ވިކީ ކޯޝަލްއާ އެކު މިސް ވޯލްޑް މަނޫޝީ؟

ޒުވާން އެކްޓަރު ވިކީ ކޯޝަލް ސޮއިކޮށްފައިވާ ޔާޝްރާޖް ފިލްމްސް (ވައިއާރްއެފް) ގެ ކޮމެޑީ ފިލްމުގެ ބަތަލާ އަކީ މަނޫޝީ ޗިލާރް ކަމަށް ރިޕޯޓްތައް ބުނެފި އެވެ.

ދެހާސް ސަތާރަ ވަނަ އަހަރު މިސް ވޯލްޑްގެ ތާޖު ހާސިލުކުރި މަނޫޝީގެ ފުރަތަމަ ފިލްމަކީ ވެސް އެ ސްޓޫޑިއޯގެ ފިލްމެކެވެ. އެއީ މިދިޔަ އަހަރު ޝޫޓިން ފަށާފައި އޮތް އަކްޝޭ ކުމާރު ޓައިޓްލް ރޯލް ކުޅޭ ތާރީހީ ފިލްމު "ޕްރިތުވީރާޖް" އެވެ.

އިންޑޯ-އޭޝިއަން ނިއުސް އެޖެންސީ (އިއަންސް) އިން ބުނިގޮތުގައި ""ތަގްސް އޮފް ހިންދުސްތާން" އާއި "ދޫމް 3" ގެނެސްދިން ޑައިރެކްޓަރު ވިޖޭ ކްރިޝްނާ އަޗާރިއާ (ވިކްޓާ) ހަދާ ކޮމެޑީގައި ވިކީއާ އެކު ބަތަލާގެ ރޯލް ކުޅެން މަނޫޝީ ހަމަޖެއްސުމަކީ ސީދާ ޕްރޮޑިއުސަރު އަދިތިޔާ ޗޯޕްޅާގެ ނިންމުމެކެވެ. އަދި އެ ޖޯޑަކީ ސްކްރީނުގައި ބެލުންތެރިންނަށް ވަރަށް ސަޅި ކެމިސްޓްރީއެއް ވެސް ދައްކުވައިދޭނެ ޖޯޑަކަށްވާތީ ދެ ތަރިން އެކީގައި ގެންނަން ނިންމީ ކަމަށްވެ އެވެ.

ވައިއާރްއެފަށް ވިކީ ކުޅޭ ފުރަތަމަ ފިލްމުގެ ނަމަކީ ކޮބައި ކަމެއް އަދި ނޭނގެ އެވެ. އަދި ފިލްމާ ބެހޭ އެއްވެސް ވާހަކައެއް ރަސްމީކޮށް އިއުލާން ނުކުރި ނަމަވެސް އޭގެ ޝޫޓިން އޮކްޓޯބަރުގައި ފަށާނެ ކަމަށް މީޑިއާތަކުން ބުނެ އެވެ.

ނޫސްތަކުން ބުނީ ވައިއާރްއެފަށް 50 އަހަރު ފުރުން ފާހަގަކުރަން ގިނަ ފިލްމުތަކެއް ހަދަން ނިންމާފައިވާ އިރު، ވިކީގެ ފިލްމަކީ އޭގެ ތެރެއިން އެއް ފިލްމު ކަމަށެވެ. އަދި އެ ސްޓޫޑިއޯގެ 50 އަހަރުގެ ބްލޫޕްރިންޓް އަންނަ މަހުގެ 27 ގައި އިއުލާންކުރާނެ ކަމަށް ވެސް ނޫސްތަކުން ބުނެ އެވެ. އެ ތާރީހަކީ ވައިއާރްއެފްގެ ބާނީ އަދި ކުރީގެ ޑައިރެކްޓަރު ޔާޝް ޗޯޕްޅާގެ 88 ވަނަ އުފަން ދުވަހެވެ.