އޫކްލާ ސްޕީޑް ޓެސްޓްގެ ފަރާތުން ދޭ 'ފާސްޓެސްޓް 5ޖީ ނެޓްވޯކް' އާއި 'ބެސްޓް 5ޖީ ނެޓްވޯކް' އަދި 'ބެސްޓް 5ޖީ ގޭމިން އެކްސްޕީރިއަންސް' އެވޯޑް Q1-Q2 2025 އަށް ދިރާގަށް ލިބިއްޖެ އެވެ.
އެ އެވޯޑުތައް ދިރާގާ ހަވާލުކޮށްފައިވަނީ ސްޕެއިންގެ ބާސެލޯނާގައި ބޭއްވި ޓެލެކޮމިއުނިކޭޝަންސްގެ ދާއިރާގެެ ދުނިޔޭގެ އެންމެ ބޮޑު ހަރަކާތް ކަމަށްވާ މޮބައިލް ވޯލްޑް ކޮންގްރެސްގަ އެވެ. ދިރާގުން ބުނީ އެ ކާމިޔާބީން ދައްކުވައިދެނީ ދިރާގުގެ ހިދުމަތްތައް ދުނިޔޭގެ ފެންވަރުގައި ފޯރުކޮށްދިނުމަށް އަދި ޑިޖިޓަލް ރާއްޖެ ބިނާކުރުމަށް ދިރާގުން ކުރަމުންދާ މަސައްކަތްތައް ކަމަށެވެ.
އެގޮތުން 2019 އަހަރު، ދިރާގަކީ ސައުތު އޭޝިއާ އަދި ރާއްޖޭގައި 5ޖީ ހިދުމަތް ތައާރަފްކުރި ފުރަތަމަ ސާވިސް ޕްރޮވައިޑަރުކަން އެ ކުންފުނިން ފާހަގަކުރި އެވެ. ދިރާގުން ރާއްޖޭގެ އާބާދީގެ 73 ޕަސެންޓަށް 5ޖީ ނެޓްވޯކް ވެސް ވަނީ ފޯރުކޮށްދީފަ އެވެ.
ދިރާގުން ވަނީ އޫކްލާއިން ދޭ 'މޯލްޑިވްސް ފާސްޓަސްޓް މޯބައިލް ނެޓްވޯކް' ވިދިވިދިގެން ތިން އަހަރު ހޯދައި، 'ފާސްޓަސްޓް 5ޖީ ނެޓްވޯކް' ދެއަހަރު ހޯދައި އަދި ރާއްޖޭގެ އެންމެ ހަލުއި ނެޓްވޯކްގެ މަގާމު ހޯދައިފަ އެވެ.
ދިރާގުން ދަނީ ޓެކްނޮލޮޖީއަށް އަންނަ ބަދަލުތަކާ އެއްހަމައެއްގައި ތިބެ ކަސްޓަމަރުން ބާރުވެރިކުރުމަށް އެންމެ ފަހުގެ ހިދުމަތްތައް ދުނިޔޭގެ ފެންވަރުގައި ފޯރުކޮށްދެމުންނެވެ.