ސަލްމާންގެ ނޭޕާލް "ދަބަންގް ޓުއާ" ކެންސަލްކޮށްފި

ސަލްމާން ހާންގެ 2016 އިން ފެށިގެން ބާއްވަމުން އަންނަ "ދަބަންގް ޓްއާ" ގެ ތެރެއިން މި މަހުގެ 10 ވަނަ ދުވަހު ނޭޕާލްގައި ޝޯތަކެއް ދޭން ތައްޔާރުވަމުން އަންނަނިކޮށް އެ ގައުމުގެ މައޮސިސްޓް ގްރޫޕްތަކުން އިންޒާރު ދޭން ފެށުމުން ޓުއާ ކެންސަލްކޮށްފި އެވެ.

ނޭޕާލްގައި ޓުއާ އިންތިޒާމުކުރާ ފަރާތްތަކާ ހަވާލާދީ އިންޑިއާގެ ނޫސްތަކުން ބުނީ މި ވަގުތު ޓުއާ ބޭއްވުމަކީ ސަލްމާނާއި އޭނާގެ ޓީމުގެ ސަލާމަތަށް ނުރައްކާތެރި ދަނޑިވަޅަކަށް ވެދާނެ ކަމަށެވެ. އެހެންވެ ޓުއާ ކުރިއަށް ގެންދާނެ ތާރީހެއް ފަހުން އިއުލާން ކުރާނެ ކަމަށް ބުންޏެވެ.

ރިޕޯޓްތައް ބުނާ ގޮތުން މައޮސިސްޓް ގްރޫޕްތަކުން ޓުއާއާ ދެކޮޅަށް އަޑު އުފުލަން ފެށީ ގައުމުގެ ޝަހީދުންތަކެއް ރަމްޒުކޮށްދޭ އަސްކަރިއްޔާގެ ދަށުގައި އޮންނަ ތުންޑިހެލް ސަރަހައްދުގައި ޝޯ ބާއްވަން ނިންމުމާ ގުޅިގެންނެވެ. އަދި އެ ގްރޫޕްތަކުން ބުނެފައި ވަނީ އެތަނުގެ ހުރުމަތް ކަނޑާލައި، ނާޗަރަންގީ ކުޅޭނެ ފުރުސަތު ނުދޭނެ ކަމަށާއި ޝޯ ބާއްވައިގެން ވެސް ނުވާނެ ކަމަށެވެ. އަދީ އެ މީހުން ތުހުމަތު ކުރާ ގޮތުގައި ސަލްމާންގެ ޓުއާއަކީ ސަގާފީ ގޮތުން ނޭޕާލަށް ވެރިވެގަތުމަށް ކުރާ މަސައްކަތުގެ ތެރެއިން ބައެކެވެ.

"ދަބަންގް ޓުއާ" ގައި ސަލްމާން ވަނީ މިހާތަނަށް އެމެރިކާ، ޔޫރަޕް އަދި އޭޝިއާގެ ބައެއް ގައުމުތަކުގައި ޝޯތައް ދީފަ އެވެ. އޭނާއާ އެކު ޓުއާގައި ބައިވެރިވާ ތަރިންގެ ތެރޭގައި ކެޓްރީނާ ކެއިފް، ސޮނާކްޝީ ސިންހާ، ޖެކްލީން ފެނާންޑޭޒް، މަނީޝް ޕޯލް، ބިޕާޝާ ބާސޫ، ބާދްޝާހް އަދި ޑެއިޒީ ޝާހް ހިމެނެ އެވެ.

ފަންސާސް ދެ އަހަރުގެ އެކްޓަރު މިހާރު އަންނަނީ މިދިޔަ އަހަރު ރިލީޒްކޮށް ބޮޑު ކާމިޔާބީއެއް ހޯދި "ޓައިގާ ޒިންދާ" އަށް ފަހު، އެ ފިލްމްގެ ޑައިރެކްޓަރު އަލީ އައްބާސް ޒަފަރު ޑައިރެކްޓް ކުރާ "ބާރަތު" ގެ މަސައްކަތް ފަށަން ތައްޔާރުވަމުންނެވެ. އެ ފިލްމްގެ ޝޫޓިން އެޕްރީލްގައި ފަށަން ވަނީ ނިންމައިފަ އެވެ.

ސަލްމާން ދެން އެންމެ އަވަހަށް ފެންނާނީ މި އަހަރުގެ ފިތުރު އީދާ ދިމާކޮށް ރިލީޒް ކުރާ "ރޭސް 3" އިންނެވެ.