އީރާންގެ މަނަވަރަކަށް އެމެރިކާގެ ސަބްމެރިންއަކުން ހަމަލާދީފައި ވަނިކޮށް އިތުރު މަނަވަރެއް ސްރީ ލަންކާގެ ބަނދަރަށް ވަދެ ރައްކާތެރިކަން ހޯދާފައި ވަނިކޮށް އީރާންގެ އެހެން މަނަވަރެއް އިންޑިއާގެ ހުޅަނގު ދެކުނު ކޮޗީގެ ބަނދަރުގައި ހުކުރު ދުވަހު ޑޮކް ކޮށްފި އެވެ.
"އައިރިސް ލަވާން ... މާޗް 4 ވަނަ ދުވަހު ކޮޗީގައި ވަނީ ޑޮކް ކޮށްފައި. އޭގެ 183 ފަޅުވެރިން މިހާރު ތިބީ ކޮޗީގެ ނޭވަލް ފެސިލިޓީއެއްގައި،" ސަރުކާރުގެ އޮފިޝަލަކު އޭއެފްޕީއަށް ބުންޏެވެ.
ކޮޗީ ބަނދަރަށް ދިޔަ އައިރިސް ލަވާން އަކީ ވެސް، އެމެރިކާގެ ސަބްމެރިންއަކުން ޓޯޕިޑޯއިން ހަމަލާދީ ބުދަ ދުވަހު ފައްތާލި އައިރިސް ޑެނާ އަދި ލަންކާގެ ޓްރިންކޮމަލީ ބަނދަރަށް މިހާރު ވަދެފައިވާ އައިރިސް ބުޝެހެރްއާ އެކު މިދިޔަ މަހު އިންޑިއާގައި އޮތް ނޭވަލް އެކްސަސައިޒެއްގެ ފްލީޓް ރިވިއުއެއްގައި ބައިވެރިވި އުޅަނދެކެވެ.
އައިރިސް ޑެނާ ފައްތާލި އިރު އޭގައި ތިބި 130 މީހުންގެ ތެރެއިން ޒަހަމްތަކާ އެކު 32 މީހަކު ސަލާމަތްވެފައި ވާއިރު 90 މީހެއްގެ ހަށިގަނޑު ހޯދައި ލަންކާއަށް ވަނީ ގެންގޮސްފަ އެވެ. އަނެއް މަނަވަރުގެ މީހުން ވެސް ބުރާސްފަތި ދުވަހު ލަންކާއަށް ގެންގޮސް މިހާރު ތިބީ ލަންކާ ސިފައިންގެ ފެސިލިޓީއެއްގަ އެވެ.
"ލަންކާގެ ދެކުނުގައި އައިރިސް ޑެނާ [ފައްތާލި] ހާދިސާގެ ދުވަސްކޮޅެއް ކުރިން އީރާނުން ވަނީ އީރާނުން ވަނީ އެ ގައުމުގެ އުޅަނދު އައިރިސް ލަވާން ބަނދަރުކުރުމުގެ ހުއްދައަށް އެދިފައި،" އޭއެފްޕީއާ ވާހަކަ ދެއްކި އޮފިޝަލް ބުންޏެވެ.
"މި ރިކުއެސްޓް ފެބްރުއަރީ 28، 2026 ގައި ލިބުނީ، ބޯޓުގައި ޓެކްނިކަލް މައްސަލައެއް ދިމާވެގެން ކޮޗިންގައި އާޖެންޓުކޮށް ބަނދަރުކުރަންޖެހޭ ކަމަށް."
އޮފިޝަލް ބުނި ގޮތުގައި މި މަނަވަރަށް ހުއްދަ ދީފައިވަނީ މި މަހުގެ ފުރަތަމަ ދުވަހު އެވެ.
އެމެރިކާއިން ބުނެފައިވާ ގޮތުގައި މިދިޔަ ހޮނިހިރު ދުވަހު އެމެރިކާ އާއި އިޒްރޭލުން އީރާނަށް ހަަމަލާދޭން ފެށި ފަހުން އީރާންގެ 30 އަށް ވުރެ ގިނަ އުޅަނދު ފައްތާލާފައިވާނެ އެވެ.