ފިފާ އޭސިއަން ކަޕްގައި ފިލިޕީންސްއާ ދެކޮޅަށް ކުޅުނު މެޗުގައި ދެ ލަނޑުން ފަހަތުގައި އޮއްވައި، ފަހަތުން އަރައި 2-2 އިން މެޗު އެއްވަރުކޮށް ޕާކިސްތާނުން އުއްމީދީ ނަތީޖާއެއް ހޯދައިފި އެވެ.
ނޮވެމްބަރު މަހު ބަންގްލަދޭޝްގައި ބާއްވާ ސާފް ޗެމްޕިއަންޝިޕްގައި ރާއްޖެ ލައްވާލީ ޕާކިސްތާނާއި އިންޑިއާއާ އެކު ގުރޫޕް ބީ ގަ އެވެ. ފީފާއިން އެޕްރޫވްކޮށްގެން ފުރަތަމަ ފަހަރަށް ބާއްވާ ފީފާ އާސިއާން ކަޕްގައި އާސިއާންގެ ގައުމުތަކުގެ އިތުރުން، ދެކުނު އޭޝިއާ އަށް ނިސްބަތްވާ ޕާކިސްތާނާއި ބަންގަލަދޭޝް ވެސް ވާދަކުރ އެވެ.
މިއަދު ފިލިޕީންސްގެ މައްޗަށް ހޯދި ޕޮއިންޓާއި ލަނޑުތަކަކީ، ފީފާއިން ބަލައިގެންފައިވާ މުބާރާތެއްގައި ޕާކިސްތާނުން ހޯދި ފުރަތަމަ ޕޮއިންޓާއި ޖެހި ފުރަތަމަ ލަނޑުތަކެވެ.
އިނގިރޭސި ޕްރިމިއާ ލީގުގައި ކުރިން ކުޅުނު މިޑްފީްލޑަރު ނޮލްބާޓޯ ސޮލާނޯގެ އިރުޝާދުގެ ދަށުން ކުޅޭ ޕާކިސްތާނަށް، އާސިއާން ކަޕްގެ ގުރޫޕް ބީ ގެ ފުރަތަމަ މެޗުގައި ތައިލެންޑް އަތުން 4-0 އިން ވީ ބައްޔެވެ.
ނަމަވެސް، ދުނިޔޭގެ ރޭންކިންގެ 198 ވަނައިގައި އޮތް ޕާކިސްތާނުން ވަނީ ރޭންކިންގެ 135 ވަނައިގައި އޮތް ފިލިޕީންސާ ދެކޮޅަށް ރަނގަޅު ކުޅުމެއް ދައްކައިފަ އެވެ.
އިންޑޮނޭޝިއާގެ ބަންޑުންގެ ސީ ޖަލަކް ހަރޫޕަތު ސްޓޭޑިއަމްގައި ކުޅުނު މެޗުގައި
ފުރަތަމަ ހާފުގައި ފިލިޕީންސްއިން ވަނީ ލީޑް ނަގާފަ އެވެ. މެޗުގެ 24 ވަނަ މިނެޓުގައި އެ ޓީމުގެ ސަންޑްރޯ ރޭސް ވަނީ ފިލިޕީންސްއަށް ފުރަތަމަ ލަނޑު ޖަހައިދީފަ އެވެ. އޭގެ ފަހުން 32 ވަނަ މިނެޓުގައި، ޕާކިސްތާނުގެ މުޙައްމަދު ފަޒާލްގެ އަތުގައި ބޯޅަ ޖެހުމުން ލިބުނު ޕެނަލްޓީއަކުން ބްޔޯން ކްރިސްޓެންސަން ވަނީ ފިލިޕީންސަށް ދެ ލަނޑުގެ ލީޑެއް ނަގައި ދީފަ އެވެ.
ޕާކިސްތާނުން ތަފާތު ދެއްކީ ދެވަނަ ހާފުގަ އެވެ. އެ ހާފު ފެށިގެން ދެ މިނެޓު ތެރޭގައި ޕާކިސްތާނުން ވަނީ ފަރަގު ކުޑަކޮށްފަ އެވެ. ކެޕްޓަން އަބްދުالله އިގްބާލް ދިން ބޯޅައަކުން އަލީ އަކްބަރު ވަނީ ލަނޑު ޖަހައި ޕާކިސްތާނަށް އުއްމީދު އާކޮށްދީފަ އެވެ. އަދި މެޗުގެ 60 ވަނަ މިނެޓުގައި އަބްދުލް ސޮމަދު އަރުޝަދު ވަނީ ލަނޑު ޖަހައި މެޗުގެ ނަތީޖާ 2-2 އަށް ބަދަލުކޮށްފަ އެވެ.
މި މެޗުން ލިބުނު މުހިންމު ޕޮއިންޓާ އެކު، ގްރޫޕް ބީ ގައި ޕާކިސްތާނު ކުރިއަށް ދިއުމުގެ އުންމީދު އަދިވެސް އެބައޮތެވެ. އެ ޓީމުގެ ފަހު މެޗުގައި ނުކުންނާނީ ވިއެޓްނާމާ ދެކޮޅަށެވެ. އެ މެޗުން މޮޅުވެއްޖެނަމަ އަނެއްބުރަށް ދިއުމުގެ ފުރުސަތު އެބައޮތެވެ.
ގުރޫޕް އޭ ގައި އޮތް ބަންގްލަދޭޝްގެ ފުރަތަމަ މެޗުގައި ސިންގަޕޫރު އަތުން ބަލިވީ 1-0 ންނެވެ. ބަންގްލަދޭޝްއަށް މުބާރާތުން ޖާގަ ދިނީ އިންޑިއާއިން ދޫކޮށްލި ފުރުސަތަށެވެ.