ހުޅުމާލޭގައި އާ ސްކޫލެއް އަޅަން އަމިން ކޮންސްޓްރަކްޝަނާ ހަވާލުކުރަނީ. -- ފޮޓޯ: އެޗްޑީސީ
26 ޖެނުއަރީ 2017 - 14:10
7 comments
މުޅިން އާ ކޮންސެޕްޓަކަށް ހުޅުމާލޭގައި އަޅާ ރާއްޖޭގެ އެންމެ ބޮޑު ސްކޫލް އިމާރާތް ކުރުމުގެ މަސައްކަތް، 132 މިލިއަން ރުފިޔާ އަށް އަމިން ކޮންސްޓްރަކްޝަންއާ މިއަދު ހަވާލުކޮށްފި އެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގައި ބޭއްވި ރަސްމިއްޔާތެއްގައި "ހުޅުމާލެ އެން 1 ޕްރައިމަރީ އަދި ސެކަންޑްރީ ސްކޫލް" އިމާރާތް ކުރުމުގެ އެއްބަސްވުމުގައި ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު ސައިމަނެވެ. އަމިންގެ ފަރާތުންް ސޮއިކުރެއްވީ މެނޭޖިން ޑިރެކްޓަރު އަބްދުﷲ މުހައްމަދެވެ.
އެއްބަސްވުމުގައި ސޮއި ކުރެއްވުމަށް ފަހު ނޫސްވެރިންނާ ވާހަކަ ދައްކަވަމުން ސައިމަން ވިދާޅުވީ ހުޅުމާލޭގެ އާބާދީ އިތުރު ވަމުން ދާ އިރު ތައުލީމް ފަދަ މުހިއްމު ދާއިރާތައް ވެސް ތަރައްގީކޮށް ބަދަލުތަކެއް އަންނަންޖެހޭ ކަމަށެވެ. އެ ސްކޫލު އެޅިގެން ދަނީ، ސްކޫލުތައް އިތުރު ކުރަން ޖެހިފައިވާ ދަނޑިވަޅެއްގައި ކަން ވެސް އޭނާ ފާހަގަކުރެއްވި އެވެ.
މި ސްކޫލު އަޅަނީ ލިޓްލް ޖެމްސް ޕްރީ ސްކޫލް ކައިރީގަ އެވެ. ހަތް ބުރި އަށް އިމާރާތް ކުރާ މި ސްކޫލުން ގާތްގަނޑަަކަށް 1700 އެއްހާ ދަރިވަރުންނަށް ކިޔެވުމުގެ ފުރުސަތު ދެވިގެންދާނެ އެވެ. ޕްރީ ސްކޫލުން ފެށިގެން 10އާ ހަމަ އަށް ކިޔަވައިދޭ މި ސްކޫލުގައި ތިން ބްލޮކު ހަދާއިރު ޖުމްލަ 50 ކްލާސްރޫމް ހުންނާނެ އެވެ. އެ ކްލާސްރޫމުތަކުގެ ތެރެއިން ދެ ކްލާސް ހާއްސަ ކޮށްފައިވަނީ، ނުކުޅެދުންތެރިކަން ހުންނަ ކުދިންނަށެވެ.
ސައިމަން ވިދާޅުވީ އެ ސްކޫލުގައި ލެބޯޓްރީ އާއި ލައިބްރަރީ އަދި މަލްޓި ޕާޕަސް ހޯލާއި އެކި ހަރަކާތްތައް ހިންގޭނެ ހޯލް ހަދާނެ ކަމަށެވެ. އަދި ސްކޫލުގެ މައި ހޯލުގައި އެކަނި ވެސް އެއް ފަހަރާ 864 ދަރިވަރުންނަށް ތިބެވޭނެ ކަން އޭނާ ފާހަގަކުރެއްވި އެވެ.
