއުޓީ ޑިރެކްޓަރު މިގްދާދު އާދަމް ވެސް ވިދާޅުވީ އެ ރަށުގައި ވެސް އެ މަޝްރޫއަށް ދެކޮޅު ހަދާ މީހަކު ވަރަށް މަދު ކަމަށާއި "އެންމެން ވެސް އެކަމާ އުފާ ކުރާނެ" ކަމަށެވެ. އަދި ބައެއްގެ ހިތުގައި ސުވާލުތަކެއް އުފެދެނީ ވެސް ސިޔާސީ ބޭނުމެއްގައި ބަޔަކު ދައްކާ ދޮގު ވާހަކަތަކެއްގެ ސަބަބުން ކަމަށް އޭނާ ވިދާޅުވި އެވެ.

"މީގައި ވާ ގޮތަކީ އިދިކޮޅު ފަރާތްތަކުން އަޑު ފަތުރާފައި މި ހުންނަނީ ވަރަށް ގޯސްކޮށް. މި އަތޮޅު ވިއްކާލަނިއްޔޭ، މި އަތޮޅުގެ ރަށްރަށުން މީހުން ބާލަނިއްޔޭ، އެހެން އަތޮޅެއްގެ ބަޔަކަށް ވެސް މި އަތޮޅަށް ދެން ނުވަދެވޭނެ ވާހަކައާ މި ކަހަލަ ވާހަކަތައް ފެތުރީމާ، މި ކޮޅުގައި ތިބޭ މީހުންނަކަށް ނޭނގޭނެ ދެއްތޯ މިވަނީ ކިހިނެއް ކަމެއް. އެ ކަހަލަ ބައިވަރު ވާހަކަތަކެއް މީހުންގެ ހިތްތަކަށް ވައްދައިގެން އެކަމާ ސުވާލު އުފެދިގެން އުޅެނީ ވެސް،" މިގްދާދު ވިދާޅުވި އެވެ.

އޭނާ ވިދާޅުވި ގޮތުގައި ފ. އަތޮޅަށް އަންނަން އުޅޭ ބިޔަ މަޝްރޫއާ މެދު އެ ރަށުގެ ރައްޔިތުން ވެސް ތިބީ ވަރަށް ބޮޑު އުފަލެއްގަ އެވެ.

"މި ކަހަލަ މަޝްރޫއެއް ހިންގަން އަންނަ ކަމަށް ވެއްޖެއްޔާ ހަމަ އެ ކަމަށް މި އަތޮޅުން މަރުހަބާ ނުކިޔާނެ މީހަކު ނުހުންނާނެ. ސަރުކާރުން އެ އޮތީ މިހާރު އެކަން އޮތް ގޮތް ހާމަ ކޮށްފަ. އެއްވެސް ރަށަކުން މީހުން ނުބާލާނެޔޭ، އެއްވެސް ތަނެއް ވިއްކައެއް ނުލާނެޔޭ މިހާރު ބުނެފިތާ. އެހެންވީމާ އިދިކޮޅު އަޑު މި އޮތީ ވަރަށް މަޑުވެފައި މި ރަށުގައި ވެސް."

މި އަތޮޅުގައި ތިބި އިދިކޮޅު ފިކުރުގެ ބައެއް މީހުންގެ ފަރާތުން ވެސް އެނގުނީ ސިޔާސީ ގޮތުން ކޮންމެ ގޮތަކަށް ވާހަކަތައް ހުރި ކަމުގައި ވިޔަސް، ފ. އަތޮޅުގެ މަޝްރޫއަށް އެ މީހުން މުޅިން ދެކޮޅު ނުހަދާ ކަމެވެ. ނަމަވެސް އެ މީހުންގެ ކަންބޮޑުވުންތަކެއް އެބަ ހުއްޓެވެ.

"ބޭރު ބަޔަކަށް ދިގު މުއްދަތަކަށް ދިން ކަމުގައި ވިޔަސް، މިތަނަށް ރަނގަޅު އިންވެސްޓެއް ކޮށްގެން އަންނަ ކަމަށް ވަންޏާ އަޅުގަނޑުމެން ހަމަ މަރުހަބާ ކިޔާނަން، އަޅުގަނޑުމެން ކޮންމެ ކުލައެއްގައި ތިއްބަސް. ރައްޔިތުންނަށް ފާގަތިކަމާ އިތުރު ކުރިއެރުން ލިބޭ ކަމަށް ވަންޏާ އަޅުގަނޑުމެން ދެކޮޅެއް ނުހަދާނަން،" އަތޮޅު ކައުންސިލްގެ ނިލަންދޫ ދާއިރާ އަށް އެމްޑީޕީގެ ޓިކެޓްގައި ވާދަ ކުރައްވާ ނިލަންދޫ އެދުރުގޭ، އަބްދުލްގާދިރު މުހައްމަދު ވިދާޅުވި އެވެ.

