އަންހެނަކު ރާއްޖޭގެ ރައީސްކަމުގެ މަގާމު ފުރުމަކީ މައްސަލައެއް ނޫން ކަަމަށް ގިނަ ބަޔަކު ދެކޭ ކަމަށް ރައްޔިތުންގެ މަޖިލީހާއި ގައުމީ ޔުނިވަސިޓީން ގުޅިގެން ހެދި ދިރާސާއަކުން ދައްކައފި އެވެ.
މި ދިރާސާ ހެދީ ރާއްޖޭގައި އަންހެނުންނާ މެދު ގެންގުޅޭ ތަފާތުކުރުންތަކާއި އެ ކަންކަމަށް ހުއްޓުމެއް ގެނައުމަށް ކުރަން ޖެހޭ ކަންކަން ދެނެގަތުމަށެވެ. އެ ސާވޭގައި މުޖުތަމައުގައި އަންހެނުން ތަފާތު މަގާމްތައް ފުރުމާ ބެހޭ ގޮތުން ދެކޭ ގޮތް ވެސް ބަލާފައިވެ އެވެ.
ރާއްޖޭގެ އެކި ސަރަހައްދުތަކުން ސާވޭގައި ބައިވެރިވި 46 ޕަސެންޓް މީހުން ގަބޫލުކުރަނީ ރާއްޖޭގައި އަންހެނަކު ވެރިކަން ކުރުމަކީ "އެދެވޭ ކަމެއް" ގެ ގޮތުގަ އެވެ. މިކަމާ ދެކޮޅު ހަދާފައި ވަނީ 37 ޕަސެންޓް މީހުންނެވެ. ރާއްޖޭގެ އެންމެ އިސް މަގާމު އަންހެނަކު ފުރުމާ ގުޅޭ ގޮތުން 16 ޕަސެންޓް މީހުން ވަކި ގޮތަކަށް ނުދެކެ އެވެ.
ރާއްޖޭގެ ނައިބު ރައީސަކަށް އަންހެނަކު ހުރުމަށް ސާވޭގެ 61 ޕަސެންޓް ބައިވެރިން ތާއީދުކޮށްފައިވެ އެވެ. އެކަމަށް ތާއީދެއް ނެތް ކަމަށް ބުނެފައި ވަނީ 25 ޕަސެންޓް މީހުންނެވެ.
އުއްތަމަ ފަނޑިޔާރަކަށް އަންހެނަކު ހުރުން މައްސަލައެއް ނޫން ކަަމަށް 46 ޕަސެންޓް މީހުން ބުނެފައިވާ އިރު ސުޕްރީމް ކޯޓުގައި އަންހެން ފަނޑިޔާރުން ތިބުން 49 ޕަސެންޓް މީހުން ދެކެނީ ރަނގަޅު ކަމެއްގެ ގޮތުގަ އެވެ. މިކަމާ ދެކޮޅީ 31 ޕަސެންޓް މީހުންނެވެ.
ސިޔާސީ ޕާޓީތަކުގެ ލީޑަރުކަން އަންހެނުން ފުރުމަށް 67 ޕަސެންޓް މީހުން ތާއީދުކޮށްފައިވެ އެވެ. ސަލާމަތީ ބާރުތަކުގެ އިސް މަގާމްތަކާއި މިނިވަން މުއައްސަސާތަކާއި އަތޮޅު ކައުންސިލްގެ ރައީސް ކަމާއި ކައުންސިލްގެ ރައީސް އަދި ރައްޔިތުންގެ މަޖިލީހުގެ ނައިބު ރައީސް ކަމުގައި އަންހެނަކު ފުރުން ރަނގަޅު ކަމަށް ސާވޭގެ ގިނަ ބައިވެރިން ދެކެ އެވެ.
ސާވޭގެ މުހިއްމު ބައިތައް
- ގާނޫނުއަސާސީ އާއި ގާނޫނުތަކުން އަންހެނުން ބާރުވެރިކުރުވޭ ކަމަށް ގަބޫލުކުރަނީ ސާވޭގެ 36 ޕަސެންޓް މީހުން.