ރާއްޖޭގެ އެހެން ސްކޫލުތަކާ މި ސްކޫލު ތަފާތުވަނީ، އެކި ހަރަކާތްތައް ހިންގަން ކޮންމެ ބުރިއެއްގައި ވެސް ހުސް ތަންކޮޅެއް ހާއްސަކޮށްފައި ވުމެވެ. އަދި ފުރޮޅުލީ ގޮނޑީގައި މައްޗަށް އެރޭނެ ގޮތަށް ވަނީ ހަމަޖައްސައިފަ އެވެ.
މި ސްކޫލުގެ މަސައްކަތްތައް ނިންމަން ހަމަޖައްސާފައިވަނީ 14 މަސް ދުވަހުގެ ތެރޭގަ އެވެ. އަހަރުގެ މެދުތެރޭގައި ސްކޫލު ކިޔެވުން ފެށުމަށް ދަތިތަކެއް ދިމާވާނެތީ ކިޔެވުން ފަށާނެ ދުވަހެއް ކަނޑައަޅަން ނިންމާފައިވަނީ އެޑިއުކޭޝަން މިނިސްޓްރީއާ ވާހަކަދައްކައިގެންނެވެ.
ރާއްޖޭގެ އެންމެ ބޮޑު ސްކޫލު، ރެހެންދި ސްކޫލު ވެސް ހުންނަނީ ހުޅުމާލޭގަ އެވެ. ހުޅުމާލޭގައި މިހާރު ވެސް ތިން ސްކޫލު ހުރެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހުސެންބެއްޔާ
26 January 2017
ޖެހިގެން އެހެރީ ލިޓްލް ޖެމް ޕްރީ ސްކޫލު، 100 ފޫޓު ދުރުގައި އެހެރީ ގޭޓްވޭ ސްކޫލު. ދެން ކީއްކުރާ ތަނެއް ތިޔައީ!! ތި ސްކޫލު ހުޅުމާލެ 2 ގައި އަޅާބަލަ
އުމަރު
26 January 2017
ރާއްޖޭގެ އެންމެބޮޑު ސްކޫލެއްނޫން، އެކަމަކު ރާއްޖޭގެ އެންމެ އަގުބޮޑު ސްކޫލު މިގޮތަކަށް ކިޔާލެވިދާނެ، ތިޔަ ސްކޫލުގައި ހަދަނީ ޖުމްލަ 50 ކުލާސްރޫމް، ކުލާހެއްގެ އަގުޖެހެނީ -/2640000 މިލިއަން ރުފިޔާއެވެ. އޭގެ މާނައަކީ މިހާރު ހުޅުމާލެއިން ވިއްކާ 1200 އަކަފޫޓުގެ 3 ކޮޓަރީގެ އަޕާޓްމަނެޓެއްގެ އަގެވެ، މިއީ ހަމަ މާކެޓްރޭޓްތޯ؟ ނުވަތަ މިއަގުގެ ބައެއްދަނީ މިފަހަރުގެ ކައުންސިލް އިންތިހާބުގެ ކެމްޕޭނަށްތޯ؟ ކުއްލިއަކަށް މިއިސްކޫލު ހަދަންދިނީ ހުޅުމާލޭގައި އިހައްދުވަހު ބޮޑު ސްކޫލެއް އަޅާ ނިންމުމަށްފަހު އަދި އެއިސްކޫލުގެ ޖާގަވެސް ފުލްނުވަނީސް، އެހެންކަމުން މިއީ ވާދަވެރި ބީލަމަކާއެކުގައި ދެވުނު ޕްރޮޖެކްޓެއްނޫން، މިއީ ކަނޑައެޅިގެން ޕްރައިވަޓް ސެކްޓަރުގެ ވިޔަފާރިވެރިން ރައްޔިތުންގެ ޓެކުހުން ކުރާ ވައްކަން، މިކަންކަން އެބަޖެހޭ ހުއްޓުވަން
އައްޔަ
26 January 2017
ކަމަކުނުދޭ. ކުދިން ވަކިވަރަކަށްވުރެ ސުކޫލެއްގައި ގިނަވެއްޖެނަމަ ވަރަށްގިނަ ނޭދެވޭ އަސަރު ކުދިންނަށްކުރާނެ، އަދި ހުރިހާގޮތަކުންވެސް ވަރަށްގިނަ ގޮންޖެހުން ދިމާވާނެ. ދުނިޔޭގެ ކުރިއަރާފައިވާ ޤައުމުތަކުގައިވެސް މީހުންގިނަވާވަރަކަށް އިތުރުކުރަނީ ސްކޫލްތަށް. ސްކޫލްތަށް ބޮޑުކުރަނީކީނޫން. އެކި ހިސާބުގައި އާއްމުދިރިއުޅުމަށް ފަސޭހަވާނެގޮތަށް ސްކޫލްތަށް އިތުރުކުރުމުން މައްސަލަތަށް ގޯހުން ގޯހަށްނުގޮސް ރަގަޅު ދަރިވަރުންތަކެއް އުފެދިގެންދޭ. އަލުން މިކަމާ ވިސްނުމަށް ގޮވާލަން.
