މި އަހަރުގެ މިހާތަނަށް ދައުލަތަށް ލިބުނު އާމްދަނީ 29 ޕަސެންޓު އިތުރުވެ، ދައުލަތުގެ މާލީ ހާލަތަށް ރަނގަޅު ފެށުމެއް ލިބިފައިވާކަން ފިނޭންސް މިނިސްޓްރީން އާންމުކުރި ތަފާސްހިސާބުތަކުން ދައްކައިފި އެވެ.
އެ މިނިސްޓްރީން އާންމުކުރި ހަފްތާއެއްގެ ފިސްކަލް ރިޕޯޓުން ދައްކާ ގޮތުން، މިދިޔަ މަހުގެ 26 ވަނަ ދުވަހާ ހަމައަށް ދައުލަތަށް އާމްދަނީ އާއި ހިލޭ އެހީގެ ގޮތުގައި ޖުމުލަ 7.8 ބިލިއަން ރުފިޔާ ލިބިފައިވާއިރު، ޖުމުލަ ހަރަދަކީ 5.9 ބިލިއަން ރުފިޔާ އެވެ.
މިދިޔަ އަހަރުގެ މި މުއްދަތާ އަޅާބަލާއިރު އާމްދަނީ އަށް ވަނީ ބޮޑު ކުރިއެރުމެއް ލިބިފަ އެވެ. އެގޮތުން، 2025 ވަނަ އަހަރު ލިބުނު ހަ ބިލިއަން ރުފިޔާއާ އަޅާބަލާއިރު، މި އަހަރު ލިބުނު އާމްދަނީ ވަނީ 29.3 ޕަސެންޓު އިތުރުވެފަ އެވެ. މީގެ ތެރެއިން 83 ޕަސެންޓަކީ ޓެކުހުގެ ގޮތުގައި ލިބުނު އާމްދަނީ އެވެ.
ޓެކުހުގެ އާމްދަނީ އަށް މި އަހަރު އެންމެ ބޮޑު ކުރިއެރުމެއް ލިބިފައިވަނީ ޓޫރިޒަމް ދާއިރާގެ މުދަލާއި ހިދުމަތުގެ ޓެކްސް (ޓީޖީއެސްޓީ) އިންނެވެ. އެގޮތުން ޓީޖީއެސްޓީގެ ގޮތުގައި 2.3 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރަށް ވުރެ 39.4 ޕަސެންޓު އިތުރު އަދަދެކެވެ.
މި މުައްދަތުގައި ޖީއެސްޓީގެ ގޮތުގައި 3.2 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ މިމުއްދަތާ އަޅާބަލާއިރު 32.1 ޕަސެންޓުގެ އިތުރުވުމެކެވެ. އަދި ވިޔަފާރި އާއި މުދަލުން ނަގާ ޓެކުހުގެ ގޮތުގައި 2.2 ބިލިއަން ރުފިޔާ ވަނީ ލިބިފަ އެވެ.
ދައުލަތުގެ ހަރަދުތަކަށް ބަލާއިރު، މިދިޔަ އަހަރާ އަޅާބަލާއިރު ޖުމުލަ ހަރަދުތައް ގާތްގަނޑަކަށް އެއްވަރެއްގައި ހިފެހެއްޓިފައިވިޔަސް، މުވައްޒަފުންގެ މުސާރަ އާއި އިނާޔަތްތަކަށް ކުރާ ހަރަދު ވަނީ 9.6 ޕަސެންޓު އިތުރުވެފަ އެވެ.
މި އަހަރުގެ މި މުއްދަތުގައި މުސާރައާއި ޕެންޝަނަށް 2.64 ބިލިއަން ރުފިޔާ ހަރަދު ކޮށްފައިވާއިރު ޕޭ ހާމަނައިޒޭޝަން ކުރުމުން ބޮޑުވި އަދަދު އޭގެ ތެރޭގައި ހިމެނެ އެވެ.
އެއާ އެކު، މިދިޔަ އަހަރުގެ މި މުއްދަތުގައި 98.2 މިލިއަން ރުފިޔާގައި ހުރި ސާޕްލަސް، މި އަހަރު ވަނީ 1.9 ބިލިއަން ރުފިޔާ އަށް އުފުލިފަ އެވެ.
ސޮވެރިން ޑިވެލޮޕްމަންޓް ފަންޑަށް (އެސްޑީއެފް) ޖަމާކުރި އަދަދުވެސް ވަނީ 2.5 ޕަސެންޓު އިތުރުވެ، 287.1 މިލިއަން ރުފިޔާއަށް އަރައިފަ އެވެ.
ބޭރު ފައިސާގެ އާމްދަނީ އަށް ބަލާއިރު، މި މުއްދަތުގައި 222.8 މިލިއަން އެމެރިކާ ޑޮލަރު ދައުލަތަށް ލިބިފައިވެ އެވެ.
މިއީ މި އަހަރު ފެށުނު ފަހުން، މި ރިޕޯޓު އާންމުކުރި ފުރަތަމަ ފަހަރެވެ.
ފިނޭންސް މިނިސްޓްރީން ބުނީ ކޮންމެ މާލީ އަހަރެއް ފަށާއިރު، ބައެއް ސަބަބުތަކާ ހެދި މާލީ ހިސާބުތައް ހާމަކުރުމުގައި ލަސްވާ ކަމަށެވެ. ވަކިން ހާއްސަކޮށް، މި އަހަރު ދައުލަތުގެ އެކައުންޓިން ނިޒާމުގެ އޮނިގަނޑަށް ގެނައި ބަދަލުތަކާ ގުޅިގެން، ރިޕޯޓު ޝާއިއުކުރުން ލަސްވިކަމަށް އެ މިނިސްޓްރީން ބުންޏެވެ.