މާލެ- މާޗް 17، 2022: ސްޕޯޓްސް މިނިސްޓްރީން އިންތިޒާމްކޮށްގެން ބޭއްވި މޯލްޑިވްސް ސްޕޯޓްސް އެވޯޑްސް ހަފްލާގައި 2019، 2020 އަދި 2021 ވަނަ އަހަރުގެ މުބާރާތްތަކާއި ކާމިޔާބީ އަށް ބަލާފައި ކުޅުންތެރިންނާއި އެތުލީޓުންނަށް ވަނީ އެވޯޑް ދީފައި. ދުނިޔޭގެ ފެންވަރުގެ ކުޅިވަރު ތަރިން ބައިވެރިވި މި ހަފުލާގައި ކުޅިވަރަށް އެކި ގޮތްގޮތުން ހިދުމަތްކޮށްދީފައިވާ ފަރާތްތަކަށް ވަނީ އެވޯޑު ދީފައި. ކުޅިވަރު ސަހުސިއްޔަތުގެ އެވޯޑް ހާސިލް ކުރީ ދުވުންތެރިޔާ ހަސަން ސާއިދު އާއި ބެޑްމިންޓަން ކުޅުންތެރިޔާ ފާތިމަތު ނަބާހާ. މި ކުލަގަދަ ރަސްމިއްޔާތުގައި ބްރެޒިލްގެ ކުރީގެ ފުޓްބޯޅަ ތަރި ރޮބާޓޯ ކާލޯސް، ނެދަލެންޑްގެސް ކުރީގެ ފުޓްބޯޅަ ތަރި އެޑްގާ ޑާވިޑްސް އަދި ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯގެ އިތުރުން އެކި ކުޅިވަރުތަކުގެ ޗެމްޕިއަނުންނާއި ލެޖެންޑުން ވަނީ ބައިވެރިވެފައި. -- ފޮޓޯތައް: ފަޔާޒު މޫސާ / މިހާރު

ސާފް ޗެމްޕިއަންޝިޕްގައި ވާދަކުރާ ރާއްޖޭގެ ގައުމީ ފުޓުބޯޅަ ޓީމަށް ހިތްވަރު ދެއްވުމުގެ ގޮތުން ރައީސް އިބްރާހިމް މުހައްމަދު ސޯލިހު މިއަދު ވަނީ ހޮޓެލް ޖެން އަށް ވަޑައިގެން ޓީމުގެ ކުޅުންތެެރިންނާއި އޮފިޝަލުން އަދި އެފްއޭއެމް އާއި ކުޅިވަރާ ބެހޭ މިނިސްޓްރީގެ އިސް އޮފިޝަލުންނާ ބައްދަލު ކުރައްވާފައި. ދިވެހި ގައުމީ ފުޓުބޯޅަ ޓީމު މޮޅުވާ ކޮންމެ މެޗަކަށް އިތުރު ހިތްވަރެއްގެ ގޮތުން، ބޯނަސް ހަދިޔާއެއް ދިނުމަށް ނިންމާފައިވާ ކަމަށް ރައީސް ވިދާޅުވި. އަދި ދިވެހިންގެ އުންމީދުތައް ގުޅިފައިވަނީ ދިވެހި ފުޓުބޯޅަ ޓީމު މި މުބާރާތް ކާމިޔާބުކުރުމުގެ މައްޗަށް ކަމަށް ވެސް ރައީސް ވިދާޅުވި.