ބޮލީވުޑްގެ އެކްޓަރު އާމިރު ހާންގެ އަންހެން ދަރިފުޅު، އިރާ ހާން ޑައިރެކްޝަނަށް ނުކުމެ، އޭނާގެ ފުރަތަމަ ތިއޭޓަ ޕްރޮޑަކްޝަން އަންނަ ޑިސެމްބަރު މަހުގެ ތެރޭގައި ގެނެސްދޭން ނިންމައިފި އެވެ.
މީޑިއާތަކުން ބުނި ގޮތުގައި، އުމުރުން 22 އަހަރުގެ އިރާގެ އަލަތު ޑައިރެކްޝަނުގެ ނަމަކީ "ޔުރިއިޕިޑެސް މީޑިއާ" ކިޔާ ތިއޭޓަ ޕްލޭއެކެވެ. މީގެ މަސައްކަތް މިހާރު ކުރިއަށްދާ އިރު، އެއާ ބެހޭ މާ ބޮޑު ތަފުސީލެއް އަދި ހާމައެއް ނުކުރެ އެވެ.
އެކަމަކު އިރާގެ ފުރަތަމަ ތިއޭޓަ ޕްލޭ ޕްރިމިއާ ކުރަން ހަމަޖެހިފައި ވަނީ ޑިސެމްބަރު މަހުގެ ތެރޭގަ އެވެ. މަޝްހޫރު ފިލްމު ކްރިޓިކް ތަރަން އަދާޝް ބުނިގޮތުގައި އިރާގެ ތިއޭޓަ ޕްލޭ އިންޑިއާގެ ހޮވައިލެވޭ ބައެއް ސިޓީތަކުގައި ޕްރިމިއާކުރާނެ އެވެ.
އިރާ ބުނިގޮތުގައި އެކްޓިންއަކަށް ޝައުގުވެރި ކަމެއް ނެތެވެ. އެހެންވެ އޭނާ އަބަދުވެސް ބޭނުންވީ ކެމެރާގެ ފުރަގަހުގައި މަސައްކަތް ކުރަން ކަމަށާއި ޑައިރެކްޓަރަކަށްވުމަކީ އަބަދުވެސް ދެކެމުން އައި ހުވަނެއް ކަމަށް ބުންޏެވެ.
"ކެމެރާގެ ކުރިމަތީގައި މަސައްކަތް ކުރާކަށް އަހަރެން އެހާ ކޮންފަޓަބަލްއެއް ނޫން. އެކަމަކު ކެމެރާގެ ފުރަގަހުގެ ކޮންމެ މަސައްކަތަކީ ވެސް އަހަރެން ވަރަށް ކުރާ ހިތްވާ ކަމެއް،" އާމިރުގެ ފުރަތަމަ ކައިވެންޏަށް ލިބުނު ދެ ކުދިންގެ ތެރެއިން ހަގު އަންހެން ދަރިފުޅު ބުންޏެވެ.
އިރާ ބުނީ ޑައިރެކްޓަރަކަށްވާން ބޭނުންވި ނަމަވެސް، އޭނާގެ ހުނަރު ފުރަތަމަ ތިއޭޓަ ޕްލޭއަކުން ދައްކައިލަން ނިންމުމަކީ ކުރިން ޕްލޭންކުރި ކަމެއް ނޫން ކަމަށެވެ.
"އެކަމަކު މިއީ ކުއްލިއަކަށްވި ކަމެކޭ ބުނެވިދާނެ. އަހަންނަކީ އަބަދުވެސް ތިއޭޓާ އަށް ވަރަށް ލޯބިކުރާ މީހެއް. ކިޔެވި ދުވަސްވަރު ވެސް ތިއޭޓާގެ ކަންކަމުގައި ބޮޑަށް އުޅެވުނީ،" އޭނާ ބުންޏެވެ. "ކޮލެޖްގައި ކިޔެވީ ވެސް ތިއޭޓާ."
އިރާ، ޑައިރެކްޝަނަށް ނުކުންނަ އިރު، އާމިރުގެ ދޮށީ ފިރިހެން ދަރިފުޅު ޖުނައިދު ހާން، 25، ވަނީ ބައްޕަ ކުޅުނު ބައެއް ފިލްމުތަކުގެ އެސިސްޓަންޓް ޑައިރެކްޓަރެއްގެ ގޮތުގައި މަސައްކަތްކޮށްފަ އެވެ. އޭގެ ތެރޭގައި ރާޖްކުމާރު ހިރާނީ ޑައިރެކްޓްކުރި 2014 ގެ "ޕީކޭ" އާއި 2009 ގެ "3 އިޑިއަޓްސް" ހިމެނެ އެވެ.
އާމިރު ބުނި ގޮތުގައި ޖުނައިދަކި އެކްޓިން އަށް ވެސް ލޯބިކުރާ ޒުވާނަކަށްވާތީ، ހިތްހަމަޖެހޭ ކަހަލަ ސްކްރިޕްޓެއް ލިބުނު އިރަކުން އޭނާ ފިލްމު ވެސް ކުޅޭނެ އެވެ.
ދަރިން ފިލްމީ މަސައްކަތްތަކަށް މިސްރާބު ޖަހާފައިވާ އިރު، އާމިރު، 54، މި ވަގުތު އަންނަނީ އޭނާގެ ކުރިއަށް އޮތް ފިލްމު "ލާލު ސިންގް ޗައްޑާ" ގެ ޝޫޓިން އަންނަ އޮކްޓޯބަރުގައި ފަށަން ތައްޔާރުވަމުންނެވެ. މިއީ ހޮލީވުޑްގެ ފިލްމު "ފޮރެސްޓް ގަމްޕް" އަސްލަކަށް ބަލައިގެން ހަދާ ފިލްމެކެވެ.
އެކްޓްކުރުމުގެ އިތުރަށް އާމިރަކީ ވެސް ޑައިރެކްޓަރެކެވެ. އެކަމަކު އޭނާ މިހާތަނަށް ޑައިރެކްޓްކުރީ އެންމެ ފިލްމެކެވެ. އެއީ ބެލުންތެރިންގެ ބޮޑު ތަރުހީބެއް ލިބުނު 2007 ގެ "ތާރޭ ޒަމީން ޕަރް" އެވެ.