އެފްއޭއެމްގެ އަތޮޅު ފުޓްސަލް މުބާރަތަށާއި ފުޓްސަލް ލީގަށް 2.3 މިލިއަން

އެފްއޭއެމުން މި އަހަރު ބާއްވާ އަތޮޅު ފުޓްސަލް މުބާރާތަށާއި ފުޓްސަލްގެ ދެ ލީގަށް 2.3 މިލިއަން ރުފިޔާ ހަމަޖައްސަން، އެ އެސޯސިއޭޝަނުން މި އަހަރަށް ހުށަހަޅާ ބަޖެޓުގައި ހިމަނައިފި އެވެ

މިރޭ ބާއްވާ އޯޑިނަރީ ކޮންގްރެސްއަށް ފާސްކުރުމަށް އެފްއޭއެމުން ވަނީ 48.3 މިލިއަން ރުފިޔާގެ ބަޖެޓެއް ހުށަހަޅައިފަ އެވެ. ބަޖެޓުގެ ޑްރާފްޓުގައިވާ ގޮތުން އެފްއޭއެމުން އެންމެ ބޮޑު ހޭދައެއް ކުރާނީ މުބާރާތްތަކަށާއި ހަރަކާތްތަކަށެވެ. އެ ދާއިރާއަށް އެކަނިވެސް 27,299,229 ރުފިޔާ ހޭދަކުރުމަށް ވަނީ ކަނޑައަޅާފަ އެވެ.

ބަޖެޓްގެ 57.49 ޕަސަންޓް ހާއްސަކޮށްފައި ވަނީ މުބާރާތްތަކަށާއި ހަރަކާތްތަކަށެވެ. އެއީ 27.8 މިލިއަން ރުފިޔާ އެވެ. އެއީ އަންހެން އަދި އުމުރުފުރާތަކުގެ މުބާރާތްތަކަށާއި ހަރަކާތްތަކަށް ހާއްސަކޮށްފައިވާ 4.5 މިލިއަން ރުފިޔާ ވެސް ހިމްނައިގެންެނެވެ.

އެފްއޭއެމްގެ ފުޓްސަލް މުބާރާތްތަކަށް 2.3 މިލިއަން ރުފިޔާ އަށް ވުރެ ބޮޑު އަދަދެއް ބަޖެޓުން ހޭދަ ކުރާނެ އެވެ. އެއީ "ފުޓްސަލް އެޓޯލް ޗެމްޕިއަންޝިޕް" ބޭއްވުމަށް 1.8 މިލިއަން،  ފުޓްސަލް ލީގަށް 324,500ރ. އަދި އަންހެން ފުޓްސަލް ލީގަށް 245,750ރ. އެވެ.

ރާއްޖޭގައި ފުޓްސަލްގެ މަގުބޫލުކަން ބޮޑެވެ. ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގެ ތަށި މިދިޔަ ޖެނުއަރީ މަހު ގައުމީ ފިރިހެން ފުޓްސަލް ޓީމުން ކާމިޔާބު ކުރި އެވެ. ތައިލެންޑްގައި ބޭއްވި އެ މުބާރާތް ދިވެހި ޓީމުން ކާމިޔާބު ކުރީ ހުރިހާ މެޗަކުން ވެސް މޮޅުވެ 100 ޕަސަންޓްގެ ރެކޯޑަކާ އެކު އެވެ. ފުޓްސަލްގެ މަގުބޫލުކަން ބޮޑު ވިޔަސް ރާއްޖޭގައި ފުޓްސަލް އިންޑޯއެއް ނެތެވެ. 

ފުޓްސަލް އިންޑޯ އެޅުމުގެ މަސައްކަތް މި އަހަރު ފަށާނެ ކަމަށް ސްޕޯޓްސް މިނިސްޓްރީން ވަނީ ބުނެފަ އެވެ. 

އެފްއޭއެމުން މި އަހަރަށް ހުށަހަޅަނީ 48,458,511ރ. ގެ ބަޖެޓެކެވެ. އާމްދަނީގެ އެންމެ ބޮޑު އެހީއެއް ދޭނީ ފީފާ އިންނެވެ. އެއިދާރާއިން 32,703,111ރ.  ލިބޭނެ ކަމަށް ލަފާކޮށްފައި ވެއެވެ. ސްޕޮންސާޝިޕްގެ ގޮތުގައި 8,750,000ރ. ލިބޭނެ ކަމަށް ބަޖެޓުގައި ހިމަނާފައިވެއެވެ. ސަރުކާރުން ސްޕޯޓްސް މިނިސްޓްރީ މެދުވެރިކޮށް 1,800,000ރ. އަދި ޖަޕާން ފުޓްބޯލް އެސޯސިއޭޝަނުން 308,400ރ. ލިބޭނެ ކަމަށް ވަނީ އަންދާޒާކޮށްފައެވެ.

މުޅި އަހަރުގެ ހުރިހާ ހަރަދުތަކަށް ފަހު ބަޖެޓުން 72,741ރ. އަރަނި ވާނެ ކަމަށް އެފްއޭއެމުން ވަނީ ލަފާކޮށްފަ އެވެ.