އޭނާ ވިދާޅުވި ގޮތުގައި މީގެ ކުރިން ނުކުރާ ވަރުގެ ކަމެއް ސަރުކާރުން ކުރަން އުޅޭ އިރު، އަދި އެއީ ތަރައްގީގެ ކިތަންމެ ބިޔަ މަޝްރޫއެއް ކަމުގައި ވިޔަސް، އެ އަތޮޅުގެ ރައްޔިތުންނާ ހިއްސާކޮށް މަޝްވަރާ ކުރަންވާނެ އެވެ.

"އަޅުގަނޑުމެންގެ އެންމެ ބޮޑު މައްސަލައަކީ އެކަމާ ބެހޭ ގޮތުން އެއްވެސް މައުލޫމާތެއް ނުލިބުން. މަޖިލީހުގައި އަޅުގަނޑުމެންގެ މެމްބަރެއް ވެސް އެބަ ހުރެފައި، އަތޮޅު ކައުންސިލަރުންތަކެއް ތިބެފައި، އެކަހަލަ ބޮޑު ކަމެއް ހިނގާއިރު އޭގެ އެއްވެސް ބޭފުޅެއްގެ ފަރާތުން އަޅުގަނޑުމެންނަށް އެއްވެސް ކަހަލަ މައުލޫމާތެއް ނުލިބުން އެއީ ވަރަށް ބޮޑު މައްސަލައެއް. އަތޮޅުގެ ރައްޔިތުންނާ އެއްވެސް ވަރަކަށް ހިއްސާ ކުރެއްވުމެއް ނެތި އެ ވަރުގެ ބޮޑު ކަމެއް ކުރިއަށް ގެންދިއުމަކީ ދެ ވަނަ މައްސަލަ،" އަބްދުލްގާދިރު ވިދާޅުވި އެވެ.

ބިލަތްދޫ ކައުންސިލް އިދާރާގެ ޒިންމާދާރު ވެރިޔާ މުހައްމަދު ޝިޔާމް ވިދާޅުވި ގޮތުގައި އެ އަތޮޅުގެ އެހެން ރަށްތަކެކޭ އެއްގޮތަށް އެ ރަށުގައި އެ މަޝްރޫއަށް އޮތް ތާއީދު ވަރަށް ބޮޑެވެ. އަދި ބަޔަކު ދެކޮޅު ހަދާ ނަމަ ދެކޮޅު ހަދަނީ އެ މަޝްރޫއު ގޯސްވެގެން ނޫން ކަމަށް ވެސް އޭނާ ވިދާޅުވި އެވެ.

"އަސްލުގައި މި ރަށުގައި ވެސް އަދި މި އަތޮޅުގައި ވެސް އެ ކަމަށް ތާއީދު އެބަ އޮތް ވަރަށް ބޮޑަށް. އެކަމަށް އިދިކޮޅަށް ނުކުންނާނީ 10 ވަރަކަށް މީހުން. އެ މީހުންގެ އަޑު ގަދަވާނެ. އޭގެ ތެރޭގައި އުޅޭނީ ތަންކޮޅެއް ކެރޭ ޒާތުގެ ޒުވާނުންކޮޅެއް. އެހެންވީމާ އިދިކޮޅު އަޑު ގަދަވާނެ. އެ ކަން ގޯސްވެގެން އެކަމާ ދެކޮޅު ހެދުމަށް ވުރެ ބޮޑަށް، މި އޮންނަނީ ސަރުކާރުން ކުރަން އުޅޭ ކަމަކަށްވާތީ އެ ކަމާ ދެކޮޅު ހެދުން. އެކަން ގޯސްވެގެން ދެކޮޅު ހަދަނީކީ ނޫން. އެއްވެސް ބަޔަކު އިދިކޮޅުގައި ތިބޭ އިރު ބޭނުމެއް ނުވާނެ ތަރައްގީގެ މަޝްރޫއުތަކެއް ހިންގައި ކާމިޔާބު ކުރާކަށް،" ޝިޔާމް ވިދާޅުވި އެވެ.