- ސާވޭގެ ގިނަ ބައިވެރިން ދެކޭ ގޮތުގައި ގިނަ މަސައްކަތްތަކަކީ ވަކި ޖިންސަކަށް ހާއްސަ ކަމެއް ނޫން.
- އެކަމަކު ކެއްކުމާއި ދޮވެ އިސްތިރިކުރުމާއި ކާން ދިނުމާއި ކުދިން ފެންވެރުން ފަދަ ކަންކަމަކީ އަންހެނުންގެ ޒިންމާއެއްގެ ގޮތުގައި ދެކޭ މީހުން ގިނަ.
- މަރާމާތުކުރުމާއި ފަރުނީޗަރު ފަދަ ބޮޑެތި ތަކެތި ގަތުމާއި ދަރިންނަށް ހަރަދުކުރުން އެހެން ކަންތަކާ އަޅާކިޔާއިރު ފިރިހެނުން ކުރަންޖެހޭ ކަންތައް ކަމުގައި ދެކޭ މީހުން ގިނަ.
- ގިނަ ފިރިހެނުން ދެކެނީ ތަންތަނުގެ ވެރިންގެ ގޮތުގައި ތިބެން ޖެހޭނީ ފިރިހެނުން ކަމަށް.
- ގިނައިން ޖިންސީ ފުރައްސާރައާ ކުރިމަތިލާން ޖެހެނީ އަންހެނުން ކަަމަށް ސާވޭގެ 80 ޕަސެންޓް ބައިވެރިން ދެކޭ.
- މިންތީގެ ތަފާތުކުރުން ގެންގުޅޭ މައިގަނޑު ސަބަބަކީ އަންހެން ދަރިންނާއި ފިރިހެން ދަރިންގެ މެދުގައި މައިންބަފައިން ތަފާތުކުރާތީ ކަމަށް ސާވޭގެ ގިނަ ބައިވެރިން ދެކޭ.
އަންހެނުންނާ މެދު ތަފާތުކުރުމުގެ ވިސްނުމެއް!
ދިރާސާގެ ހޯދުންތަކުގައިވާ ގޮތުގައި ރާއްޖޭގައި ވެސް އަންހެނުންނާ މެދު ތަފާތުކުރުން ގެންގުޅޭ ގިނަ ސަބަބުތަކެއް އެބަހުއްޓެވެ. އޭގެ ތެރޭގައި ސަގާފަތާއި އާދަކާދަތަކުގެ ތެރެއިން އައިސްފައިވާ ބައެއް ކަންކަމާއި ވަޒީފާގެ މައިދާނުގައި އިސް ދައުރެއް އަދާކުރަން އަންހެނުންނަށް ފުރުސަތު ހަނިވުން ފަދަ ކަންކަން ހިމެނެ އެވެ.
މި ގަބޫލުކުރުންތަކުގެ ތެރޭގައި، އަންހެނުން އަދާކުރަން ޖެހެނީ ވަކި ބާވަތެއްގެ ވަޒީފާކަން އާއިލާގެ ތެރެއިން ގަބޫލުކުރެވި އަންނަ ޕްރެޝަރުތައް ވެސް ހުރި ކަން ސާވޭގެ ބައިވެރިން ފާހަގަކޮށްފައިވެ އެވެ.
ދަރިން ބެލެހެއްޓުމާއި ގޭތެރޭގެ ކަންކަން ކުރުމަކީ އަންހެނުންގެ ޒިންމާއެއްގެ ގޮތުގައި ބެލެވިފައި އޮތުމަކީ ވެސް އަންހެނުންނާ މެދު މުޖުތަމައުގައި ތަފާތުކުރުން ގެންގުޅޭ ސަބަބެއް ކަމަށް ސާވޭގެ ބައިވެރިން ދެކެ އެވެ.
