ގާތްގަނޑަކަށް ތިން އަހަރުގެ މެދުކެނޑުމަކަށްފަހު އެފްއޭއެމްގެ ފުރަތަމަ އޯޑިނަރީ ކޮންގްރެސް މިރޭ ބޭއްވަން ތާވަލު ކޮށްފި އެވެ.
އެ އެސޯސިއޭޝަންގެ އޯޑިނަރީ ކޮންގްރެސްއެއް އެންމެ ފަހުން ބާއްވާފައި ވަނީ މެއި 2023 ގަ އެވެ. އެ ކޮންގްރެސްގައި އެ އަހަރަށް 85 މިލިއަން ރުފިޔާގެ ބަޖެޓެއް ފާސް ކުރި އެވެ.
އެކަމަކު އޭރު ވެސް ވަޅު ޖެހިފައި އޮތް އެފްއޭއެމާއި ރާއްޖޭގެ ފުޓްބޯޅަ އެންމެ ފުން އަޑިގަނޑަށް ވެއްޓުނީ އެ އަހަރު އެވެ. އެސޯސިއޭޝަނުގެ ހިންގުން ހުއްޓި، ބޮޑެތި މާލީ މައްސަލަތަކެއް އެ އަހަރު ފެންމަތިވި އެވެ. އަދިވެސް އެ އެސޯސިއޭޝަން އުޅެނީ އެ އަނދަވަޅުން އަރައި ނުގަނެވިގެންނެވެ.
އެފްއޭމްގެ ފައިސާ އަށް ހިޔާނާތްތެރިވެ ކޮރަޕްޝަނާއި މަނީލޯންޑަރިންގެ އަމަލުތައް ހިންގާފައިވާކަމުގެ ތުހުމަތުގެ އެ އަހަރު އެފްއޭއެމްގެ އޮފީސް ފުލުހުން ރެއިޑް ކުރި އެވެ. އެ ތުހުމަތުތައް އަމާޒުވި އެ އިދާރާގެ އޭރުގެ ރައީސް ބައްސާމް އަދީލް ޖަލީލްގެ ޝަރީއަތްކޮށް އޭނާ ވަނީ ދިގު މުއްދަތަކަށް ޖަލައް ލައިފަ އެވެ.
މިރޭ ބާއްވާ ކޮންގްރެސް އަށް އެފްއޭއެމުން، މީޑިއާ އަށް ދައުވަތު ފޮނުވީ ރޭ ދަންވަރު އެވެ. ކޮންގްރެސްގެ އެޖެންޑާއަކީ ކޮބައިކަމެއް އެފްއޭއެމުން މީޑިއާ އަށް އާންމުކޮށްފަ އެއް ނުވެ އެވެ.
ނަމަވެސް "މިހާރު" އަށް ލިބިފައިވާ އެޖެންޑާގައި ވާގޮތުން މިރޭ ބާއްވާ ކޮންގްރެސްގައި އެންމެ މުހިންމު ކަންކަމަކީ ވޭތުވެދިޔަ ތިން އަހަރުގެ އޮޑިޓް ރިޕޯޓްތައް ބަލައިގަތުމާއި، ކުރިއަށް މި އަހަރުގެ ބަޖެޓް ފާސްކުރުމެވެ.
އެފްއޭއެމް އޯޑިނަރީ ކޮންގްރެސްގެ އެޖެންޑާ އެންމެ މުހިންމު ބައިތަށް:
- އެޖެންޑާ ފާސްކުރުން: ކޮންގްރެސްގެ މަސައްކަތްތައް ކުރިއަށްގެންދާނެ ތަރުތީބު ކަނޑައެޅުން.
- ރައީސްގެ ހިތޯބު: އެފްއޭއެމްގެ ރައީސް އަހްމަދު ތޯރިގް (ޓޮމް) ކޮންގްރެސްގެ މެންބަރުންނާ މުހާޠަބުކޮށް ވާހަކަދެއްކެވުން.
- ކުރީގެ ޔައުމިއްޔާ ފާސްކުރުން: 26 ޖުލައި 2025 ގައި ބޭއްވި އެކްސްޓްރާ އޯޑިނަރީ ކޮންގްރެސްގެ ތައުމިއްޔާ ފާސްކުރުން.
- 2025 ގެ ހަރަކާތްތަކުގެ ރިޕޯޓް: ނިމިދިޔަ އަހަރު ހިންގާފައިވާ ކަންކަމުގެ ރިޕޯޓް ހުށަހެޅުން.
- މާލީ ބަޔާން ހުށަހެޅުން: 2025 ވަނަ އަހަރުގެ ބެލެންސް ޝީޓާއި، ފައިދާ އަދި ގެއްލުމުގެ ބަޔާނުގެ ތަފްސީލު ހުށަހެޅުން (މީގެ ތެރޭގައި މިނިވަން އޮޑިޓަރުންގެ ރިޕޯޓް ހިމެނޭނެ).
- އޮޑިޓް ރިޕޯޓް ފާސްކުރުން: 2025 ވަނަ އަހަރުގެ މާލީ ރިޕޯޓަށް ބިނާކޮށް ތައްޔާރުކޮށްފައިވާ އޮޑިޓް ރިޕޯޓް ފާސްކުރުން.
- 2026 ގެ ބަޖެޓް ފާސްކުރުން:
މި ކޮންގްރެސް ފެށުމަށް ހަމަޖެހިފައިވަނީ މިރޭ 9 ޖަހާއިރު އެވެ.
މިދިޔަ ތިން އަހަރުތެރޭ، އާންމު ކޮންގްރެސްއެއް ބާއްވާފައި ނުވި ނަމަވެސް، އެކްސްޓްރާ އޯޑިނަރީ ހަތަރު ކޮންގްރެސް އެ އެސޯސިއޭޝަނުން ބޭއްވި އެވެ. އޭގެ ތެރެއިން ތިން ކޮންގްރެސްއަކީ އެފްއޭއެމްގެ ނޯމަލައިޒޭޝަން ކޮމިޓީގެ މުއްދަތުގައި ބޭއްވި ހާއްސަ ކޮންގްރެސްތަކެވެ. އެފްއޭއެމުން ވަނީ 2024 ގެ ކުރީކޮޅު، ހަތަރު އަހަރުވަންދެން ނުހަދާ ހުރި ކޮމިޓީތައް ހެދުމަށް އެކްސްޓްރާ އޯޑިނަރީ ކޮންގްރެސްއެއް އޭރުގެ ރައީސް ބައްސާމްގެ ރިޔާސަތުގައި ބާއްވާފަ އެވެ. ނަމަވެސް އެ ކޮންގްރެސް ބަލައި ނުގަނެ، އެ ޖަލްސާގެ ނިންމުންތައް ވެސް ފީފާއިން ބާތިލު ކުރި އެވެ.
މިރޭގެ ކޮންގްރެސްއަކީ، އެފްއޭއެމްގެ ރައީސްކަމާ ދެވަނަ ފަހަރަށް ތޯރިގް ހަވާލުވި ފަހުން އޭނާ ރިޔާސަތު ބަލަހައްޓަވާ ފުރަތަމަ ކޮންގްރެސް އެވެ.