ފ. އަތޮޅުން ބައެއް ސައޫދީ ޝާހީ އާއިލާގެ ބަޔަކަށް މިލްކު ކޮށްދިން ކަމުގައި ވިޔަސް، އެއަތޮޅުގެ ރައްޔިތުންނަށް މާ ބޮޑު ހާސްކަމެއް ނެތެވެ. އޭގެ ބަދަލުގައި އެ މީހުން ދެކެނީ ކުލަ ހުވަފެންތަކެކެވެ. އެމީހުންނަށް ކުރިމަތިން ފެންނަނީ ތަރައްގީގެ ބޮޑެތި މަޝްރޫއުތަކާ އެކު ވަޒީފާގެ ފުރުސަތުތަކާއި އުމްރާނީ އަދި އިގްތިސާދީ ތަރައްގީގެ ދުވަސްތަކެކެވެ.

"އަޅުގަނޑުމެން ގަބޫލުކުރަނީ ހުރިހާ ދާއިރާއަކުން ވެސް އަތޮޅަށް ކުރިއެރުން ލިބޭނެ ކަމަށް. ތައުލީމީ ގޮތުންނާއި ސިއްހީ ގޮތުންނާއި އުމްރާނީ ގޮތުން ވެސް، އަދި ޚާއްސަކޮށް އުމްރާނީ ގޮތުން ވަރަށް ބޮޑު ކުރިއެރުމެއް ލިބޭނެ ކަމަށް. އިގްތިސާދީ ގޮތުން މި އަތޮޅަށް ވަރަށް ބޮޑު ކުރިއެރުމެއް ލިބޭނެ ކަމަށް، އަދި މުޅި ގައުމަށް ވެސް ލިބޭނެ ކަމަށް ގަބޫލު ކުރަނީ. އެއީ ރައީސުލްޖުމްހޫރިއްޔާ އެ ވިދާޅުވި ވަރުގެ އިންވެސްޓެއް މިތާނގައި ކޮށްގެން މަސައްކަތް ކުރާކަމަށް ވިއްޔާ،" ނިލަންދޫ މުހައްމަދު ޖަލީލް ވިދާޅުވި އެވެ.

އެއީ އަޅުގަނޑުމެން ބަލަން ޖެހޭނީ ބޮޑު އިންވެސްޓްމަންޓެއް އަތުވެއްޖެއްޔާ އޭގެ ފައިދާތަކެއް އަޅުގަނޑުމެންނަށް ވެސް ކުރާނެ ކަމަށް. މި އަތޮޅަށް އެވަރުގެ އިންވެސްޓްމަންޓެއް އަތުވެއްޖެއްޔާ މި އަތޮޅުގެ މީހުން ވެސް ވަޒީފާތަކަށް ދާން ބޭނުންވާނެ. މުވައްޒަފުން ހޯދަން ބޭނުންވިޔަސް، އިންވެސްޓް ކުރާ ފަރާތްތަކުން ވެސް އަތޮޅުން ބޭރަށް ދިއުމުގެ ކުރިން އަންނާނީ އަތޮޅުގެ ރަށްރަށުގެ މީހުން ހޯދަން ކަމަށް މި ބަލަނީ. އެހެން ވެއްޖެއްޔާ އެއީ މި ރަށްރަށުގެ މީހުންނަށް ލިބޭ ކިހާ ބޮޑު ފައިދާއެއްތޯ،" މަގޫދޫ ކައުންސިލްގެ މިގްދާދު ވިދާޅުވި އެވެ.

"މި ރަށުގެ މެޖޯރިޓީ އެކަމަކާ ދެކޮޅެއް ނުހަދާ. އެންމެން ވެސް ބޭނުންވާނެ ތަރައްގީ. އަނެއްކާ މި މަޝްރޫއު މި އަންނަނީ ދުނިޔޭގައި އޮތް 100 ޕަސެންޓް އިސްލާމީ އެއް ގައުމުގެ ފަރާތުން. އެހެންވީމާ ވެސް ގިނަ ބަޔަކު ތާއީދު ކުރޭ މި މަޝްރޫއަށް. އެ މަޝްރޫއު މި އަތޮޅުގައި ހިންގަން ނިންމީމާ ވެސް ގިނަ ބަޔަކު މިހާރު ސަރުކާރު ކޮޅަށް އެނބުރިއްޖެ،" ބިލެތްދޫ ކައުންސިލްގެ ޒިންމާދާރު ވެރިޔާ ޝިޔާމް ވިދާޅުވި އެވެ.

