ޔޫއޭއީން އިޒްރޭލަށް ދަތުރުކުރި ފްލައިދުބާއީގެ ފްލައިޓް ތެރޭގައި ކޯ-ޕައިލެޓް ހަމަލާދިނުމުން ޒަހަމް ވެފައި އޮވެގެން ވެސް ކޮކްޕިޓްގެ ދޮރު ހުޅުވަައި އެންމެން ސަލާމަތްކުރެވޭނެ މަގު ތަނަވަސްކޮށްދިނުމަށް ހިތްވަރު ލިބުނީ ބޯޓުގައި ތިބި އެންމެން މަރުވާން ދޫކޮށްލައިގެން ނުވާނެ ކަމުގެ އިހްސާސާ އެކުގައި ކަމަށް އިންޑިއާގެ ޕައިލެޓް ބުނެފި އެވެ.
އުމާންގެ ކޯ-ޕައިލެޓްގެ ހަމަލާތަކުގައި ވަރަށް ބޮޑަށް ޒަހަމްވި އިންޑިއާގެ ޕައިލެޓް މި ހާދިސާއަށް ފަހު ފުރަތަމަ ފަހަރަށް މި ވާހަކަތައް ދެއްކީ ހޮސްޕިޓަލުގައި އޮވެ އިންޑިއާގެ ބޮޑުވަޒީރު ނަރެންދުރަ މޯދީއާ ފޯނުން ދެއްކި ވާހަކައިގަ އެވެ.
ބުދަ ދުވަހު ހިނގި ހާދިސާގައި، ލިބުނު އަނިޔާތަކާއެކު ވެސް ކޮކްޕިޓްގެ ދޮރު ހުޅުވާލުމަށް އޭނާ ކުރި މަސައްކަތުން ނުރައްކާތެރި ކާރިސާއަކުން ބޯޓު ސަލާމަތްވި އެވެ. އެކަމުގެ ސަބަބުން ފަސިންޖަރުންނާއި ކްރޫއިންން ބޯޓުގެ ކޮންޓްރޯލް އަތުލައި، ސައޫދީ އަރަބިއްޔާއަށް ކުއްލި ހާލަތުގައި ބޯޓު ޖެއްސުމުގެ ފުރުސަތު ލިބުނެވެ.
ޔޫއޭއީގެ ރައީސްގެ މުޝީރު އަންވަރު ގަރްގާޝް ހުކުރު ދުވަހު ވަނީ މި ހާދިސާއަކީ "ޓެރަރިސްޓް އަމަލެއް" ކަމަށް ވިދާޅުވެފަ އެވެ.
ކޯ-ޕައިލެޓް ޔޫއޭއީއާ ހަވާލުކޮށްފައި ވާއިރު ބޯޓުގައި ތިބި އިޒްރޭލު ފަސިންޖަރުން މިހާރު ވަނީ އެހެން ބޯޓެއްގައި އަނބުރާ އިޒްރޭލަށް ގެންގޮސްފަ އެވެ.
ފްލައިދުބާއީގެ ކެޕްޓަން ސްމިތު މައްޗާރް، ހޮސްޕިޓަލުގައި އޮވެ ވީޑިއޯ ކޯލެއް މެދުވެރިކޮށް މޯދީއާ ވާހަކަ ދައްކަމުން ބުނީ ސަލާމަތްކުރުމަށް އަވަހަށް މަސައްކަތްކުރަންޖެހޭކަން އޭނާއަށް އެނގުނު ކަމަށާއި، އެހީތެރިކަން ހޯދުމަށް ކޮކްޕިޓް ދޮރު ހުޅުވުމަކީ "ފަހު މަސައްކަތް" ކަމަށެވެ.
"އަހަންނަށް ވަރަށް ބޮޑަށް އަނިޔާވެގެން ވެއްޓުނު. އެ ވަގުތު މަތިންދާބޯޓު ތިރިއަށް ވެއްޓެމުންދާކަން އަހަންނަށް އިހުސާސްކުރެވުނު. އަހަންނަށް އެނގުނު މިއީ ފަހު ފުރުސަތުކަން، ދޮރު އިނީ ކައިރީގައި،" އޭނާ ބުންޏެވެ.
"އެ ވަގުތުވެސް އަހަންނަށް ހަމަލާދެމުންދިޔަ، ނަމަވެސް އަހަރެން ދޮރު ހުޅުވާލުމާ އެކު އެންމެން އެތެރެއަށް ވަނީ."
އޭވިއޭޝަން ދާއިރާގައި 17 އަހަރުގެ ތަޖުރިބާ ހުރި، އަދި ކެޕްޓަނެއްގެ ގޮތުގައި 11 އަހަރު ހޭދަކޮށްފައިވާ މައްޗާރް ވަނީ އަނިޔާވެގެން ވެއްޓިފައި އޮތްއިރު ބޯޓު ތިރިއަށް ވެއްޓެމުންދިޔަކަން އިހުސާސްވި ވަގުތު ސިފަކޮށްދީފަ އެވެ.
ޕައިލެޓް ބުނީ ގިނަ އަހަރުތަކެއްގެ އޭވިއޭޝަން ތަޖުރިބާގެ ސަބަބުން، އަނިޔާވެފައި އޮތްއިރު ވެސް ހިނގަމުންދިޔަ ކަންތައްތައް ދެނެގަންނަން އެނގުނު ކަމަށެވެ.
ޔޫއޭއީގެ ޖެނެރަލް ސިވިލް އޭވިއޭޝަން އޮތޯރިޓީން ހުކުރު ދުވަހު މައްޗާރާއި، ފްލައިޓް ކްރޫއިންނާއި، އަދި މި ހަމަލާއަށް އިޖާބަދިން ފަސިންޖަރުންނަށް ތައުރީފުކޮށް ބަޔާނެއް ވެސް ނެރެފައިވެ އެވެ.
މީޑިއާ ރިޕޯޓްތައް ބުނާ ގޮތުގައި ހަމަލާދިން ކޯ-ޕައިލެޓަކީ އޭނާގެ ހަރުކަށި ވިސްނުމުގެ ސަބަބުން އުމާންގެ އެއާލައިނުން ވަކިކޮށްފައިވާ މީހެކެވެ. އަދި އޭނާ އަކީ ގިނަ ދުވަހު ސީރިއާގައި އުޅުނު މީހެއް ކަމަށް ވެސް ބައެއް ރިޕޯޓްތައް ބުނެ އެވެ.