ފާއިތުވި 24 ގަޑިއިރުގެ ތެރޭގައި ރިކޯޑު އަދަދަކަށް ރާއްޖެ އިން ކޮވިޑް-19 އަށް މީހުން ޕޮޒިޓިވްވެއްޖެ އެވެ.
އެޗްޕީއޭ އިން މިރޭ ބުނީ އިއްޔެ ހަވީރު 6:00 އިން މިއަދުގެ ހަވީރު 6:00 އާ ހަމައަށް ކޮވިޑަށް 3،730 ސާމްޕަލް ޓެސްޓުކުރިއިރު، އޭގެ ތެރެއިން 384 މީހަކު އެ ބައްޔަށް ޕޮޒިޓިވްވި ކަމަށެވެ.
މިއީ، ފާއިތުވި ހަތަރު މަސް ދުވަހުގެ ތެރޭގައި އެއް ދުވަހެއްގައި އެންމެ ގިނަ މީހުން ކޮވިޑަށް ޕޮޒިޓިވްވި ދުވަހެވެ.
މާލެ ސަރަހައްދުން މިދިޔަ 24 ގަޑިއިރު 1،337 ސާމްޕަލް ކޮވިޑަށް ޓެސްޓުކުރިއިރު 153 މީހަކު އެ ބައްޔަށް ޕޮޒިޓިވްވެފައިވި ކަމަށް ތަފާސްހިސާބުތަކުން ދައްކަ އެވެ. އެކި ރަށްރަށުން 102 މީހަކާއި ރިސޯޓުތަކުން 117 އަދި ސަފާރީން އެކަކަށް ވަނީ ކޮވިޑް ޖެހިފަ އެވެ.
އެއާއެކު، ރާއްޖޭގައި މި ވަގުތު ކޮވިޑް ޖެހިފައިވާ މީހުންގެ އަދަދު ވެސް 3،500 އިން މައްޗަށް ވަނީ އަރައިފަ އެވެ. ނަމަވެސް ހޮސްޕިޓަލްތަކުގައި އެޑްމިޓް ކޮށްގެން ފަރުވާ ދޭ މީހުންގެ އަދަދަކަށް މާ ބޮޑު ބަދަލެއް ނާދެ އެވެ. ހޮސްޕިޓަލްގައި މި ވަގުތު ފަރުވާ ދެމުން އަންނަނީ 18 މީހަކަށެވެ.
މިދިޔަ ނޮވެމްބަރު މަހުގެ ފަހުކޮޅު އޮމިކްރޮން ވޭރިއެންޓު ފެނުނު ފަހުން އެ ބައްޔަށް ޕޮޒިޓިވްވާ މީހުންގެ އަދަދު ވަނީ ވަރަށް ބޮޑަށް އިތުރުވެފަ އެވެ. އެހެންވެ، މާލެ ސަރަހައްދުން ރަށްރަށަށް ދަތުރުކުރުމުގައި ދީފައިވާ ބައެއް ލުއިތައް ހަރުކަށިކޮށް ގިނަ މީހުން އެއްވެގެން ހަރަކާތްތައް ނުބާއްވަން ވަނީ އަންގައިފަ އެވެ.
މާލެ ސަރަހައްދުން ކޮވިޑް ޖެހިފައިވާ މީހުންގެ އަދަދު ދަށުގައި އުޅޭތާ ދުވަސްތަކަކަށް ފަހު، އަނެއްކާ ވެސް މައްޗަށް ދިޔައިރު، އާ އަހަރު ފާހަގަކުރުމުގެ ހަރަކާތްތަކާއި މާލެ އާއި ހުޅުމާލޭގައި ބޭއްވި ނައިޓް މާކެޓްތަކާއި އެހެން އެއްވުންތަކަށް އެތައް ބަޔަކު ޖަމާވެފައި ވެ އެވެ. މިއީ ސްކޫލް ޗުއްޓީ ދުވަސްވަރު ކަމުން އެކި ބޭނުންތަކުގައި މާލެ އަށް އެކި ރަށްރަށުން އެތައް ބަޔަކު އައިސްފައިވާއިރު، ކުއްލި ގޮތަކަށް އާދަޔާ ހިލާފު ބާރު ސްޕީޑްގައި ކޮވިޑް ފެތުރެން ފެށުމުން މާދަމާ އިން ފެށިގެން މާލެ ސަރަހައްދުން ފުރޭނީ ކޮވިޑް ޕީސީއާރު ޓެސްޓު ނެގެޓިވް ވާ މީހުންނަށް އެކަންޏެވެ.
