ދުބާއީން އިޒްރޭލުގެ ތެލް އަވީވަށް ދަތުރުކުރި ފްލައިދުބާއީގެ ފްލައިޓް FZ1073 ގައި ކޯ-ޕައިލަޓް، ކެޕްޓަނަށް ހަމަލާދީ ބޯޓު ވައްޓާލަން އުޅުނު ކަމަށް ބެލެވޭ ހާދިސާ ހިނގި އިރު ބޯޓުގައި އިތުރު ދެ ޕައިލެޓުން ތިބި ކަމަށާއި އެކަމަކު އެއީ ސެކިއުރިޓީ އިންޒާރަކާ ގުޅިގެން ނޫން ކަމަށް ބުނެފި އެވެ.
ޖެރޫސަލަމް ޕޯސްޓުން ރިޕޯޓުކޮށްފައިވާ ގޮތުގައި، ބޯޓުގައި އާންމުކޮށް ތިބޭ ދެ ޕައިލަޓުންގެ އިތުރުން ދެން ތިބި ދެ ޕައިލަޓުންނަކީ ސަރަހައްދުގެ ހާލަތު އޮތް ގޮތުން ދަތުރުގެ ރޫޓު ބަދަލުކުރަން ޖެހިއްޖެ ނަމަ، ޕައިލަޓުންގެ މަސައްކަތުގެ ވަގުތު (ޑިއުޓީ އަވާސް) އިތުރުވެގެން ދިއުމުން ދެން ތިބި ޕައިލަޓުންނަށް ބޯޓު ދުއްވޭނެ ގޮތް ހެދުމުގެ ގޮތުން ގޮސް ތިބި ދެ މީހުންނެވެ. މަސްދަރުތަކާ ހަވާލާދީ އެ ނޫހުން ބުނީ، ކުވެއިތު ފަދަ ގައުމެއްގެ މަތިން ދަތުރުކުރަނިކޮށް ރޫޓު ބަދަލުކުރަން ޖެހިއްޖެ ނަމަ ދަތުރަށް އިތުރު ގަޑިއެއް ނުވަތަ ދެގަޑިއިރު އިތުރުވެދާނެ ކަމަށެވެ. އެހެންވެއްޖެ ނަމަ، އެނބުރި ދިއުމުގެ ދަތުރުގައި ކްރޫއިންނަށް އުސޫލުގެ ދަށުން ހުއްދަ ނޯންނާނެތީ އިތުރު ދެ ޕައިލަޓުން ބޯޓުގައި ބައިތިއްބަން ނިންމީ ކަމަށްވެ އެވެ.
ބުދަ ދުވަހު ހިންގި ހާދިސާގައި ކޯ-ޕައިލަޓް ވަނީ ކެޕްޓަނަށް ވަޅިއަކުން ހަމަލާދީ ބޯޓު ވައްޓާލަން މަސައްކަތްކޮށްފައި ކަމަށް ތުހުމަތުކުރެ އެވެ. މި ހަމަލާއާ އެކު ބޯޓު ވަނީ މަދު ސިކުންތުކޮޅެއްގެ ތެރޭގައި 14,000 ފޫޓަށް ތިރިއަށް ވެއްޓިފަ އެވެ. ނަމަވެސް ބޯޓުގައި ތިބި ފަސިންޖަރުންނާއި ކްރޫއިންގެ ހުޝިޔާރުކަމުން ވަނީ، ހަމަލާދިން މީހާ ކޮންޓްރޯލްކޮށް، ސައުދީ އަރަބިއްޔާގެ ތަބޫކް އެއާޕޯޓަށް އިމަޖެންސީގައި ބޯޓު ޖައްސައިފަ އެވެ.
ހާދިސާ ހިނގި ވަގުތު ބޯޓުގައި ހުރި އިޒްރޭލުގެ ފަސިންޖަރަކު ބުނި ގޮތުގައި، ކޮކްޕިޓް ތެރޭގައި މާރާމާރީ ހިންގައި ބޯޓު ތިރިއަށް ވެއްޓެން ފެށުމުން، ފަސިންޖަރުން ކެބިން ތެރޭގައި ތިބި އިތުރު ދެ ޕައިލަޓުން ހޯދައި، އެ މީހުންނަށް އަންގައިގެން ކޮކްޕިޓަށް ފޮނުވި އެވެ. އެއާ އެކު އިތުރު ދެ ޕައިލެޓުންގެ ތެރެއިން އެކަކު ވަނީ ކޮކްޕިޓަށް ވަދެ ބޯޓުގެ ކޮންޓްރޯލް ނަގައިފަ އެވެ. އަދި ބޯޓުގައި ތިބި ފަސިންޖަރުން ވަނީ ހަމަލާދިން ކޯ-ޕައިލަޓް ހިފަހައްޓައި، ޗާޖިން ކޭބަލް ބޭނުންކޮށްގެން އޭނާ ބަނދެފަ އެވެ. އަދި ބޯޓުގައި ހުރި އިޒްރޭލުގެ ޑެންޓިސްޓަކު ވަނީ ޒަހަމްވި ކެޕްޓަނަށް ފަރުވާ ދީފަ އެވެ.
އިޒްރޭލުގެ އޮފިޝަލުން ވަނީ މިއީ ގަސްދުގައި ދޭން އުޅުނު ޓެރަރިސްޓް ހަމަލާއެއްގެ ގޮތުގައި ސިފަކޮށްފަ އެވެ. އިޒްރޭލުގެ ޑިފެންސް މިނިސްޓަރު އިސްރާއީލް ކާޓްޒް މިއީ "ޖިހާދީ ޓެރަރިސްޓް ހަމަލާއެއް" ކަމަށް ބުނެފައިވާއިރު، ބޮޑުވަޒީރު ބެންޖަމިން ނަތަންޔާހޫ ވަނީ ބޯޓުގެ ކްރޫއިންނާއި ފަސިންޖަރުން ބޮޑު ކާރިސާއަކުން ބޯޓު ސަލާމަތްކުރި ކަމަށް ބުނެ ތައުރީފުކޮށްފަ އެވެ.
އިޒްރޭލާއި ހަމާސްއާ ދެމެދު ހިނގަމުންދާ ހަނގުރާމައިގެ ތެރޭގައި ބޭރުގެ ގިނަ އެއާލައިންތަކުން އިޒްރޭލަށް ދަތުރުތައް ހުއްޓާލާފައިވީ ނަމަވެސް، ޔޫއޭއީގެ ފްލައިދުބާއީން އަންނަނީ މެދުކެނޑުމެއް ނެތި އިޒްރޭލަށް ދަތުރުތައް ބާއްވަމުންނެވެ.