މެދުއިރުމަތީގެ ހަނގުރާމައިގެ ސަބަބުން ޖެޓް ފިއުލްގެ އަގު އިންތިހާއަށް އުފުލިފައި ވާތީ ތެލުގެ އަގު ކަނޑައެޅުމުގެ އުސޫލު ބަދަލުކޮށްދިނުމަށާއި މާލީ އެހީތެރިކަން ދިނުމަށް އެއާ އިންޑިއާ، އިންޑިގޯ އަދި ސްޕައިސްޖެޓުން އިންޑިއާ ސަރުކާރުގައި އެދެފި އެވެ.
އެ އެއާލައިންތަކުން ބުނީ ގައުމުގެ ވައިގެ ދަތުރުފަތުރުގެ ސިނާއަތް އޮތީ ނުހަނު ބޮޑު ނުތަނަވަސްކަމެއްގެ ތެރޭގައި ކަމަށާއި، މިހާރު އޮތީ އޮޕަރޭޝަންތައް "ހުއްޓާލުމުގެ" ތުންފަތްމަތީގައި ކަމަށެވެ.
މެދުއިރުމަތީގެ ނުތަނަވަސްކަމުގެ ސަބަބުން ތެލުގެ އަގު އުފުލިފައި ވާއިރު ވައިގެ ސަރަހައްދު ބޭނުންކުރުމުގައި ހުރި ހުރަސްތަކުގެ ސަބަބުން، ހާއްސަކޮށް، ދުރު ރާސްތާގެ ދަތުރުތަކުގައި އެއާލައިންތަކުގެ ހިންގުމުގެ ހަރަދު ވަނީ ބޮޑުވެފަ އެވެ.
ޖެޓް ފިއުލް ނުވަތަ އޭވިއޭޝަން ޓާބައިން ފިއުލް (އޭޓީއެފް) އަށް ކުރާ ހޭދަ އަކީ އެއާލައިނެއްގެ ހިންގުމުގެ ހަރަދުގެ ގާތްގަނޑަކަށް 40 ޕަސެންޓެވެ.
މި ހާލަތާ ގުޅިގެން، ފެޑަރޭޝަން އޮފް އިންޑިއަން އެއާލައިންސުން ވަނީ ސިވިލް އޭވިއޭޝަން މިނިސްޓްރީއަށް ސިޓީއެއް ފޮނުވައިފަ އެވެ. އެ ސިޓީގައި އެދިފައިވަނީ، މީގެ ކުރިން "ކްރެކް ބޭންޑް" ގާއިމުކުރި އިރު އަމަލުކުރި ފަދައިން، އެތެރޭގެ އުދުހުންތަކާއި ބައިނަލްއަގުވާމީ އުދުހުންތަކުގައި ވެސް ތެލުގެ އަގު ކަނޑައެޅުމުގެ އެއް އުސޫލެއް ހަމަހަމަކޮށް ހިންގުމަށެވެ.
ޖެޓް ފިއުލްގެ އަގު މީގެ ކުރިން ދުވަހަކުވެސް ބޮޑުނުވާ މިންވަރަށް އުފުލިފައިވުމާއި، ސާފުނުކުރާ ތެލާއި ޖެޓް ފިއުލްގެ އަގުގެ ދެމެދުގައި ހުރި ބޮޑު ތަފާތުގެ ސަބަބުން، އެއާލައިންތައް ހިންގުމުގައި މުޅި ސިނާއަތަށް ގޮންޖެހުންތަކާ ކުރިމަތިވެފައިވާ ކަމަށް ފެޑަރޭޝަނުން ބުންޏެވެ.
"ޖެޓް ފިއުލްގެ އަގު ކަނޑައެޅުމުގައި ގެންގުޅޭ ވަގުތީ އުސޫލުތަކާއި (އެތެރޭގެ އުދުހުންތަކާއި ބައިނަލްއަގުވާމީ އުދުހުންތަކުގެ ތަފާތު) ނުވަތަ ޖެޓް ފިއުލްގެ އަގު ހުއްޓުމެއް ނެތި ބޮޑުވުމުގެ ނަތީޖާއަކަށް ވާނީ، އެއާލައިންތަކަށް އުފުލަން ދަތި ބޮޑެތި ގެއްލުންތަކާ ކުރިމަތިވެ، ބޯޓުތައް ގްރައުންޑްކުރަން ޖެހި، ފްލައިޓްތައް ކެންސަލްކުރަން ޖެހުމެވެ،" އެއާ އިންޑިއާ، އިންޑިގޯ އަދި ސްޕައިސްޖެޓް ތަމްސީލުކުރާ ފެޑަރޭޝަނުން ބުންޏެވެ.
