ކޮލަމްބޯ، ސްރީލަންކާ (ސެޕްޓެމްބަރު 29) - ސްރީ ލަންކާގެ އިންފްލޭޝަން، 38 މަސްދުވަހުގެ ތެރޭގައި ނުދާހާ މައްޗަށް ދިއުމާ ގުޅިގެން، އާންމު ދަތުރުފަތުރަށް މުހިންމު ޑީސަލްގެ އަގު ކޮންޓްރޯލްކުރުމަށް 126 މިލިއަން އެމެރިކާ ޑޮލަރުގެ ސަބްސިޑީއެއް ދިނުމަށް ނިންމައިފި އެވެ.
ފެބްރުއަރީ މަހު ފެށުނު މެދުއެރުމަތީގެ ހަނގުރާމާ އެކު ދުނިޔޭގެ ބާޒާރުގައި ހަކަތައިގެ އަގުތައް އުފުލުމުގެ ސަބަބުން، އިމްޕޯޓަށް ބަރޯސާވާ ސްރީ ލަންކާއިން ވަނީ ތެލުގެ އަގު ގާތްގަނޑަކަށް 50 ޕަސެންޓަށް ބޮޑުކޮށްފަ އެވެ.
ސަރުކާރުގެ ތަރުޖަމާނު ނަލިންދަ ޖަޔަތިއްސަ ވިދާޅުވީ އޮކްޓޯބަރު މަހުން ފެށިގެން ކުރިއަށް އޮތް ތިން މަސްދުވަހު ޑީސަލްގެ ފުރިހަމަ އަގު އާންމުން ދައްކަން ނުޖެހޭނެ ކަމަށެވެ. ނަމަވެސް ޕެޓްރޯލަށް އެއްވެސް ސަބްސިޑީއެއް ނުލިބޭނެ އެވެ. އޭނާ ވިދާޅުވި ގޮތުގައި ހަނގުރާމަ ފެށުނު ފުރަތަމަ ތިން މަސްދުވަހުގެ ތެރޭގައި ވެސް ޑީސަލާއި ޕެޓްރޯލް ސަބްސިޑައިޒް ކުރުމަށް 175 މިލިއަން ޑޮލަރު ވަނީ ހޭދަކޮށްފަ އެވެ.
"އަޅުގަނޑުމެން މި މަސައްކަތް ކުރަނީ އެންމެ ކުޑަމިނުން، ޑީސަލްގެ އަގު މާ ބޮޑަށް އުފުލުނުނުދީ ހިފެހެއްޓޭތޯ،" ކޮލަމްބޯގައި ބޭއްވި ނޫސްވެރިންގެ ބައްދަލުވުމެއްގައި ޖަޔަތިއްސަ ވިދާޅުވި އެވެ.
"އަޅުގަނޑުމެންގެ އުންމީދަކީ މެދުއިރުމަތީގެ ހަނގުރާމަ އަވަހަށް ނިމުމަކަށް އައުން. ދުނިޔޭގެ ބާޒާރުގައި ތެލުގެ އަގު އިންތިހާއަށް މައްޗަށް ދިއުމަކީ އަޅުގަނޑުމެންނަށް އޭގެ ނޭދެވޭ އަސަރު ވަރަށް ބޮޑަށް ކުރާ ކަމެއް."
ޑީސަލުން ސަބްސިޑީ ދޭން ނިންމި އިރު، ބަނގުރޫޓުވުމުން އަރައިގަތުމަށް ލަންކާއަށް އެހީވި އައިއެމްއެފުން ވަނީ ހަކަތަ ވިއްކައިގެން ލިބެންޖެހޭ ފުރިހަމަ އަގު ނުހޯދޭ ނަމަ އަލުން މާލީ ނުރައްކަލެއްގެ ތެރެއަށް ވެއްޓިދާނެ ކަމަށް އިންޒާރު ދީފަ އެވެ.
ކެއުންބުއިމާއި އެހެނިހެން މުހިންމު ތަކެތީގެ އަގުތައް އުފުލުމުގެ ސަބަބުން، އޯގަސްޓް މަހު ސްރީ ލަންކާގެ އިންފްލޭޝަން މިހާރު ހުރީ 38 މަސްދުވަހުގެ ތެރޭގައި ނުދާހާ މައްޗަށް ގޮސް، 8.0 ޕަސެންތަށް އަރައިފަ އެވެ.
ލަންކާއިން ވަނީ މެދުއިރުމަތީގެ ހަނގުރާމަ ދިގުދެމިގެންގޮސްފި ނަމަ، 2022 ވަނަ އަހަރު ބޭރު ފައިސާ ހުސްވެގެން ދިމާވި އިގްތިސާދީ ކާރިސާއިން އަރައިގަތުމަށް ކުރަމުންދާ މަސައްކަތްތަކަށް ބޮޑެތި ގޮންޖެހުންތަކެއް ދިމާވެދާނެ ކަމުގެ އިންޒާރު ދީފަ އެވެ.