ޖޯހަނަސްބާގް (ސެޕްޓެމްބަރު 27) – ސައުތު އެފްރިކާގެ ޖޯހަނަސްބާގްގެ އިރުމަތީގައިވާ މުނިސިޕަލްޓީއަކުން، މަރާލާފައި އޮތް އިތުރު އަންހެނެއްގެ ހަށިގަނޑު ފެނި، ފާއިތުވި 10 ހަފުތާގެ ތެރޭގައި އެ ސަރަހައްދުން މަރާލާފައި އޮއްވައި ފެނުނު އަންހެނުންގެ އަދަދު 11 އަށް އަރައިފި އެވެ.
މީގެ ތެރެއިން އަށް އަންހެނުންގެ ހަށިގަނޑު ފެނިފައިވަނީ މި މަހުގެ ތެރޭގަ އެވެ. މިއީ މީހުން މެރުމުގެ ކުށްތައް އާދަޔާ ހިލާފަށް ގިނަ ސައުތު އެފްރިކާގެ އާންމުންގެ މެދުގައި ބޮޑު ނުތަނަވަސްކަމެއް އުފެދިފައިވާ މައްސަލައެކެވެ.
އެންމެ ފަހުން ފެނުނު އަންހެންމީހާގެ ހަށިގަނޑު ފެނުނީ އެކުރުހުލޭނީ މުނިސިޕަލްޓީގެ ހާމައަށް އޮތް ހުސްބިމަކުން، އާދީއްތަ ދުވަހުގެ މެންދުރު، ސެކިއުރިޓީ ކުންފުންޏަކުން ޕެޓްރޯލް ކުރަމުން ދަނިކޮށެވެ. ފުލުހުންގެ ތަރުޖަމާނު ބްރިގޭޑިއާ ބްރެންޑާ މުރިދިލީ ވިދާޅުވީ، މަރުވި އަންހެންމީހާގެ މައުލޫމާތާއި މަރުވި ސަބަބު އަދި ސާފުނުވާ ކަމަށެވެ.
މި ހަށިގަނޑު ފެނުނީ ހޮނިހިރު ދުވަހުވެސް އެ ސަރަހައްދުގެ ގަބުރުސްތާނެއް ކައިރިން، ބަރަހަނާ ހާލުގައި އޮތް އަންހެނެއްގެ ހަށިގަނޑު ފެނިފައިވަނިކޮށެވެ. ސޫބީގެ ފުލުހުންގެ ވެރިޔާ ޓޮމީ މްތޮމްބެނީ ވިދާޅުވީ، އެ އަންހެންމީހާ މަރާލާފައިވަނީ ގަލުން ތަޅައިގެން ކަމަށް ބެލެވޭ ކަމަށެވެ. މި މައްސަލައާ ގުޅިގެން ތުހުމަތުކުރެވޭ މީހަކު އެ ސަރަހައްދުން ފިލައިގެން ގޮސް، 400 ކިލޯމީޓަރު ދުރުގައި އުޅެނިކޮށް ވަނީ ހައްޔަރުކޮށްފަ އެވެ.
މި މަރުތަކާ ގުޅިގެން މިހާތަނަށް ހަތަރު މީހަކު ހައްޔަރުކޮށްފައި ވިޔަސް، މިއީ އެކަކު ކުރާ "ސީރިއަލް ކިލިން" ތަނެއް ކަމަކަށް ފުލުހުން އަދި ކަށަވަރުކޮށެއް ނުދެ އެވެ.
މަރުވި އަނެއް ނުވަ އަންހެނުންގެ ތެރޭގައި ގިނައީ އުމުރުން 20 އާއި 30 ގެ އަހަރުތަކުގެ މީހުންނެވެ. އަދި ބައެއް މީހުންގެ ހަށިގަނޑުން، ޖިންސީ ގޯނާކޮށްފައިވާ ކަމުގެ ނިޝާންތައް ފެންނަން ހުރި ކަމަށް ފުލުހުން ބުނެ އެވެ.
އަންހެނުންނަށް އަނިޔާކުރުމުގެ މައްސަލަ ސައުތު އެފްރިކާގައި ވަރަށް އާންމެވެ. މިކަމާ ދެކޮޅަށް މަސައްކަތްކުރާނެ ކަމަށް ސަރުކާރުން ވައުދުވި ނަމަވެސް ނަތީޖާއެއް ނުފެނެ އެވެ.
އެ ގައުމުގެ ޖީބީވީ ކޮމާންޑް ސެންޓަރަށް މި މަހުގެ 1-16 އާ ދެމެދު، އެހީތެރިކަމަށް އެދި 6،782 ކޯލް ލިބިފައިވާ ކަމަށާއި މިއީ ދުވާލަކަށް 424 ކޯލް ކަމަށް ވާއިރު މިއީ މިދިޔަ މަހާ އަޅާބަލާއިރު 21 ޕަސެންޓް އިތުރު އަދަދެއް ކަމަށް ވަނީ ބުނެފަ އެވެ. -- އޭއެފްޕީ