ޑްރަގް ކަމަށް ބުނެ ކަސްޓަމްސުން ހިފެހެއްޓި ވޭޕް ފްލޭވާތަަކުގައި ޑްރަގެއް ނެތް: ޕޮލިސް

މަސްތުވާތަކެތީގެ ޝިޕްމެންޓެއް ކަމަށް ބުނެ ކަސްޓަމްސުން ހިފެހެއްޓި ވޭޕް ފްލާތަކުގައި މަސްތުވާތަކެތި ނުހިމެނޭ ކަމަށް ފުލުހުން މިއަދު ބުނެފި އެވެ.

އެ ޝިޕްމަންޓް އަތުލައިގަތީ މިދިޔަ މަހުގެ 14 ވަނަ ދުވަހުގެ ރޭ އެވެ. ހޯމް ލޭންޑް ސެކިއުރިޓީ މިނިސްޓަރު އަލީ އިހުސާން އެރޭ އެކްސްގައި ކުރެއްވި ޕޯސްޓްގައި ވިދާޅުވެފައިވަނީ ވޭޕް އޮއިލް ނުވަތަ ފްލޭވާގެ ނަމުގައި ރާއްޖެ އެތެރެކުރީ މަސްތުވާތަކެތީގެ ބާވަތެއް ކަމަށްވާ ކެނަބިސް ކަމަށެވެ.

ކަސްޓަމްސް އިން އެ ޝިޕްމަންޓް ހިފަހައްޓާފައިވާ ކަމަށް ވިދާޅުވެ، މިނިސްޓަރު އޭރު ވަނީ ވޭޕް ކާޓްރެޖްތަކެއްގެ ފޮޓޯ ވެސް އާންމު ކުރައްވައިފަ އެވެ.

ފުލުހުން މިއަދު މީޑިއާތަކަށް ހިއްސާކުރި މެސެޖުގައި ބުނީ އެ ޝިޕްމަންޓުގައި ހުރި ތަކެތި ފުލުހުންގެ ލެބޯޓްރީން ޑްރަގަށް ޓެސްޓްކުރި ކަމަށެވެ. އަދި އެ ތަކެތީގެ ނަތީޖާއިން އެއީ މަސްތުވާތަކެތި ނޫން ކަމަށް ދައްކާފައިވާ ކަމަށް ޕޮލިހުން ބުންޏެވެ.

ޑްރަގް އަޅާފައިވާ ވޭޕް ފްލޭވާ އައި އޮއިލްތައް ސްކޫލް ދަރިވަރުންނަށް ވިއްކަމުންދާ ކަން ފާހަގަ ކުރައްވައި، އިހުސާން އޭރު ވިދާޅުވެފައިވަނީ ރާއްޖެއަށް ވޭޕް އެތެރެކުރުން މަނާކުރަން ރައީސް ޑރ. މުހައްމަދު މުއިއްޒު ނިންމެވި އެންމެ ބޮޑު އެއް ސަބަބަކީ ވެސް އެއީ ކަމަށެވެ. އޭގެފަހުން މިމަހުގެ 15 ވަނަ ދުވަހުން ފެށިގެން ރާއްޖެއަށް ވޭޕް އެތެރެކުރުން ވަނީ މަނާކޮށްފަ އެވެ. އަދި އަންނަ މަހުގެ 15 ވަނަ ދުވަހުން ފެށިގެން ވޭޕް ރާއްޖޭގައި ވޭޕް ބޭނުންކުރުން ވެސް ވަނީ މަނާކޮށް، ގާނޫނަށް އިސްލާހު ގެނެސްފަ އެވެ.

Raajje ah vape ethere kurun manaa vejje

The most trusted news source in the Maldives

Mihaaru

މިހާރު ވެސް 30 އަށް ވުރެ ގިނަ ގައުމުގައި ވޭޕް މަނާކޮށްފައިވާ އިރު، މި ސަރަހައްދުގެ ހަތް ގައުމެއްގައި ވެސް ވޭޕް މަނާކޮށްފައިވެ އެވެ.

ކަސްޓަމްސް އިން އާންމުކުރި މައުލޫމާތުތަކަށް ބަލާއިރު 2018 ވަނަ އަހަރުން ފެށިގެން މިދިޔަ ޖުލައި މަހާ ހަމައަށް 124 މިލިއަން ރުފިޔާގެ ވޭޕާއި އީ-ސިނގިރޭޓް ރާއްޖެއަށް އެތެރެ ކޮށްފައިވެ އެވެ. އަދި މިދިޔަ ޖެނުއަރީ މަހުން ފެށިގެން މިދިޔަ ޖުލައި މަހާ ހަމައަށް 19.7 މިލިއަން ރުފިޔާގެ ތަކެތި އެތެރެކުރި އެވެ.