އެމެރިކާގެ ސަބްމެރިންއަކުން ހަމަލާދީ އީރާންގެ މަނަވަރެއް ސްރީ ލަންކާ ބޭރުން ފައްތާލިތާ އެއް ދުވަސް ފަހުން އެހީއަށް އެދުނު އީރާންގެ އެހެން މަނަވަރެއް ލަންކާގެ ބެލުމުގެ ދަށަށް ގެންގޮސް އޭގައި ތިބި 208 ފަޅުވެރިން އެއިން މިއަދު ބާލައިފި އެވެ.
ސްރީ ލަންކާގެ ރައީސް އަނޫރާ ކުމާރަ ޑިސެނަޔަކަށް ޓީވީ މެދުވެރިކޮށް ދެއްވި ބަޔާނެއްގައި މިކަން ހާމަކުރައްވަމުން ވިދާޅުވީ އައިރިސް ބުޝެހެރް ލަންކާގެ ބަނދަރަށް ވަނުމުގެ ހުއްދައަށް އެދުނީ އިންޖީނަށް ދިމާވި މައްސަލައަކާ ގުޅިގެން ކަމަށެވެ.
ބުޝެހެރް އަކީ ވެސް އިއްޔެ ޓޯޕިޑޯއަކުން ހަމަލާދީ ފައްތާލި އައިރިސް ޑެނާއާ އެކު މިދިޔަ މަހު އިންޑިއާގެ ނޭވަލް އެކްސަސައިޒްގައި ބައިވެރިވި އުޅަނދެކެވެ. މި ދެ އުޅަނދު އިންޑިއާއިން ފުރައިގެން ދަނިކޮށް އޭގެ ތެރެއިން ޑެނާ ފައްތާލުމުގެ ސަބަބުން، އޭގައި ތިބި 130 މީހުންގެ ތެރެއިން 32 މީހަކު ނޫން އެންމެން ވަނީ މަރުވެފަ އެވެ. މަރުވި މީހުންގެ ތެރެއިން 90 މީހެއްގެ ހަށިގަނޑު ސްރީ ލަންކާގެ ކަނޑުގެ ސިފައިން ހޯދައި އެ ގައުމަށް ވަނީ ގެންގޮސްފަ އެވެ.
އައިރިސް ޑެނާ އަކީ އީރާނަށް އެމެރިކާ އާއި އިޒްރޭލުން މިދިޔަ ހޮނިހިރު ދުވަހު ހަމަލާދޭން ފެށި ފަހުން މެދުއިރުމަތިން ބޭރުގައި ހަމަލާދިން ފުރަތަމަ އަމާޒެވެ. އަދި މިއީ ދެ ވަނަ ބޮޑު ހަނގުރާމައަށް ފަހު އެމެރިކާއިން ޓޯޕިޑޯ ހަމަލާދީ އުޅަނދެއް ފައްތާލި ވެސް ފުރަތަމަ ފަހަރެވެ.
މި ހާދިސާއަށް ފަހު އީރާންގެ ފޮރިން މިނިސްޓަރު އައްބާސް އަރަޣްޗީ ވިދާޅުވީ އެމެރިކާގެ މި "ގާއިމުކުރި ހަމައިގެ" ހިތި އެމެރިކާ އަދި ދެކޭނެ ކަމަށެވެ.
އެމެރިކާގެ ހަމަލާއެއް އަތުވެދާނެ ކަމުގެ ބިރު އޮތް ބުޝެހެރަށް އެހީވުމަށް ފަހު ލަންކާގެ ރައީސް ޑިސެނަޔަކަ ވިދާޅުވީ ހިނގަމުންދާ ހަމަނުޖެހުގައި ލަންކާއިން ވަކިކޮޅެއް ނުނަގާ ކަމަށެވެ.
