އަތުލައިގަތް 46 ކިލޯ ޑްރަގްސް އެއާޕޯޓް ތެރެއިން "ގެއްލިއްޖެ"

މަސްތުވާތަކެއްޗާ އެކު ރާއްޖެ އައި ދެ މީހަކު ކަސްޓަމްސް އިން އަތުލައިގަތް ފަހުން، މަސްތުވާތަކެއްޗާ އެކު ލަގެޖް ގެއްލުނު މައްސަލައަކާއި ލަގެޖުގެ އިތުރުން މީހަކު ވެސް ގެއްލުނު މައްސަލައެއް ބަލަމުން އަންނަކަން "މިހާރު" އަށް އެނގިއްޖެ އެވެ. މި މީހުން ގެނައި މަސްތުވާތަކެތީގެ ބަރުދަން 46 ކިލޯ އަށް އަރަ އެވެ.

އެނގިފައިވާ ގޮތުގައި މީގެ ދުވަސްކޮޅެއް ޕާކިސްތާނުން އައި މީހެއްގެ ލަގެޖުން 30 ކިލޯގެ މަސްތުވާތަކެތި ފެނުނުވެ. އެކަމަކު އެ މީހާ ފުލުހުންނާ ހަވާލުކުރި އިރު އެ މީހާގެ ލަގެޖް ވަނީ ގެއްލިފަ އެވެ. ކަސްޓަމްސް އިން ފުލުހުންނާ ހަވާލުކުރީ މީހާ އެކަންޏެވެ.

މި މައްސަލަ ބަލަމުން އަންނަނިކޮށް، އިއްޔެ ވަނީ 16 ކިލޯގެ މަސްތުވާތަކެއްޗާ އެކު ރާއްޖެ އައި މީހަކު ވެސް ގެއްލިފަ އެވެ. އޭނާގެ ލަގެޖަަށް ވެސް ވީގޮތެއް ނޭނގެ އެވެ.

މި ދެ މައްސަލަ ވެސް ފުލުހުން ބަލަމުން އަންނަކަން ވަނީ އެނގިފަ އެވެ. އެކަމަކު މިކަމާ ގުޅޭ ގޮތުން ފުލުހުންގެ ބަހެއް އަދި ނުލިބެ އެވެ.

ނަމަވެސް، މަސްތުވާތަކެތި ހުރި ލަގެޖެއް ގެއްލުނު މައްސަލައެއް ދިމާވެގެން އުޅޭތޯ ކަސްޓަމްސްގެ ކޮމިޝަނަ ޖެނެރަލް އަބްދުﷲ ޝަރީފާ އިއްޔެ ސުވާލުކުރުމުން ވިދާޅުވީ އެފަދަ އެނގިވަޑައިގެންފައި ނެތް ކަމަށެވެ. އަތުލައިގަންނަ މަސްތުވާތަކެތި ފުލުހުންނާ ހަވާލުކުރަމުން އަންނަ ކަމަށް އޭނާ ވިދާޅުވި އެވެ.

ކޮމިޝަނަ ޖެނެރަލް ވިދާޅުވި ގޮތުގައި، ކަސްޓަމްސް އިން ބޭނުންވަނީ ތަކެތި ފާސްކުރާ ސަރަހައްދުގައި ކަސްޓަމްސްގެ އޮފިސަރުން އެކަނި ތިބެވޭނެ ގޮތެއް ހަމަޖެހުމެވެ. އޭރުން މިފަދަ ކަމެއް ދިމާވި ނަމަވެސް އެކަމުގައި ޒިންމާ ކަސްޓަމްސްއަށް އޮންނާނެ ކަމަށާއި މިހާރު އެކި އިދާރާތަކުގެ މުވައްޒަފުން ތިބެނީ އެއްކޮށް ކަމަށް އޭނާ ވިދާޅުވި އެވެ.

މައުލޫމާތު އެނގޭ މީހަކު ކިޔައިދިން ގޮތުގައި މަސްތުވާތަކެތި އަޅާފައި ހުންނަ ފޮށި ފަދަ ތަކެތި އެއާޕޯޓް ތެރޭގައި، ކެމެރާއަށް ނާރާ ގޮތަށް ވަކި ތަންތަނެއްގައި ބެހެއްޓުމަށް ފަހު އެއާޕޯޓުން އެ ތަކެތި ބޭރުކުރުމަކީ އެހެން ބައެއް ގައުމުތަކުގައި ވެސް ކުރާ ކަމެކެވެ. މި ފަހުން ގެއްލުނު މަސްތުވާތަކެއްޗަކީ މިފަދަ އުކުޅުތައް ރާއްޖޭގައި ވެސް މިހާރު ބޭނުންކުރަން ފަށާފައިވާ ކަމުގެ ހެއްކެއް ކަމަށް އޭނާ ބުންޏެވެ.