މާލޭގައި އެއް އާއިލާއެއްގެ ހަ ކުދިންނަށް ޖިންސީ ގޯނާކުރަމުން ގެންދާ ކަމުގެ ތުހުމަތުކުރެވޭ އެ އާއިލާގެ މީހަކު ހައްޔަރުކޮށްފި އެވެ.
ފުލުހުން ވަނީ މިފަދަ މައްސަލައެއްގައި މީހަކު ހައްޔަރުކޮށްފައިވާކަން ކަށަވަރުކޮށްދީފަ އެވެ.
އަނިޔާ ލިބޭ ކުޑަކުދިންގެ މައުލޫމާތު ހާމަވެދާނެ މައުލޫމާތު އާންމުކުރުމަކީ ގާނޫނީ ކުށަކަށް ވާތީ މިކަމާ ބެހޭ ގޮތުން ފުލުހުން އަދި މިހާތަނަށް ބުނެފައި ވަނީ، އިތުބާރުކުރެވޭ މަގާމެއްގައި ހުރެ ކުޑަކުދިންތަކަކާ ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއްގައި މާލޭ ސަރަހައްދުން މިދިޔަ މަހު ނުވަ ވަނަ ދުވަހު 55 އަހަރުގެ ފިރިހެނަކު ހައްޔަރުކޮށްފައިވާ ކަމަށެވެ.
ފުލުހުން ބުނި ގޮތުގައި މާޗް މަހުގެ ތެރޭގައި ފުލުހުންނަށް ހުށަހެޅި މި މައްސަލާގައި ހައްޔަރުކުރި މީހާގެ ބަންދަށް ކްރިމިނަލް ކޯޓުން ވަނީ ތަހުގީގަށް ބަންދުގައި ބަހައްޓަން 30 ދުވަހުގެ މުއްދަތެއް ދީފަ އެވެ.
އެނގިފައިވާ ގޮތުގައި މި މީހާ ވަނީ އާއިލާގެ އެތައް ކުދިންނަކަށް އެކި ގޮތްގޮތުން ޖިންސީ ގޯނާކޮށް ބައެއް ކުދިންގެ ފޮޓޯ ނަގައި ކުދިންނަށް ބިރު ވެސް ދައްކައިފަ އެވެ.