ދިރާސާ އިން އެނގުނު ގޮތުގައި ތަފާތުކުރުން ހުއްޓުވުމަށް އޮތް ގޮންޖެހުމަކީ ޒަމާނުއްސުރެން ދެ ޖިންސުގެ މީހުންނާ މެދު އަށަގެންފައި އޮތް ވިސްނުމެވެ. ސިޔާސަތު ކަނޑައަޅާ ނުވަތަ ގޮތް ނިންމާ މަގާމުތަކުގައި އަންހެނުން މަދުވުމަކީ ވެސް ތަފާތުކުރުން ނައްތާލަން އޮތް ހުރަހެއް ކަމަށް ސާވޭގެ ބައިވެރިން ދެކެ އެވެ.
ސާވޭގައި ބައިވެރިވި ގިނަ ފިރިހެނުން ދެކޭ ގޮތުގައި މަގާމްތަކުގައި އަންހެނުންގެ ދައުރު އިތުރުކުރަން ކޯޓާ ސިސްޓަމަކީ ފިރިހެނުންނަށް ތަފާތު ކުރުމެކެވެ. އަދި އެއީ ވަރަށް ބޮޑު ބޭއިންސާފެއް ކަަމަށް ވެސް އެ މީހުން ދެކެ އެވެ. ގެވެށި އަނިޔާގެ ގާނޫނު ފަދަ ގާނޫނުތަކަކީ ފިރިހެނުންނަށް ހުރި ބިރެއް ކަމަށް ވެސް ދެކޭ ކަމަށް ދިރާސާގެ ނަތީޖާ އިން ދެއްކި އެވެ.
ދިރާސާގެ ނަތީޖާއަށް ބަލައި ތަފާތުތައް ނައްތާލަން ހުށަހެޅި ކަންކަން
- ދަރިން ތަރުބިއްޔަތުކުރާއިރު މިންތީގެ ހަމަހަމަކަން ނައްތާލުމަށް ސަމާލުވުން.
- ވަޒީފާއަށް ދާން ޖެހޭ ނުވަތަ ދާން ބޭނުންވާ ބެލެނިވެރިންނަށް ފަހި ފުރުސަތުތައް ގާއިމްކޮށްދިނުން.
- އާއްމުން ހޭލުންތެރިކުރުމުގެ ޕްރޮގްރާމްތައް ހިންގުން.
- ސިޔާސަތު ކަނޑައެޅުމުގައި އަންހެނުންގެ ބައިވެރިވުން އިތުރުކުރުން.
- އަންހެނުންގެ ހައްގުތައް ރައްކާތެރިކޮށްދިނުމަށް ހެދޭ ގާނުނުތަކަކީ ފިރިހެނުންގެ ހައްގުތައް ވެސް ކަށަވަރުކުރެވޭ، ފިރިހެނުން ބަލައިގަންނަ ގާނޫނުތަކަކަށް ހެދުން.
- ގާނުނުތައް ތަންފީޒުކުރުން މިހާރަށް ވުރެން ހަރުދަނާކުރުން.
ދިރާސާގައި ބުނެފައިވާ ގޮތުގައި ސަރަހައްދީ އެހެން ގައުމުތަކާ އަޅާބަލާއިރު ދެ ޖިންސުގެ ތަފާތުކުރުން ނިސްބަތުން ރާއްޖޭގައި ކުޑަކަމަށް ގަބޫލުކުރެވޭނެ ޖާގަ އެބައޮތެވެ. އުޖޫރަ ކަނޑައެޅުމާއި އެއް މަގާމެއްގައި އުޅޭ އަންހެނުންނާއި ފިރިހެނުންނާ ދެމެދު ތަފާތުކުރުމެއް ނެތް ނަމަވެސް އަންހެނުންނަށް ލިބޭ އާމްދަނީ ނިސްބަތުން ކުޑަ ކަމަށް ދިރާސާގެ ހޯދުންތަކުގައި ފާހަގަކޮށްފައިވެ އެވެ.