މނ
26 January 2017
ކަލޯ ހަމަ ސިންގަޕޫރު
މެންޓަލިސްޓް
26 January 2017
ހުޅުމާލެ ޕްލޭންކުރިއިރު އެތަނުގައި އުޅޭނެ މީހުންގެ އަނދާޒާއެއްނުހަދައިތޯ ކުރީން ސުކޫލްތަށް އަޅާފައިއެހެރީ ،، އަދި ޕްރީސުކޫލުން ފެށިގެން 10 ކާހަމަޔަށް ތިޔަހެއްދެވީ އެއީތޯ ދުނިޔޭގައި އެންެމެ ކާމިޔާބް މޮޑެލްއަކީ ،، ތިޔަތަނުގެ ޑިޒައިންގެ ރައްޔަތުންނަށް ދައްކާލުމެއްނުއްތޯ ؟؟ އޭރުންތާ ފާޑުކިޔާލެވޭނީވެސް ،،، ވަރަށްވެދުން
މެންޓަލިސްޓްގެ ފުރޭންޑް
26 January 2017
ބަލަ ތީކީ އެއްވެސް އިރެއްގައި މުހިއްމުކަމެއް ނޫނޭ. އެވަގުތަކަށް ފެންނަގޮތަކަށް ކަންތައްތައް ކުރަން އެނގޭބަޔެއް މިދިވެހީންނަކީ. ދުރާލާ ވިސްނާ ރޭވުމަކީ ފަރަންޖީންގެ ކަމެކޭ. ދެން އަމީނު ކޮންސްޓަކްސަނަށް ހުރިހާ ޕުރޮޖެކުޓުތަކެއް ހަވާލުކޮށް ޖަހާ ސަކަރާތެއް ޖެހީމާ މިދިވެހީންނަށް އޯކޭވާނެ.
މެންޓަލިސްގެ ފްރޭންޑް
26 January 2017
ބަލަ ކޮބާތަ މައްސަލައަކީ. ދިވެހީންނަކީ އެއްވެސް އިރެއްގައި ދުރާލާ ރާވައިގެން އަދި ވިސްނައިގެން ކަންތައްތައް ކުރާ ބަޔެއްނޫނޭ. ކޮންމެ ކަމަކަށްވެސް ވަގުތީ ހައްލެއް ހޯދީމާ ބަރާބަރުވާނެ. ދެން އަމިން ކޮންސްޓްރަކްސަނަށް މިގައުމުގެ ހުރިހާ ޕުރޮޖެކުޓުތަކެއްދީ އެޖަހާ ސަކަރާތެއް ޖަހާފާނެއެއްނު. ދީފަ ބަހައްޓާ. ދީ ދީ ދީ. ވަރިހަމައެއްނު. ލާރި ލިބެނިކޮށް އެނިމުނީ.