ފ. އަތޮޅުގެ ބައެއް މިލްކު ކޮށްދޭން އުޅެނީ ސައޫދީ އަރަބިއްޔާގެ ބަޔަކަށް ކަމަށްވުމީ، މިއަތޮޅުގެ މީހުން ހިތްހަމަޖެހޭ މައިގަނޑު އެއް ސަބަބެވެ. އަދި މި އަތޮޅުގެ ބައެއް މީހުން ގަބޫލުކުރާ ގޮތުގައި ފ. އަތޮޅުގައި ސައޫދީ ޝާހީ އާއިލާ އިން ހިންގާ ބިޔަ މަޝްރޫއާ އެކު، ފ. އަތޮޅަކީ ރާއްޖޭގެ ކުރިމަގުގެ ވެރިރަށް ކަމުގައި ވެސް ވެދާނެ އެވެ.

"ހިމިއްޗަކީ ކުރިން މީހުން އުޅުނު އަދި ވަރަށް އިލްމުވެރިން ގިނަ ރަށެއް. އެ ރަށުގެ ކުރީގެ އިލްމުވެރިން ވަރަށް ޔަގީން ކަމާ އެކު ބުނެފައި އޮންނަ ވާހަކައެއް އޮންނާނެ. އެ ރަށުގެ ފަޅުތެރޭގައި އެންމެ ފުރަތަމަ އުފެދުނީ ކުޑަކުޑަ ފިނޮޅެއް، އެ ފިނޮޅު ހުރާގަނޑަކަށް ބަދަލުވެ ފަހުން ގަސް ފަޅައި ރަށަކަށް ވީ. އެ ރަށަށް މި ކިޔަނީ ތޮފެސްދޫ. އޭރު އެ ރަށުގެ އިލްމުވެރިން ބުނެ އުޅުނު ކަމަށްވަނީ ތޮފެސްދޫ ހިމިއްޗާ ގުޅި ފަޅުތެރެ ބެދުމުގެ ކުރިން ހިމިތީން މީހުން ފައިބައި ރަށް ފަޅުވާނެ ކަމަށް. އެކަން ވީވެސް ހަމަ އެ ގޮތަށް. މިހާރު އެއީ ފަޅުރަށެއް،" ރާއްޖޭގެ ތާރީޚް ދިރާސާ ކުރައްވާ ބޭފުޅެއް ކަމަށްވާ ނިލަންދޫ، ފައުނު، މުހައްމަދު ފަރީދު ވިދާޅުވި އެވެ.

"އެ މީހުން ރަށުން ފޭބުމުގެ ކުރިން ވެސް އެރަށުގެ އިލްމުވެރިން ބުނެ އުޅުނު ކަމަށްވޭ މާ ގިނަ ޒަމާންތަކެއް ނުވަނީސް އެ ރަށް އަލުން އާބާދުވެ މީހުން ދިރިއުޅެން ފަށާނެ ކަމަށް. އަދި ގިޔާމަތް ވާނީ އޭގެ ފަހުން ކަމަށް އެ ރަށުގެ އިލްމުވެރިން ބުނެ އުޅުނު ކަމަށް ވަނީ. އެ ރަށުން އެންމެ ފަހުން ފޭބީ ހުސައިން މަނިކު ކިޔާ މީހެއްގެ އާއިލާއެއްގެ 21 މީހުން. އެ މީހުން އައީ ނިލަންދު އަށް. ހިމިތީ މީހުންނަކީ ނެވި ނިޔަމި ކަމަށާއި ހިސާބު އިލްމަށް ވެސް ވަރަށް މޮޅު ބައެއް،" ފަރީދު ވިދާޅުވި އެވެ.

ސައޫދީ ޝާހީ އާއިލާގެ ބޭފުޅަކަށް ހިމިތީ މިލްކު ކޮށްދިނުމަކީ ފަހަރެއްގައި އެ ރަށް އަލުން އާބާދު ވުމުގެ ފެށުން ކަމުގައި ވެސް ވެދާނެ އެވެ. އެ އުންމީދު ވެސް އޮތުމާ އެކު ފ. އަތޮޅު މަޝްރޫއާ މެދު އެމީހުންގެ ހިތްތަކުގައި ކިލަނބު ކަމެއް ނެތެވެ.