ވިކްޓަރީ ސްޕޯޓްސް ކްލަބް ވެސް ބަލިކޮށް ޓީސީ ސްޕޯޓްސް ކްލަބް ސީޒަންގައި ޖެހިޖެހިގެން ތިންވަނަ މޮޅު ހޯދައިފި އެވެ.
ގަލޮޅު ދަނޑުގައި މިއަދު ކުޅުނު ދިރާގު ދިވެހި ޕްރިމިއާ ލީގު މެޗުގައި ވިކްޓަރީއާ ވާދަކޮށް ޓީސީ މޮޅުވީ 1-0 އިންނެވެ.
ޓީީސީގެ ފޯވާޑް ޕްރިންސް ބޯޑު އަށް އޭރިއާ ތެރެއިން ވިކްޓަީގެ އަމްދާން އަލީ ފައުލް ކުރީ ކަމަށް ބަލައިރެފްރީ ދިން ޕެނަލްޓީން ޕްރިންސް ޓީސީގެ ހަމައެކަނި ލަނޑު ޖަހައިދިނީ 69 ވަނަ މިނިޓުގަ އެވެ.
މިއާ އެކު ޓީސީ ވަނީ އެންމެ ފަހުން އެ ޓީމު ކުޅުނު ތިން މެޗުން ވެސް މޮޅުވެފަ އެވެ. މި މަހުގެ 11 ގައި ނިއު ރޭޑިއަންޓް އަތުން 2-0 އިން ބަލި ވި މެޗަށް ފަހު ޓީސީ ވަނީ 2-0 އިން ކްލަބް ގްރީން ސްޓްރީޓްސް ބަލިކޮށް، މިދިޔަ ހޮނިހިރުގައި 1-0 އިން ވެލެންސިއާ ވެސް ބަލި ކޮށްފަ އެވެ.
ލީގުގެ ދެވަނަ ބުރު ވިކްޓަރީ ވަރުގަދަ ކޮށް ފެށި ނަމަވެސް، އެންމެ ފަހުން އެ ޓީމު ކުޅުނު ފަސް މެޗުން ވެސް މޮޅެއް ހޯދިފައެއް ނުވެ އެވެ. މީގެ ތެރެއިން ދެ މެޗު އެއްވަރު ވެފައި ވާއިރު، ތިން މެޗުން ވަނީ ބަލިވެފަ އެވެ.
އޮޓަމެޓިކް ރެލިގޭޝަނުން ސަލާމަތް ވެފައިވާ ޓީސީ މި މޮޅާ އެކު ހަތްވަނައިގައި އޮތީ 17 މެޗުން 18 ޕޮއިންޓް ހޯދައިގެންނެވެ. ވިކްޓަރީ ހަވަނައިގައި އޮތީ 21 ޕޮއިންޓާ އެކު އެވެ.
ދެ ޓީމަށް ވެސް ލީގުގައި ބާކީ އެއް މެޗު އޮތް އިރު، ފަހު މެޗުގައި ޓީސީ ނުކުންނާނީ ހަތަރުވަނައިގައި އޮތް ބުރު ސްޕޯޓްސްއާ އެވެ. އަދި ވިކްޓަރީ އޮތީ ފުލުގައި އޮތް ޔުނައިޓެޑް ވިކްޓަރީ (ޔޫވީ) އާ އެވެ. ފަހު މެޗުތަގެ ނަތީޖާތަކުން ދެ ޓީމުގެ ޕޮއިންޓް އެއްވަރުވާ ހަލަތުގައި ވެސް ދެ ޓީމު ދެމެދުގައި ގޯލް ޑިފަރެންސްގައި ބޮޑު ތަފާތެއް އެބަ އޮތެވެ.