ލީގު ކަޕުން މާޒިޔާ އަށް ތިން ލައްކަ ރުފިޔާ، އޮޑި އަށް 150،000، މަހިބަދުއަށް 50،000

ބުދަ ދުވަހުގެ ރޭ ނިންމާލި އެފްއޭއެމް ލީގު ކަޕްގެ އިނާމުފައިސާގެ ގޮތުގައި ޗެމްޕިއަން މާޒިޔާ އަށް 300،000ރ. ދޭން ކަނޑައަޅައިފި އެވެ.

އޮޑި ސްޕޯޓްސްއާ ދެކޮޅަށް ކުޅެ މާޒިޔާއިން މެޗު ކާމިޔާބު ކުރީ 4-0 ންނެވެ.

ފައިނަލު މެޗަށް ފަހު ދަނޑުގައި ބޭއްވި ހަފުލާގައި ޗެމްޕިއަން ޓީމަށް ތައްޓާއި މެޑަލް އަދި ރަނަރަފް ޓީމަށް މެޑައްޔާއި ފެއާ ޕްލޭ ޓީމަކަށް ހޮވުނު މަހިބަދޫ އަށް ރަމްޒީ ޗެކް ވެސް ހަވާލު ކުރި އެވެ.

ރަނަރަފް، އޮޑިއަށް ދޭން އެފްއޭއެމުން ނިންމީ 150،000ރ. އެވެ. މަހިބަދުއަށް ދޭން ނިންމީ 50،000 ރުފިޔާ އެވެ.

ރަސްމީ ފުޓްބޯޅަ ސީޒަނުން ބޭރުން ބޭއްވި މުބާރާތަށް ފީފާއިން 50،000 ޑޮލަރު އެފްއޭއެމަށް ޖަމާކޮށްދިނެވެ.

ފީފާގެ ނޯމަލައިޒޭޝަން ހާލަތުގައި އޮތް އެފްއޭއެމްގެ ފައިސާއާ ގުޅޭ ކަންކަން ބަލަން ހަވާލު ކުރި އަންކޫރާ އަށް ހަރަދުތަކުގެ ތަފުސީލު އެފްއޭއެމުން ދުރާލައި ހުށަހެޅީ 771،000ރ ގެ ބަޖެޓެއް ހިންގާނެކަމަށް އަންދާޒާ ކުރުމަށް ފަހު އެވެ. އެފްއޭއެމުން އެދުނު އެ އަދަދު ޑޮލަރުން ފީފާއިން ޖަމާކޮށްދިނެވެ.

އެ ފައިސާ ހަމައެކަނި ހަރަދު ކުރަން ޖެހޭނީ މުބާރާތުގެ އިނާމު ހަރަދުތަކަށާއި އިނާމު ފައިސާގެ އިތުރުން އިދާރީ އަދި ލޮޖިސްޓިކް ހަރަދުތަކަށް އެކަނިކަމަށް ޝަރުތު ކުރި އެވެ.

ނޯމަލައިޒޭޝަން ކޮމިޓީގެ ދައުރު ޖުލައި 31 ގައި ހަމަވާނެ އެވެ.