ރާއްޖެއަށް މަސްތުވާތަކެތި އެތެރެކުރި ކަމުގެ ތުހުމަތުގައި އިންޑިއާއަށް ނިސްބަތްވާ ދެ ޒުވާނުން ހައްޔަރުކޮށްފި އެވެ.
މަސްތުވާތަކެތި އެތެރެކުރި ކަމުގެ ތުހުމަތުގައި ހައްޔަރުކުރީ އިންޑިއާގެ ދެ މީހުން ކަމަށްވާ ކަތިރިވިލް މަނިމަރަން، 21 އަދި ދަނޫޝްކާނދަން ގޯޕާލް، 19 އެވެ.
އެ ދެ މީހުންގެ ބަންދާ މެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރުކުރުމުން ބަންދަށް ހަ ދުވަސް ވަނީ ޖަހައިފަ އެވެ. އެ މީހުން ވަނީ ގާނޫނީ ވަކީލެއް ހޯދަން ބޭނުންވާ ކަމަށް ކޯޓުގައި ބުނެފަ އެވެ.
ފުލުހުން ތުހުމަތުކޮށްފައިވާ ގޮތުގައި ދެ މީހުން ރާއްޖެ އައިއިރު ޝައްކު އުފެދިގެން ކަސްޓަމްސްއިން ބަލާފާސްކުރުމުގެ ތެރެއިން ލަގެޖުގެ ތެރެއިން މަސްތުވާތަކެތި ހުރި ފުޅިތަކެއް ފެނިފައިވެ އެވެ.
ފުޅިތަކުގައި ހުރި އެއްޗެހި ތަހުލީލުކުރި އިރު ހަޝިޝް އޮއިލްއަށް ޕޮޒިޓިވްވެފައިވާ ކަމަށާއި ވަގުތީ ބަރުދަނުގައި 6.7 ކިލޯ ހުރި ކަމަށް ކަމަށް ފުލުހުން ބުނެފައިވެ އެވެ.