ގުދުސް | އޭއެފްޕީ | ބުދަ 30 ސެޕްޓެމްބަރު 2026 - އިޒްރޭލުގެ ގިނަ އަދަދެއްގެ ފަސިންޖަރުންނާ އެކު ދުބާއީން ފުރައިގެން ދަތުރުކުރި ފްލައިދުބާއީގެ ބޯޓު ވައްޓާލަން "ޖިހާދީ" ޕައިލެޓަކު މަސައްކަތްކުރީ ކަމަށާއި، ނަމަވެސް ފަސިންޖަރުން އޭނާ ކޮންޓްރޯލްކޮށް "ބޮޑު ކާރިސާއަކުން" ސަލާމަތްކޮށްފައިވާ ކަމަށް އިޒްރޭލުގެ ވެރިން ބުދަ ދުވަހު ބުނެފި އެވެ.
"ދަތުރުމަތީގައި، އިޒްރޭލާ ކައިރިވަމުން ދަނިކޮށް، އެއް ޕައިލެޓު އަނެއް ޕައިލެޓަށް ވަޅިން ހަމަލާދީ، ބޯޓުގައި ތިބި އެންމެންނާ އެކު ބޯޓު ވައްޓާލަން އުޅުނު ކަމަށް ބެލެވޭ،" ވީޑިއޯ މެސެޖެއްގައި ބޮޑުވަޒީރު ބެންޖަމިން ނަތަންޔާހޫ ބުންޏެވެ.
ނަތަންޔާހޫ ބުނި ގޮތުގައި، ބޯޓު ތިރިއަށް ވެއްޓެން ފެށުމުން ކޮކްޕިޓަށް ވަދެ، ބޯޓު ވައްޓާލަން މަސައްކަތްކުރި ޕައިލެޓާ ކުރިމަތިލީ އިޒްރޭލުގެ ފަސިންޖަރަކާ އޭނާ ވާހަކަަ ދައްކާފައިވާ ކަމަށެވެ.
"ބޯޓުގައި ހުރި އެއާ ކްރޫގެ އަނެއް މެމްބަރު ކޮކްޕިޓަށް ވަދެ، ބޯޓު ހަމައަކަށް އަޅުވައި ކޮންޓްރޯލް ކުރި،" ނަތަންޔާހޫ ބުންޏެވެ.
"އާދަޔާހިލާފު ހިތްވަރާއި ކެރޭކަން ދެއްކި މި ބަތަލުންނަށް އަހަރެން ސެލިއުޓް ކުރަން. އެ މީހުން ގިނަ ބައެއްގެ ފުރާނަ ސަލާމަތްކޮށް، ބޮޑު ކާރިސާއެއް ހުއްޓުވި."
ޑިފެންސް މިނިސްޓަރު އިސްރާއީލް ކާޓްޒް މި ހާދިސާ ސިފަކުރީ "ޖިހާދީ ޓެރަރިސްޓް ހަމަލާއެއް ދިނުމަށް ކުރި މަސައްކަތެއް" ގެ ގޮތުގަ އެވެ. އަދި އެކަން ނާކާމިޔާބުވީ "އިޒްރޭލުގެ ބައެއް ފަސިންޖަރުންގެ ކެރުމުގެ ސަބަބުން" ކަމަށް އޭނާ ބުންޏެވެ.
ނަމަވެސް ޕައިލެޓުގެ މައުލޫމާތު ވެސް އަދި ހާމަކޮށްފައި ނުވާއިރު އޭނާގެ މަގުސަދާ ބެހޭ ގޮތުން ކާޓްޒް އަށް މައުލޫމާތު ލިބުނު ގޮތެއް ހާމައެއް ނުކުރެ އެވެ.
ރިޕޯޓްތައް ބުނާ ގޮތުގައި ބޯޓު ހައިޖެކްކުރަން އުޅުނު ކަމުގެ ތުހުމަތުކުރަނީ އުމާންގެ ކޯޕައިލެޓަށެވެ. އޭނާ ހަމަލާދިން ޕައިލެޓަކީ އިންޑިއާ މީހެއް ކަމަށް ވެސް ރިޕޯޓްކޮށްފައިވެ އެވެ.
ނަތަންޔާހޫ ބުނި ގޮތުގައި، އެހެން ޕައިލެޓަކަށް ވަޅިން ހަމަލާދިން ކަމަށް ތުހުމަތުކުރެވޭ ޕައިލެޓު "ހައްޔަރުކޮށް، މިހާރު ސައުދީ އަރަބިއްޔާގެ ކަމާބެހޭ ފަރާތްތަކުން ދަނީ އޭނާއާ ސުވާލުކުރަމުން" ނެވެ.
"އިތުރަށް ކުރިމަތިވެދާނެ ނުރައްކާތަކަށް ތައްޔާރުވުމަށް ވަނީ ސަލާމަތީ ހިދުމަތްތަކަށް އަންގާފައި. އަދި އަހަރެމެން ދަނީ ހާލަތު ބަލަމުން،" ނަތަންޔާހޫ ބުންޏެވެ.
އިޒްރޭލުގައި އޮކްޓޯބަރު 27 ގައި ބާއްވާ އާންމު އިންތިހާބުގެ ކުރިން ހަމަލާތަކެއް ދީފާނެ ކަމުގެ އިންޒާރު ނަތަންޔާހޫ ދިނުމާ ގުޅިގެން، އިދިކޮޅު ލީޑަރު ޔާއިރް ލަޕިޑް ވަނީ ނަތަންޔާހޫ ބިރުވެރިކަން އުފައްދަން މަސައްކަތްކުރާ ކަމަށް ތުހުމަތުކޮށްފަ އެވެ. ކާޓްޒް ވަނީ ލަޕިޑަށް އިޝާރާތްކޮށް، ސަރުކާރުގެ ސެކިއުރިޓީ އިންޒާރުތަކަށް "ބޭރުގެ ދުޝްމަނުންނާއި، މައުލޫމާތު ރަނގަޅަށް ނުލިބޭ ކުރީގެ އޮފިޝަލުން ވެސް" ސީރިއަސްކޮށް ބަލަންޖެހޭނެ ކަމަށް ބުނެފަ އެވެ.