އައްޑޫން ކޮވިޑް-19 އަށް ޓެސްޓުކުރި ތިން މީހުންގެ ނަތީޖާ ނެގެޓިވް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.
ކޮރޯނާވައިރަސް ހުންނަ މީހުންގެ ކިބައިން ފެންނަ ބައެއް އަލާމާތްތައް ހުރި މީހަކަށް ފަރުވާ ދިން އައްޑޫ އިކުއެޓޯރިއަލް ހޮސްޕިޓަލުގެ ޑޮކްޓަރަކާއި ދެ ނަރުހެއް ވަނީ މިދިޔަ އާދިއްތަ ދުވަހު އަމިއްލަ އަށް އެކަހެރިވެފަ އެވެ.
އެޗްޕީއޭ އިން ބުނީ ކޮވިޑް-19 ގެ އަލާމާތްތައް ހުރެގެން އައްޑޫ ކޮވިޑް-19 އަށް ޓެސްޓުކުރި ތިން މީހުންގެ ނަތީޖާ ވެސް ނެގެޓިވް ވެފައިވާ ކަމަށެވެ.
Samples taken from 3 Maldivians who developed #COVID19 like symptoms from Addu City have tested NEGATIVE.
— Health Protection Agency (@HPA_MV) March 31, 2020
އައްޑޫގެ މޭޔަރު އަބްދުﷲ ސޯދިގު (ސޯބެ) "މިހާރު" އަށް ކުރިން ވިދާޅުވީ، ވަރަށް ބޮޑަށް ހުން އައިސް ރޯގާ ޖެހިފައި ހުރި މީހަކު މިދިޔަ ހޮނިހިރު ދުވަހުގެ ރޭގެ ވަގުތެއްގައި ހޮސްޕިޓަލަށް ދިޔަ ކަމަށާއި އެއީ ރާއްޖެއިން ބޭރަށް ދަތުރުކޮށްފައިވާ މީހެއްކަން ކުރިން އެނގިފައި ނުވާތީ ފަރުވާ ދިނީ އާންމު މީހަކަށް ފަރުވާ ދޭ އުސޫލުން ކަމަށެވެ.
އެއީ މި މަހުގެ 15 ވަނަ ދުވަހު ކޮޗިން އިން ރާއްޖެ އައި މީހެއްކަން އެނގުނީ ފަރުވާ ދީ ނިމުނު ފަހުން ކަމަށްވާތީ އެކަން އެނގުނު ހިސާބުން އެޗްޕީއޭ އަށް ރިޕޯޓުކޮށްފައިވާ ކަމަށް ވިދާޅުވި އެވެ.
ކޮރޯނާވައިރަސް އަށް ޕޮޒިޓިވްވި މީހުންގެ އަދަދު މުޅި ދުނިޔެއިން 787،231 އަށް އަރާފައިވާއިރު، 37،843 މީހުން ވަނީ މަރުވެފަ އެވެ. ރާއްޖެއިން ވެސް އެ ބަލީގެ 18 މީހަކު ފެނިފައި ވެ އެވެ. އޭގެ ތެރޭގައި ތިން ދިވެއްސަކު ވެސް ހިމެނެ އެވެ.
