ސްރީ ލަންކާގައި ހުންނަވާ ދިވެހި ސަފީރަކަށް އަލީ ފާއިޒު އައްޔަން ކުރައްވަން ނިންމަވައި މަޖިލީހުގެ ރުހުން ހޯދަން ފޮނުވައިފި އެވެ.
އޭނާ ސަފީރަކަށް އައްޔަންކުރައްވަން ރައީސް އިބްރާހިމް މުހައްމަދު ސޯލިހް ނިންމެވިއިރު، އެންމެ ފަހުން ހުންނެވީ ފުލުހުންގެ މުއައްސަސާ ރިފޯމް ކުރަން އުފެއްދި ޕޮލިސް ބޯޑުގެ ރައީސް ކަމުގެ މަގާމުގަ އެވެ. އެ މަގާމުން ދުރަށް ވަޑައިގަތްއިރު، ޕޮލިސް ބޯޑުގެ މަސައްކަތްތަކާ ދޭތެރޭގައި ހިތްހަމަޖެހިވަޑައިނުގެން މަޖިލީހުގެ ކޮމިޓީއެއްގައި ހޯމް މިނިސްޓަރު އިމްރާން އަބްދުﷲ ވަނީ ވާހަކަ ދައްކަވައިފަ އެވެ.
އެމްޑީޕީގެ މެމްބަރެއްގެ ގޮތުގައި ހުންނެވި ފާއިޒު ވަނީ މީގެކުރިން ވެސް ސަރުކާރުގެ އެކި މަގާމްތައް ފުރުއްވައިފަ އެވެ.
ލަންކާގައި ދިވެހި ސަފީރަކު ނެތްތާ ގާތްގަނޑަކަށް އަހަރެއް ވަނީ އެވެ. އެ ތަނުގައި އެންމެ ފަހުން ހުންނެވީ އުމަރު އަބްދުއްރައްޒާގެވެ. އޭނާ ވަނީ، ބެލްޖިއަމާއި ޔޫރަޕިއަން ޔޫނިއަން ކަނޑައަޅާ ރާއްޖޭގެ ސަފީރު ކަމަށް މިދިޔަ މޭ މަހު އައްޔަންކުރައްވައިފަ އެެވެ.
އުމަރު އެ މަގާމަށް އައްޔަންކުރެއްވީ ސްޓޭޓް މިނިސްޓަރުންގެ ފެންވަރުގަ އެވެ.