ސްރީ ލަންކާގެ އިގްތިސާދީ ސަރަހައްދުގެ ކުޑަ ތަންކޮޅެއް ބޭރުން އީރާންގެ މަނަވަރަކަށް އެމެރިކާއިން ހަމަލާދީ ފައްތާލާފައި ވާއިރު އިތުރު މަނަވަރެއް ވެސް އިގްތިސާދީ ސަރަހައްދުގައި އެބަ އޮތް ކަމަށާއި ކާނާ އާއި ފެން ފަދަ ތަކެތި ހޯދުމަށް ޑޮކް ކުރުމުގެ ހުައްދައަށް އެދިފައިވާ ކަމަށް ލަންކާގެ އޮފިޝަލުން ބުނެފި އެވެ.
ލަންކާގެ ކެބިނެޓް ތަރުޖަމާނު ޑރ. ނަލިންދާ ޖަޔަތީސާ އެ ގައުމުގެ ގާނޫނު ހަދާ މަޖިލީހުގައި މިއަދު މިކަން ހާމަކުރެއްވީ އިދިކޮޅު ލީޑަރު ސަޖިތަ ޕްރަމަދާސަގެ ސުވާލަކާ ގުޅިގެންނެވެ.
"ކޮލަމްބޯ ބަނދަރާ ކައިރީގައި އިތުރު އުޅަނދެއް އޮތްކަން އެނގިވަޑައިގަންނަވާތޯ؟ އެކަމާ ގުޅިގެން އަމަލުކުރަމުން ދަނީ ކިހިނެއްތޯ؟ އެ [އުޅަނދު އޮތްކަމުގެ] މައުލޫމާތު ހާމަ ނުކުރައްވާ ތިޔަ ހުންނެވީ ކީއްވެތޯ؟" ޕްރަމަދާސާ ސުވާލުކުރެއްވި އެވެ.
އެ ސުވާލާ ގުޅިގެން ތަރުޖަމާނު ވިދާޅުވީ އެ އުޅަނދު އަދި އޮތީ ލަންކާގެ އިގްތިސާދީ ސަރަހައްދުގެ ތެރޭގައި ނޫން ކަމަށެވެ.
"ތިޔަ ވިދާޅުވާ އުޅަނދު އަދި އޮތީ އަޅުގަނޑުމެންގެ ކަނޑުގެ ސަރަހައްދަކު ނޫން. އޮތީ އޭގެ ބޭރުން، ހާއްސަ އިގްތިސާދީ ސަރަހައްދުގައި. އަޅުގަނޑަށް ދެންނެވެން އޮތް ވަރަކީ މީހުން ސަލާމަތްކުރުމާ ގުޅޭ ގޮތުން ކުރެވެން ހުރި ހުރިހާ ކަމެއް މި ވަގުތަށް ކުރަމުންދާ ކަމަށް،" ކެބިނެޓް ތަރުޖަމާނު ވިދާޅުވި އެވެ.
އޭނާ މިހެން ވިދާޅުވި ނަމަވެސް މަނަވަރު ލަންކާގައި ޑޮކްކުރުމަށް އެދުނު އެހީއާ މެދު ގޮތެއް ނިންމިކަމެއް ނުވަތަ ނޫން ކަމެއް ވިދާޅެއް ނުވެ އެވެ.
އީރާނުން ވެސް ވަނީ އެ ގައުމުގެ މަނަވަރެއް ލަންކާ ކައިރީގައި އެބަ އޮތް ކަމާއި މިހާރު ދަތުރުކުރަނީ ލަންކާގެ ކަނޑުގެ ސަރަހައްދަށް ވަންނަންކަން ކަށަވަރުކޮށްދީފަ އެވެ.
އިއްޔެ ރޭ ވަނީ ސްރީ ލަންކާގެ އިގްތިސާދީ ސަރަހައްދުގެ ކުޑަ ތަންކޮޅެއް ބޭރުން، ބައިނަލްއަގުވާމީ ކަނޑުގެ ސަރަހައްދުގައި އޮތް އީރާންގެ މަނަވަރަކަށް އެމެރިކާގެ ސަބްމެރިންއަކުން ޓޯޕިޑޯ ހަމަލާއެއްދީ ފައްތާލައިފަ އެވެ. އެ އުޅަނދު އެހީއަށް އެދުމުން ލަންކާ ސިފައިން ވަނީ ޒަހަމްވެފައި ތިބި 32 މީހަކު ސަލާމަތްކޮށް ފަރުވާ ދޭން ފަށައިފަ އެވެ. އަދި އިތުރު 87 މީހެއްގެ ހަށިގަނޑު ލަންކާއަށް ވަނީ ގެންގޮސްފަ އެވެ.
އެމެރިކާ އާއި އިޒްރޭލުން އީރާނާ ދެކޮޅަށް ދެމުން ގެންދާ ހަމަލާތަކުގައި އެމެރިކާއިން ދަނީ އީރާންގެ ކަނޑުގެ ބާރު ނައްތާލުމަށް އުޅަނދުތަކަށް ހަމަލާ ދެމުންނެވެ. އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވީ އީރާންގެ މަނަވަރު ބައިނަލްއަގުވާމީ ކަނޑުގެ ސަރަހައްދުގައި އޮތީ ހިމާޔަތް ލިބޭނެ ކަމަށް ހީކޮށްގެން ކަމަށާއި އެއްވެސް ތަނަކުން އީރާނަށް ހިމާޔަތް ނުލިބޭނެ ކަމަށެވެ.