ފަރުވާކުރުމަށް އެންމެ އުނދަގޫ އަދި ނުރައްކާ ޓިއުމަރު އުފެދޭ ކެންސަރު ކަމަށްވާ ޕެންކްރިއެޓިކް ކެންސަރު ނައްތާލުމަށް "ތިން ތެރަޕީއެއް އެއްކޮށްގެން" ކާމިޔާބު ހޯދިދާނެ ކަމަށް ސްޕެއިންގައި ކުރި ދިރާސާއަކުން ދައްކައިފި އެވެ.
ސްޕެނިޝް ނޭޝަނަލް ކެންސަ ރިސާޗް ސެންޓަރު (ސީއެންއައިއޯ) އިން ހެދި ދިރާސާއަކުން ދައްކާ ގޮތުގައި "ޓްރިޕްލް ކޮމްބިނޭޝަން ތެރަޕީ" ބޭނުންކޮށްގެން މީދަލުގެ ޕެންކްރިއެޓިކް ޓިއުމަރުތައް ނައްތާލައި، އެ ޓިއުމަރުތައް އަލުން އުފެދުނަ ނުދީ ހުއްޓުވިފައިވެ އެވެ.
"މި ދިރާސާތަކުގެ ސަބަބުން، ޕެންކްރިއެޓިކް ޑަކްޓަލް އެޑިނޯކާސިނޯމާ ހުންނަ މީހުން ދިރިހުރުމަށް މަގުފަހި ކޮށްދޭނެ އާ ކޮމްބިނޭޝަން ތެރަޕީތައް ޑިޒައިން ކުރުމަށް މަގުފަހިވެގެން ދާނެ،" ދިރާސާ ޓީމުން ބުންޏެވެ. "މި ނަތީޖާތަކުގެ ސަބަބުން އާ ކްލިނިކަލް ޓްރަޔަލްތައް ތަރައްގީކުރުމަށް މަގު ފަހިވެގެން ދާނެ،" އެ ރިޕޯޓުގައި ބުނެފައިވެ އެވެ.
ސައިންޓިފިކް ޖާނަލް "ޕީއެންއޭއެސް" ގައި ޝާއިއުކޮށްފައިވާ މި ދިރާސާގެ ނަތީޖާއިން ދައްކާ ގޮތުގައި "ކޭއާރްއޭއެސް އޮންކޯޖީން މޮލިކިއުލާ ޕާތުވޭ" ގެ މައިގަނޑު ތިން ޕޮއިންޓަކަށް މި ތެރަޕީ އެއްފަހަރާ އަމާޒު ކުރުމުން ޓިއުމަރުތައް ކުޑަކުރެވި އަދި އޭގެ ނުރައްކާ ބޮޑުވިޔަ ނުދީ ހިފެހެއްޓުމުގައި ދިގު މުއްދަތަކަށް ކާމިޔާބު ހޯދެ އެވެ.
ސްޕެއިންގައި ކޮންމެ އަހަރަކު 10،300 އަށް ވުރެ ގިނަ މީހުންނަށް މި ބާވަތުގެ ކެންސަރު ޖެހޭއިރު މި ބަލީގެ މީހުން ފަސް އަހަރު ވަންދެން ދުނިޔޭގައި ހުރުމުގެ ރޭޓް 10 ޕަސެންޓަށް ވުރެ ކުޑަ އެވެ.
މި ކާމިޔާބީގެ އެންމެ މުހިންމު ކަމަކީ އެއް ޕޮއިންޓެއްގައި އޮންކޯޖީން ބްލޮކް ވުމުން އުފެދޭ ރެސިސްޓެންސުން ސަލާމަތްވުމެވެ. ސީއެންއައިއޯގެ ޓީމުން ވަނީ ފުއްޕާމޭގެ ކެންސަރަށް މިހާރު ވެސް ހުއްދަ ދީފައިވާ ބޭހެއް ކަމަށްވާ އެކްސްޕެރިމެންޓަލް ކޭއާރްއޭއެސް އިންހިބިޓަރެއް ޕްރޮޓީން ޑިގްރޭޑާއާ އެއްކޮށް، ޖަނަވާރުގެ ތިން މޮޑެލްއެއްގައި ބޭނުންކޮށްގެން މާބޮޑު ސައިޑް އިފެކްޓެއް ނެތި ނެތި ޓިއުމަރުތައް ނައްތާލައިފަ އެވެ.
މި ނަތީޖާއަށް ފަހު ސައިންސްވެރިން ވަނީ މިއީ ލިބުނު ވަރަށް ބޮޑު އުންމީދެއް ކަމަށާއި އެކަމަކު އަދި އިންސާނުންނަށް މިގޮތަށް ފަރުވާ ދޭން ފެށުމަށް ވަގުތު ނަގާނެ ކަމަށެވެ.
"ޓްރިޕަލް ތެރަޕީ ބޭނުންކޮށްގެން ކްލިނިކަލް ޓްރަޔަލްތައް ކުރިއަށް ގެންދެވޭނެ ހާލަތެއް އަދި ނެތް،" މި ކޮމްބިނޭޝަން، ބަލި މީހުންނަށް އޮޕްޓިމައިޒް ކުރުމަކީ ވަރަށް އުނދަގޫ ޕްރޮސެސްއަކަށް ވާނެ ކަމަށާއި އެކަމަކު އުންމީދު އެބަ އޮތްކަން ފާހަގަކޮށް ދިރާސާ ޓީމުން ބުނެފައިވެ އެވެ.