އެފްއޭއެމުން މި އަހަރަށް ލަފާކޮށް، 48.3 މިލިއަން ރުފިޔާގެ ބަޖެޓެއް މިރޭ ބާއްވާ އޯޑިނަރީ ކޮންގްރެސް އަށް ހުށަހަޅަން ތައްޔާރުވެއްޖެ އެވެ.
"މިހާރު" އަށް ލިބިފައިވާ އެފްއޭއެމްގެ ބަޖެޓްގެ ޑްރާފްޓްގައިވާ ގޮތުން އެ އެސޯސިއޭޝަނުން ހުށަހަޅަނީ އަރަނި ބަޖެޓެކެވެ.
ހިންގުން ބޮއްސުންލައިގެން ގޮސް ހަމަ މަގުން ނެއްޓުނު އެސޯސިއޭޝަނުން، ތިން އަހަރަށް ފަހު ބާއްވާ ފުރަތަމަ އާންމު ކޮންގްރެސް އަށް ހުށަހަޅާ ބަޖެޓަކީ، ކުރީގެ އަހަރުތަކާ އަޅާބަލާއިރު ކުޑަ ބަޖެޓެކެވެ.
އެފްއޭއެމުން އެންމެ ފަހުން ކޮންގްރެސްއެއްގައި ބަޖެޓެއް ފާސްކުރީ މެއި 2023 ގައި، އޭރުގެ ރައީސް ބައްސާމް އަދީލް ޖަލީލުގެ ދައުރުގަ އެވެ. އެ އަހަރު ކޮންގްރެސްއިން 85 މިލިއަން ރުފިޔާގެ ބަޖެޓެއް ފާސްކުރި އެވެ.
އެފްއޭއެމްގެ ރައީސްކަމާ މިދިޔަ އަހަރުގެ ޖުލައި 26 ގައި ދެވަނަ ފަހަރަށް ހަވާލުވެވަޑައިގަތް އަހްމަދު ތޯރިގްގެ ލީޑާޝީޕުން ހުށަހަޅާ ފުރަތަމަ ބަޖެޓުގައިވާ ގޮތުން، ޖުމްލަ އާމްދަނީގެ ގޮތުގައި މި އަހަރު ލިބޭނެ ކަމަށް އަންދާޒާކޮށްފައިވަނީ 48,458,511ރ. އެވެ.
އާމްދަނީގެ އެންމެ ބޮޑު ބައެއް ހިއްސާކުރަނީ ފީފާ އިންނެވެ. އެ އިދާރާއިން މި އަހަރު 32.7 މިލިއަން ރުފިޔާ އެފްއޭއެމަށް ދޭނެ ކަމަށް ބަޖެޓު ޑްރާފްޓުގައި އަންދާޒާކޮށްފައިވެ އެވެ. މީގެ އިތުރުން ސްޕޮންސާޝިޕްގެ ގޮތުގައި 8.7 މިލިއަން ރުފިޔާ ލިބޭނެ ކަމަށް ބަލާފައިވާއިރު، ކުޅިވަރާ ބެހޭ މިނިސްޓްރީ މެދުވެރިކޮށް ސަރުކާރުން 1.8 މިލިއަން ރުފިޔާ ލިބޭނެ ކަމަށް ވެސް ވަނީ ލަފާކޮށްފަ އެވެ.
ބަޖެޓުގެ ޖުމްލަ ހަރަދަކީ 48.3 ރުފިޔާ ކަމަށް ވިޔަސް އަހަރު ނިމޭއިރު 72,741ރ. އަރަނި (ނުވަތަ ހަރަދުކޮށްފައި ބާކީ) ވާނެ އެފްއޭއެމްގެ ޑްރާފްޓް ބަޖެޓްގައި ލަފާކޮށްފައި ވެއެވެ.
އެފްއޭއެމުން މި އަހަރަށް އެންމެ ބޮޑު ހޭދައެއް ކުރުމަށް ނިންމާފައިވަނީ މުބާރާތްތަކާއި އެކި ހަރަކާތްތަކަށެވެ. މުބާރާތްތަކަށް 27.2 މިލިއަން ރުފިޔާ ކަނޑައަޅާފައި ވެއެވެ. ދިވެހި ޕްރިމިއާ ލީގަށް 6.7 މިލިއަން ރުފިޔާ ހަރަދުވާނެ ކަމަށް ލަފާކޮށްފައި ވެއެވެ. ގައުމީ ޓީމުތަކުގެ ޚަރަދުތަކަށް 6.3 މިލިއަން، އަދި އިދާރީ ހިންގުމާއި މުވައްޒަފުންގެ މުސާރައަށް 10 މިލިއަން ރުފިޔާ ބަޖެޓުގައި ވަނީ ހިމަނާފައެވެ. އަންހެން ފުޓްބޯޅަ ކުރިއެރުވުމަށް އަންހެން ލީގަށް 1.5 މިލިއަން ރުފިޔާ ޚަރަދުކުރުމަށްވެސް ވަނީ ރާވާފައެވެ.
މިރޭގެ ކޮންގްރެސްގެ އެޖެންޑާގައި ބަޖެޓް ފާސްކުރުމުގެ އިތުރުން، 2025 ވަނަ އަހަރުގެ ހަރަކާތްތަކުގެ ރިޕޯޓާއި، އޮޑިޓްކޮށްފައިވާ މާލީ ބަޔާންތައް ހުށަހަޅައި ފާސްކުރުން ހިމެނެއެވެ.
މިދިޔަ ދެ އަހަރު ކޮންގްރެސް އަކަށް ހުށަހަޅައިގެން އެއްވެސް ބަޖެޓެއް އެފްއޭއެމުން ފާސް ނުކުރެ އެވެ.
ޖުލައި 2024 ގައި ނިމުނު ބައްސާމްގެ ދެވަނަ ދައުރަށް ފަހު އެ އަހަރުގެ އޯގަސްޓް މަހުން ފެށިގެން ގާތްގަނޑަކަށް އެއް އަހަރުވަންދެން ފީފާއިން ކަނޑައެޅި ނޯމަލައިޒޭޝަން ކޮމިޓީއެއްގެ ބެލުމުގެ ދަށުން ހިންގި މުއްދަތުގައި އެފްއޭއެމުން ފައިސާގެ ހުރިހާ ކަމެއް ކުރީ ފީފާއިން ކަނޑައެޅި ފައިނޭންޝަލް ފާމް "އަންކޫރާ" ގެ ހުއްދަ ހޯދައިގެންނެވެ.
މި އަހަރުގެ ޖުލައި މަހާ ހަމައަށް ޖަރުމަނުގެ އެ ފާމުން އެފްއޭއެމްގެ ހާލަތު ބަލަމުންދާނެ އެވެ.