މި މަހު 19 ގައި ރިލީޒްކުރާ ރަންވީރު ސިންގުގެ "ދުރަންދަރު 2"އަށް ޕްރިމިއާގެ ކުރިން ބޮޑު ތަރުހީބެއް ލިބެން ފަށައިފި އެވެ.
ރިޕޯޓްތައް ބުނި ގޮތުގައި، އަދިތުޔަ ދަރް ޑައިރެކްޓްކުރާ އެ ފިލްމުގެ އެޑްވާންސް ބުކިންއަށް ހުޅުވާލިތާ 24 ގަޑިއިރު ތެރޭގައި ވަނީ ވަރަށް ބޮޑު ކާމިޔާބީއެއް ހޯދައިފަ އެވެ. ބުކިންއަށް ހުޅުވާލިތާ ފުރަތަމަ 24 ގަޑިއިރު ތެރޭގައި އެކަނި ވެސް 87،000 އަށް ވުރެ ގިނަ ޓިކެޓް ވަނީ ވިކިފަ އެވެ.
މި މަހު 18 ގައި ބޭއްވުމަށް ހަމަޖެހިފައިވާ ޕެއިޑް ޕްރިމިއާތަކުން އެކަނިވެސް މިހާތަނަށް 8 ކްރޯޑް ރުޕީސް އަށް ވުރެ ބޮޑު އާމްދަނީއެއް ލިބިފައިވާ ކަމަށް ރިޕޯޓްތައް ބުންޏެވެ.
ބޮލީވުޑްގެ ޓްރޭޑް އެނަލިސްޓް ތަރަން އަދާޝް ބުނި ގޮތުގައި، "ދުރަންދަރު: ދަ ރިވެންޖު"ގެ ބުކިންއަށް ހުޅުވާލުމާ އެކު، ގަޑިއަކު 7،500 ޓިކެޓް ވިކެމުންދިޔަ އެވެ.
މި ފިލްމަކީ 250-475 ކްރޯޑް ރުޕީސްގެ ބަޖެޓަކުން ހެދި ފިލްމެކެވެ.
ފިލްމުތަކުގެ އާމްދަނީ އާންމުކުރާ ސަކްނިލްކް އިން ރިޕޯޓްކުރި ގޮތުގައި، ބުކިންއަށް ހުޅުވާލިތާ ދެ ގަޑިއިރު ނުވަނީސް ދުނިޔޭގެ އެކި ކަންކޮޅުތަކުން އެ ފިލްމަށް ހަތަރު ކްރޯޑް ރުޕީސްގެ ޓިކެޓް ވަނީ ވިކިފަ އެވެ.
"ދުރަންދަރު: ދަ ރިވެންޖު"ގެ ޓްރެއިލާ އިއްޔެ އާންމުކުރުމާ އެކު، 24 ގަޑިއިރު ނުވަނީސް މިހާތަނަށް ޔޫޓިއުބުގައި ވަނީ 38 މިލިއަން ވިއުސް ލިިބިފަ އެވެ.
މި ފިލްމަކީ މިދިޔަ އަހަރު ބޮޑު ކާމިޔާބީއެއް ހޯދި "ދުރަންދަރު"ގެ ދެވަނަ ބައެވެ. ފުރަތަމަ ފިލްމަށް ދުނިޔޭގެ ބޮކްސް އޮފީހުގައި ވަނީ 1،300 ކްރޯޑް ރުޕީސްއަށް ވުރެ ބޮޑު ރެކޯޑް އާމްދަނީއެއް ލިބިފަ އެވެ.
ރަންވީރު ރޯލު ކުޅޭ "ދުރަންދަރު"ގައި ދައްކަނީ 1999 ވަނަ އަހަރު އިންޑިއަން އެއާލައިންސްގެ ފްލައިޓް އައިސީ-814 ހައިޖެކްކުރި ހާދިސާ އާއި އިންޑިއާގެ ގާނޫނު ހަދާ މަޖިލީހަށް 2001 ވަނަ އަހަރު ދިން ހަމަލާގެ ފަހުން އިންޓެލިޖެންސް ބިއުރޯގެ ޗީފް އަޖޭ ސަންޔާލް (އާރް. މަދަވަން)، ޕާކިސްތާނުގެ ޓެރަރިސްޓުންގެ ނެޓްވޯކް ފުނޑާލުމަށް ޒުވާނަކު އެ ގައުމަށް ޖާސޫސެއްގެ ގޮތުގައި ފޮނުވާ ހިސާބުން ދެން ހިނގާ ކަންތައްތަކެވެ.
ޖާސޫސެއް ނުވަތަ އިންޑިއާގެ ރޯގެ އޭޖެންޓެއްގެ ގޮތުގައި ޕާކިސްތާނަށް ފޮނުވާ ޒުވާނާގެ ރޯލު ކުޅެނީ ރަންވީރެވެ.
ރަންވީރާ އެކު މުހިންމު ރޯލުތައް ކުޅެނީ ސާރާ އަރްޖުން، އަކްޝޭ ކަންނާ، ސަންޖޭ ދަތު، އާރު މަދަވަން އަދި އަރްޖުން ރާމްޕާލެވެ.
ޖިއޯ ސްޓޫޑިއޯސް އާއި ބީސިކްސް ސްޓޫޑިއޯސް ގުޅިގެން ގެނެސްދޭ "ދުރަންދަރު"އަކީ 2019 ވަނަ އަހަރު ގެނެސްދިން ކާމިޔާބު ހަނގުރާމަ މަތީ ފިލްމު "ޔޫރީ: ދަ ސާޖިކަލް ސްޓްރައިކް"ގެ ޑައިރެކްޓަރު އަދިތުޔަ ދަރުގެ ފިލްމެކެވެ. އެ ފިލްމުގެ އެއް ޕްރޮޑިއުސަރަކީ ވެސް އޭނާ އެވެ.
"ދުރަންދަރު"ގެ ދެވަނަ ފިލްމުގައި ދައްކާނީ ފުރަތަމަ ފިލްމުގައި ހިނގި ކަންކަމުގެ ކުރިންނާއި އޭގެ ފަހުން ހިނގާ ކަންކަމެވެ.