މަސްތުވާތަކެއްޗާ ދެކޮޅަށް މަސައްކަތްކުރަން އުފެއްދި ޓާސްކް ފޯސްގެ އޮޕަރޭޝަންގައި ފަސް މިލިއަނަށް ވުރެ ގިނަ ރުފިޔާގެ މަސްތުވާތަކެއްޗާއި ބަނގުރާ އަތުލައިގަނެ އަދި ގާނޫނާ ހިލާފު 53 ބިދޭސީއަކު ހައްޔަރުކޮށްފި އެވެ.
މިއީ މިދިޔަ ނޮވެމްބަރު 17 ގައި ވެރިކަމާ ހަވާލުވި ޑރ. މުހައްމަދު މުއިއްޒުގެ ސަރުކާރުން މިހާ ގިނަ އަދަދެއްގެ މަސްތުވާތަކެތި އަތުލައިގަނެފައިވާ ކަމަށް ރިޕޯޓްކުރި ފުރަތަމަ ފަހަރެވެ.
މާ ބޮޑު ތަފްސީލެއް ނުދެއްވައި، ހޯމްލޭންޑު ސެކިއުރިޓީ މިނިސްޓަރު އަލީ އިހުސާން، "އެކްސް"ގައި ރޭ ކުރެއްވި ޕޯސްޓެއްގައި ވިދާޅުވީ ހަތަރު އިދާރާއެއް ގުޅިގެން އުފައްދާފައިވާ ޖޮއިންޓް ޓާސްކްފޯސް އިން މިދިޔަ ދެ ހަފުތާގެ ތެރޭގައި ހިންގި އޮޕަރޭޝަންތަކުން 5.5 މިލިއަން ރުފިޔާގެ މަސްތުވާތަކެއްޗާއި ބަނގުރާ އަތުލައިގެންފައިވާ ކަމަށެވެ.
ގާނޫނާ ހިލާފުވި ކަމުގެ ކުށުގައި ވެސް 53 ބިދޭސީއަކު ބަންދުކޮށްފައިވާ ކަމަށް ވެސް އިހުސާން ވިދާޅުވި އެވެ. އިހުސާންގެ ޕޯސްޓުން އެނގޭ ގޮތުގައި އެ ބިދޭސީންނާ މި ސަރުކާރުން މިހާތަނަށް އަތުލައިގަތް މަސްތުވާތަކެއްޗާ ގުޅުމެއް ނެތެވެ.
މަސްތުވާތަކެއްޗާ ދެކޮޅަށް މަސައްކަތްކުރަން އުފައްދާފައިވާ ޓާސްކް ފޯހުގައި ތިބެނީ ފުލުހުންނާއި އިމިގްރޭޝަނާއި ކަސްޓަމްސް އަދި ކަރެކްޝަންސްގެ އިސްވެރިންނެވެ.
ނަމަވެސް، އެ ޑްރަގް އަތުލައިގަތް ތަނެއް އަދި އެ އޮޕަރޭޝަނާ ގުޅޭ އެއްވެސް މައުލޫމާތެއް އަދި ހާމައެއް ނުކުރެ އެވެ.