އީރާނަށް ހަމަލާ ދިނުމުގައި އެމެރިކާއިން އިޒްރޭލާ ބައިވެރިވީ އިޒްރޭލުން އިސްވެ ހަމަލާދޭން އުޅުމުން، އެ ހަމަލާއާ އެކު އީރާނުން އެމެރިކާ ސިފައިންނަށް ނުރައްކާކުރާނެކަން އެނގޭތީ ކަމަށް ސެކްރެޓަރީ އޮފް ސްޓޭޓް މާކޯ ރޫބިއޯ ދެއްކެވި ވާހަކައާ ދިމާ އިދިކޮޅަށް ރައީސް ޑޮނަލްޑް ޓްރަމްޕު ވާހަކަ ދައްކަވައިފި އެވެ.
"އަޅުގަނޑު ގަބޫލުކުރާ ގޮތުގައި އިސްވެ ހަމަލާ ދޭން އުޅުނީ އިރާނުން. އެކަން އެހެން ވާން އަޅުގަނޑު ބޭނުން ނުވީ. އެހެންވީމާ މިކަމުގައި އިޒްރޭލު ބައިވެރިކުރި މީހަކީ އަޅުގަނޑު ކަމަށް ވެސް ވެދާނެ،" ޖަރުމަނުގެ ޗާންސެލަރު ފްރީޑްރިކް މާޒްއާ އެކު ވައިޓް ހައުސްގައި ބޭއްވެވި ބައްދަލުވުމަށް ފަހު ނޫސްވެރިން ކުރި ސުވާލުތަކަށް ޖަވާބު ދެއްވަމުން ޓްރަމްޕު ވިދާޅުވި އެވެ.
އެކަމަކު ރޫބިއޯ އިއްޔެ ވިދާޅުވެފައިވަނީ އިސްވެ ހަމަލާދޭން ނިންމީ އިޒްރޭލުން ކަމަށެވެ. އަދި އެގޮތަށް ހަމަލާ ދީފި ނަމަ އީރާނުން އެމެރިކާގެ މަސްލަހަތު ހިމެނޭ ތަންތަނަށް ހަމަލާ ނުދީ ނުދާނެ ކަމަށާއި އެހެންވެ އެކަން ހުއްޓުވަން އިޒްރޭލާ އެކު ހަމަލާތަކުގައި ބައިވެރިވީ ކަމަށް ވިދާޅުވި އެވެ.
"އަޅުގަނޑުމެންނަށް އެނގޭ އިޒްރޭލުން ހަމަލާ ދޭނެކަން. އަޅުގަނޑުމެންނަށް އެނގޭ އެ ފިޔަވަޅާ އެކު އެމެރިކާ ސިފައިންނަށް ހަމަލާ ދޭނެކަން، އަދި އެ ހަމަލާތައް ފެށުމުގެ ކުރިން އެ މީހުންގެ ފަހަތުން ނުގޮސްފި ނަމަ، އަޅުގަނޑުމެންނަށް އިތުރު ގެއްލުންތަކެއް ލިބޭނެކަން،" ރޫބިއޯ ނޫސްވެރިންނަށް ވިދާޅުވި އެވެ.
އެމެރިކާއިން އިސްވެ ހަނގުރާމައެއް ފެށުމުގެ ބާރު ގާނޫނުއަސާސީން ދީފައިވަނީ ކޮންގްރެސްއަށް ކަމަށް ވާއިރު، އީރާނާ ދެކޮޅަށް ހަނގުރާމަ ފެށީ އެ ގައުމުން ކޮން ނުރައްކަލެއް ކުރިމަތިވެގެންތޯ ސުވާލުކުރުން ރުބިއޯ އަނެއްކާވެސް އިޝާރާތްކުރެއްވި އިޒްރޭލުން ހަަމަލާ ދޭން ރާވާފައިވާ ޕްލޭނަށެވެ.
"ކުރިމަތިނުވެ ނުދާނެ ނުރައްކަލެއް އޮތްކަމާ މެދު ސުވާލެއް ނެތް. އެއީ އީރާނަށް ހަމަލާދީފި ނަމަ - ހަމަލާ ދޭނެކަން އަޅުގަނޑުމެންނަށް އެނގޭ - އެ މީހުން [އީރާނުން] އަހަރެމެން ފަހަތުން އަންނާނެކަން،" ރުބިއޯ ވިދާޅުވި އެވެ.
އީރާނަށް ދެމުންދާ ހަމަލާތަކުގެ އެންމެ ގޯސް ނަތީޖާއަކަށް ވެދާނެ ކަމަކީ ކޮބައިތޯ ނޫސްވެރިޔަކު ސުވާލުކުރުމުން ޓްރަމްޕު މިއަދު ވިދާޅުވީ އެއީ ހަމަލާތަކުގައި އަވަހާރަކޮށްލި ރޫހީ ލީޑަރު އާޔަތުﷲ އަލީ ޚާމަނާއީ ފަދަ ބޭފުޅަކު އަލުން އީރާންގެ ލީޑަރަކަށް ވަޑައިގަތުން ކަމަށެވެ.
"އެންމެ ގޯސް ހާލަތަކަށް ވާނީ، އަހަރެމެން މިކަން ކުރިޔަސް، ކުރިން ހުރި ފަދަ 'ގޯސް' މީހަކު އަލުން އައުން. އެހެން ނޫންތޯ،" ޓްރަމްޕު ވިދާޅުވި އެވެ.
"އެކަން އެހެން ވެދާނެ. އެކަމަކު އެކަން އެހެން ވާން އަހަރެމެން ދުލެއް ނުކުރާނަން."
ޓްރަމްޕު ވިދާޅުވި ގޮތުގައި ޚާމަނާއީއަށް ފަހު ދެން ވެރިކަމަށް ވަޑައިގެންފާނެ ކަމަށް އެމެރިކާއިން ބަލަމުން އައި ގިނަ ބޭފުޅުން ހަމަލާތަކުގައި އަވަހާރަވެފައިވާ ކަމަށެވެ.
ނޫސްވެރިންގެ ބައްދަލުވުމުގައި ޓްރަމްޕު ވަނީ އީރާނަށް ހަމަލާ ދިނުމުގައި އިނގިރޭސި ވިލާތުން އަމަލުކުރި ގޮތުން ހިތްހަމަނުޖެހޭ ކަމަށް ވެސް ވިދާޅުވެފައި އެވެ. އޭނާ އިޝާރާތްކުރެއްވީ އީރާނަށް ހަމަލާދޭން އިނގިރޭސި ވިލާތުގެ އަސްކަރީ މަރުކަޒުތައް ބޭނުންކުރުމުގެ ހުއްދައަށް އެދުމުން އެ ހުއްދަ ނުދީ ބޮޑުވަޒީރު ކިއާ ސްޓާމާ ފަސްކުރެއްވުމުން އެކަމަށެވެ. ޓްރަމްޕު ކުރިން ވިދާޅުވެފައިވާ ގޮތުގައި އެ ހުއްދަ ސްޓާމާ ދެއްވީ "މާބޮޑަށް ވެސް ލަސްވި" ފަހުންނެވެ. އަދި ހުއްދަ ދެއްވި އިރު ވެސް ދެއްވީ ހަމައެކަނި އީރާންގެ މިސައިލް ސައިޓްތަކަށް ހަމަލާ ދިނުމަށް އެކަންޏެވެ.