"މިއީ ލަންކާއިން ހިފަހައްޓަމުން އަންނަ، ވަކި ފަރާތަކަށް ނުޖެހުމުގެ ސިޔާސަތުގެ ދަށުން ބައެއްގެ ފުރާނަ ސަލާމަތްކޮށްދިނުމަށް އެޅި ފިޔަވަޅެއް،" ޑިސެނަޔަކަ ވިދާޅުވި އެވެ.
"މިފަދަ ހަނގުރާމައެއްގައި އެއްވެސް ފުރާނައެއް ގެއްލިގެންނުވާނެ. ކޮންމެ ފުރާނައެއްގެ އަގު ވެސް ވާނީ ހަމަހަމަ."
ރައީސް ވިދާޅުވީ ބުޝެހަރު އޮތީ ކޮލަމްބޯ ޕޯޓާ ވަރަށް ކައިރީގައި ކަމަށާއި ނަމަވެސް އާގުބޯޓުތަކަށް މި އުޅަނދުގެ ސަބަބުން ނުރައްކާ އޮންނާނެތީ އިންޝުއަރެންސް ރޭޓް ބޮޑުވެދާނެ ކަމަށް ބަލައި އެ ބަނދަރަށް މަނަވަރު ނުވައްދާނެ ކަމަށެވެ. އެހެންވެ އުޅަނދު ގެންދާނީ އިރުއުތުރުގައި އޮންނަ ކުޑަ ބަނދަރެއް ކަމަށްވާ ޓްރިންކޮމަލީ ޕޯޓަށް ކަމަށް ރައީސް ވިދާޅުވި އެވެ.
މޯޗަރީތައް ފުރިއްޖެ
ލަންކާއިން އީރާންގެ މަނަވަރަކާއި އޭގެ ފަޅުވެރިން ސަލާމަތްކޮށްފައި ވާއިރު އިއްޔެ ހަމަލާ އަމާޒުވި މަނަވަރުން މިހާތަނަށް ލަންކާއަށް ގެނެސްފައިވާ 84 މީހުންގެ ހަށިގަނޑާ އެކު ގޯލްގެ މޯޗަރީ ވަނީ ފުރިފަ އެވެ.
މަރުވެފައިވާ މީހުންނާ ގުޅޭ ގާނޫނީ ކަންކަން ނިންމައި އީރާނަށް ފޮނުވާލެވެންދެން ހަށިތައް ބަހައްޓަން ބަލާއިރު ގޯލްގެ މޯޗަރީގެ ކެޕޭސިޓީ އަކީ 25 ކަމަށާއި އެހެންވެ ހަށިތައް ކުނިވިޔަ ނުދީ ބަހައްޓަން ރެފްރިޖެރޭޓެޑް ޝިޕިން ކޮންޓެއިނާ ހޯދުމުގެ މަސައްކަތް ވެސް އަންނަނީ ކުރަމުންނެވެ.
ނޭވީގެ ތަރުޖަމާން ބުދިކާ ސަމްޕަތު ވިދާޅުވީ މަނަވަރުން ގެއްލިފައިވާ މީހުން ހޯދުމުގެ މަސައްކަތް އަދިވެސް ކުރަމުން އަންނަ ކަމަށެވެ.
ޒަހަމްވެފައި ވަނިކޮށް ސަލާމަތްކުރި 32 މީހުންނަށް ހޮސްޕިޓަލުގައި ފަރުވާ ދެމުން ދާއިރު ހޮސްޕިޓަލްގެ ސަލާމަތީ ކަންތައް ވެސް ވަނީ ވަރަށް ބޮޑަށް ވަރުގަދަކޮށްފަ އެވެ.
ލަންކާއިން ވަނީ މިހާރު މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅޭ ގޮތުން ވަކި ކޮޅެއް ނެގުމުގެ ބަދަލުގައި އެންމެން ވާހަކަ ދައްކައިގެން މައްސަލަ ހައްލުކުރުމަށް ގޮވާލައިފަ އެވެ.