އެޕްރީލް 26 ވަނަ ދުވަހު ފޮނުވި ސިޓީގައި ބުނެފައިވަނީ، "ސިނާއަތް ދެމިއޮތުމަށާއި، ކުރިއަށް ދިއުމަށާއި، އޮޕަރޭޝަންތައް މެދުނުކެނޑި ކުރިއަށް ގެންދިއުމަށްޓަކައި، މިހާރު އޮތް ހާލަތުން އަރައިގަތުމަށް ބޭނުންވާ ފަދަ މާލީ އެހީތެރިކަމެއް ފޯރުކޮށްދިނުމަށް ކަމާބެހޭ ފަރާތްތަކުން އަވަސް ފިޔަވަޅުތަކެއް އެޅުމަށް" އެދޭ ކަމަށެވެ. މީގެ އިތުރުން، ޖެޓް ފިއުލް އިން ނަގާ 11 ޕަސެންޓުގެ އެކްސައިޒް ޑިއުޓީ ވަގުތީ ގޮތުން ފަސްކޮށްދިނުމަށް ވެސް އެއާލައިންތަކުން ވަނީ އެދިފަ އެވެ.
އެ ފަރާތްތަކުން ބުނީ، "މައްސަލަ ކުރިމަތިވުމުގެ ކުރީގެ ހާލަތާ އަޅާބަލާއިރު ޖެޓް ފިއުލްގެ އަގު އާދަޔާ ހިލާފަށް ބޮޑުވެފައިވާއިރު، ރުޕީސްގެ އަގު ދަށްވުމާއި، 11 ޕަސެންޓުގެ އެކްސައިޒް ޑިއުޓީ ވެސް އެތައް ގުނައަކަށް ބޮޑުވެ، އެއާލައިންތަކަށް ޖެޓް ފިއުލްގެ އަގު ވަރަށް ބޮޑު ބުރައަކަށް ވެފައިވާ" ކަމަށެވެ.
މިދިޔަ މަހު އިންޑިއާ ސަރުކާރުން ވަނީ އެތެރޭގެ އުދުހުންތަކަށް ބޭނުންކުރާ ތެލުގެ އަގު ބޮޑުވާ މިންވަރު ލީޓަރަކުން 15 ރުޕީސްއަށް ހިފަހައްޓައިފަ އެވެ. ނަމަވެސް ބައިނަލްއަގުވާމީ އުދުހުންތަކަށް ބޭނުންކުރާ ތެލުގެ އަގު ވަނީ ލީޓަރަކުން 73 ރުޕީސްއަށް އުފުލިފަ އެވެ. އެއާލައިންތަކުން ބުނި ގޮތުގައި މި ހާލަތުގެ ސަބަބުން ބައިނަލްއަގުވާމީ ދަތުރުތަކާއި އެތެރޭގެ އުދުހުންތަކަކީ ވެސް ކުރިއަށް ގެންދެވޭނެ ކަންކަމެއް ނޫނެވެ. އަދި އޭޕްރީލް މަހު އޭވިއޭޝަން ސިނާއަތަށް ބޮޑެތި ގެއްލުންތަކެއް ވެފައިވާ ކަމަށް ވެސް ބުންޏެވެ.
ޖެޓް ފިއުލްގެ އަގު ކަނޑައެޅުމުގައި މިހާރު ގެންގުޅޭ ވަގުތީ އުސޫލުތަކަށް ކުއްލި ހައްލެއް ބޭނުންވާކަން ފާހަގަކޮށް ފެޑެރޭޝަނުން ބުނީ، މިހާރުގެ ހާލަތުގެ ސަބަބުން އެތެރޭގެ އުދުހުންތަކާއި ބައިނަލްއަގުވާމީ އުދުހުންތަކުގެ މެދުގައި ބޮޑު ފަރަގެއް އުފެދި، އެއާލައިންތަކުގެ ވިއުގަ ދެމެހެއްޓެނިވި ގޮތެއްގައި ކުރިއަށް ނުގެންދެވޭނެ ކަމަށެވެ.
"އިންޑިއާގެ އެއާލައިން ސިނާއަތް އޮތީ އިންތިހާ ދަރަޖައިގެ ނުތަނަވަސްކަމެއްގެ ތެރޭގައެވެ. އަދި އޮތީ ބަންދުކުރަން ޖެހުމުގެ ނުވަތަ އޮޕަރޭޝަންތައް ހުއްޓާލަން ޖެހުމުގެ ތުންފަތްމަތީގައެވެ."
ފެޑަރޭޝަނުން ވަނީ އޮކްޓޯބަރު 2022 ގައި ތަންފީޒުކުރި "ކްރެކް ބޭންޑް" މެކޭނިޒަމްގެ (ފީފާއަކަށް 12-22 އެމެރިކާ ޑޮލަރު) ދަށުން ދެފުށް ފެންނަ އަގު ކަނޑައެޅުމުގެ އޮނިގަނޑެއް އެކުލަވާލުމަށް ހުށަހަޅައިފަ އެވެ. އެ ފަރާތްތަކުން ބުނާ ގޮތުގައި އެއީ ތެޔޮ ވިއްކާ ކުންފުނިތަކަށް ވެސް އެކަށީގެންވާ ފައިދާއެއް ލިބޭނެ އުސޫލެކެވެ.