ފަސް ސިޓީގެ މޭޔަރުކަމުގެ ގޮނޑި މިދިޔަ ދައުރުގައި ވެސް ފުރުއްވި އިދިކޮޅު އެމްޑީޕީގެ ބޭފުޅުން ދެވަނަ ދައުރަކަށް މިއަދު އިންތިހާބުވެއްޖެ އެވެ.
މިއަދު މުޅި ރާއްޖޭގައި ބޭއްވި ލޯކަލް ކައުންސިލްތަކުގެ އިންތިހާބުގައި މޭޔަރުކަމުގެ ވޯޓުގައި މިހާތަނަށް ލިބިފައިވާ ވަގުތީ ނަތީޖާތައް ދައްކާގޮތުން، މާލެ، ހދ. ކުޅުދުއްފުށީ، ގދ. ތިނަދޫ، ފުވައްމުލައް އަދި އައްޑޫ ސިޓީގެ މޭޔަރުކަން އެމްޑީޕީއަށް ވަނީ ދެ ވަނަ ދައުރަކަށް ލިބިފަ އެވެ.
ތިނަދޫ ފިޔަވައި އެހެން ހުރިހާ ގޮނޑިއެއް ވެސް އެމްޑީޕީން ކާމިޔާބުކުރީ ތަފާތު ބޮޑުކޮށެވެ.
އެ ސިޓީގެ މޭޔަރުކަމުގައި މިހާރު ހުންނެވި ސައުދު އަލީ އަދި ސަރުކާރު ހިންގާ ޕާޓީ ޕީއެންސީން ކުރިމަތިލެއްވި މުހައްމަދު އަޖީބުގެ ނަތީޖާގައި މާ ބޮޑު ފަރަގެއް ނެތެވެ. ދެ ބޭފުޅުން މެދުގައި އޮތީ ފަންސާހަކަށް ވޯޓުގެ ފަރެގެކެވެ.
މޭޔަރުންގެ ގޮނޑިތަކުގެ އިތުރުން ސިޓީތަކުގެ މެޖޯރިޓީ ވެސް އެމްޑީޕީއަށް ވަނީ ލިބިފަ އެވެ.
މިހާތަނަށް ލިބިފައިވާ ވަގުޔީ ނަތީޖާތައް ދައްކާ ގޮތުން ފަސް ސިޓީގެ މޭޔަރުގެ ގޮނޑި ވަނީ އެމްޑީޕީ އަށް ވަނީ ކަށަވަރުވެފަ އެވެ.